ދިހަ އަހަރުގެ ކުޑަކުއްޖަކަށް ޖިންސީ ގޯނާކުރި މައްސަލައެއްގައި އިއްޔެ ހައްޔަރުކުރި 51 އަހަރުގެ މީހާ 30 ދުވަހަށް ބަންދުކުރުމަށް ކޯޓުން އަމުރުކޮށްފިއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖެއްގައި ބުނީ މ، ފ، ދ، ތ ނުވަތަ ލ. އަތޮޅުގެ ތެރެއިން އަތޮޅެއްގައި ހިމެނޭ ރަށެއްގައި އުމުރުން 10 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް އިއްޔެ ފުލުހުންނަށް ރިޕޯޓުކޮށްފައި ވާކަމަށެވެ.
މި މައްސަލައިގައި ހައްޔަރު ކުރި މީހާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން އޭނާ 30 ދުވަހަށް ބަންދު ކުރަން ކޯޓުން އަމުރުކޮށްފައިވާ ކަމަށް ފުލުހުން ވަނީ ބުނެފައެވެ.
ކުޑަކުދީންނާ ގުޅޭ މިފަދަ މައްސަލަތަކަކީ ސީރިއަސް މައްސަލަތަކަަކަށް ވާތީ ކުއްޖާގެ މައުލޫމާތު ރައްކާތެރިކުރުމުގެ ގޮތުން ފުލުހުން ކުއްޖާގެ އަތޮޅާއި ރަށް ހާމަ ކޮށްފައެއް ނުވެއެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
ޖިންސީ ގޯނާގެ މިފަދަ މައްސަލަތަކަކީ މުޖްތަމައުގައި އާންމުވެފައިވާ މައްސަލައެކެވެ. މީގެ ހަފުތާއެއްހާ ދުވަސް ކުރީން ވަނީ ހުޅުމާލޭގައި މޫދަށް އެރި އުޅުނު ކުޑަކުއްޖަކަށް ޖިންސީ ގޯނާކުރި މައްސަލައެއް ވެސް ފެންމަތިވެފައެވެ.
އެ މައްސަލައިގައި ސޯޝަލްމީޑިއާގައި ދައުރުވި ޕޯސްޓުގައި ވަނީ އެ މީހާ ކުޑަކުދިންނާ ބެހި، އެ ކުދިން ކައިރީ އެކަހެރި ހިސާބުތަކަށް ދާން ބުނެ، އެ ކުދިންގެ ނުރުހުމުގައި ގައިގައި އަތްލާން އުޅުނު ކަމަށެވެ.
ކުޑަކުދިންނަށް ޖިންސީ ގޯނާ ކުރުމުގެ މައްސަލަތައް ސާބިތުވެފައިވާ މީހުން އެނގޭ ގޮތަށް އޮންލައިން ދަފުތަރެއް އެކުލަވާލައި، އޮންލައިންކޮށް ފެންނަން ހުރެއެވެ.