ހުޅުމާލޭގައި މޫދަށް އެރި އުޅުނު ކުޑަކުއްޖަކަށް ޖިންސީ ގޯނާކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން އެ މައްސަލައާ ގުޅޭ ގޮތުން މީޑިއާތަކާ ހިއްސާކުރި މެސެޖެއްގައި ބުނީ އެ މައްސަލަ ރިޕޯޓްކޮށްފައިވަނީ މިދިޔަ ހުކުރު ދުވަހު ކަމަށެވެ. ނަމަވެސް އެ މައްސަލައާ ގުޅޭ އިތުރު ތަފުސީލެއް ދީފައިނުވެއެވެ.
ފުލުހުން އެހެން ބުނެފައިވަނީ، ހުޅުމާލޭ ގޮނޑުދޮށުގައި ކުޑަކުދިންނަށް ޖިންސީ ގޯނާކުރާ ކަމަށް ތުހުމަތު ކުރެވޭ މީހަކު ފުލުހުންނާ ހަވާލުކުރި ކަމަށް ސޯޝަލް މީޑިއާގައި މީހަކު ބުނި ފަހުންނެވެ.
އެ ޕޯސްޓުގައިވަނީ އެ މީހާ ކުޑަކުދިންނާ ބެހި، އެ ކުދިން ކައިރީ އެކަހެރި ހިސާބުތަކަށް ދާން ބުނެ، އެ ކުދިންގެ ނުރުހުމުގައި ގައިގައި އަތްލާން އުޅުނު ކަމަށެވެ. އަދި އެ މީހާ ފުލުހުންނާ ހަވާލުކުރި ނަމަވެސް އެ މީހާ ދޫކޮށްފައިވާ ކަމަށް އެ ޕޯސްޓުގައިވެއެވެ.
ކުޑަކުދިންނަށް ޖިންސީ ގޯނާކުރުމުގެ މައްސަލަތައް ވަރަށް ގިނަވެފައިވާއިރު، އެފަދަ މައްސަލަތައް ސާބިތުވެފައިވާ މީހުން އެނގޭ ގޮތަށް އޮންލައިން ދަފުތަރެއް އެކުލަވާލައިފައިވެއެވެ.