ކުރީގެ ސަރުކާރުގެ ގެދޮރުވެރިޔާ ސްކީމްގެ ދަށުން ފުލެޓް ލިބޭ މީހުންގެ ލިސްޓަށް ރައްޔިތުންގެ މަޖިލީހުގެ މެންބަރުން ނުފޫޒު ފޯރުވާ ކަމަށް ބުނެ ފަތުރަނީ ދޮގު ޚަބަރު ކަމަށާއި ފުލެޓު ލިބޭނީ ހައްގުވެރިންނަށް ކަމަށް ހައުސިން މިނިސްޓްރީން މިއަދު ބުނެފިއެވެ.
އެ ލިސްޓު މުރާޖާ ކުރުމުގެ މަސައްކަތަށް ހައުސިން މިނިސްޓްރީން ކުރަމުން އަންނައިރު އެ މަސައްކަތަށް ރައްޔިތުންގެ މަޖިލީހުގެ މެންބަރުންގެ އިތުރުން ސިޔާސީ ފަރާތްތަކުން ނުފޫޒު ފޯރުވާ ކަމަށް ބުނެ ވަނީ އަޑުފެތުރިފައެވެ.
މި ކަމާ ގުޅިގެން އެ މިނިސްޓްރީން މިއަދު ނެރުނު ބަޔާނުގައިވަނީ ގެދޮރުވެރިޔާ ސްކީމްގެ ރީި-އިވެލުއޭޝަންގެ މަސައްކަތަށް ސިޔާސީ ނުފޫޒު ފޯރުވަމުންދާ ކަމަށްބުނެ ރައްޔިތުންގެ ހިތްތަކުގައި ނުތަނަވަސްކަން އުފެދޭ ގޮތަށް ފަތުރަމުންދަނީ ހަގީގަތާ ޚިލާފު ކަނޑައެޅިގެން ދޮގު ޚަބަރުތަކެއް ކަމަށެވެ.
އެ މިނިސްޓްރީން ވަނީ ރީ-އިވެލުއޭޝަނަށް އެއްވެސް ފަރާތަކުން ނުފޫޒެއް ނުފޯރުވާނެ ކަމުގެ ފުރިހަމަ ޔަގީންކަން ހުރިހާ ރައްޔިތުންނަށް ވެސް ދީފައެވެ. އަދި އެ ސްކީމްގެ ދަށުން ފްލެޓު ލިބޭނީ އެންމެ ހައްގުވެރި ފަރާތްތަކަށްކަން ކަށަވަރު ކުރުމަކީ ހައުސިން މިނިސްޓްރީގެ މަގުސަދު ކަމަށް ބުނެފައިވެއެވެ.
ގެދޮރުވެރިޔާ ސްކީމަކީ ގިނަ އަދަދެއްގެ ރައްޔިތުންގެ ބޯހިޔާވަހިކަމުގެ އުންމީދުތަކާ ގުޅިފައިވާ ވަރަށް ހައްސާސް މައްސަލައެއް ކަމަށްވާތީ، މި ކަމުގައި ހައުސިން މިނިސްޓްރީގެ ބަހެއް ނެތި، ސިޔާސީ ބޭނުމަށް ހަގީގަތާ ޚިލާފު ޚަބަރު ނުފެތުރުމަށް އެ މިނިސްޓްރީން ވަނީ ހުރިހާ ފަރާތްތަކުގެ ކިބައިން އިލްތިމާސްކޮށްފައެވެ.
ހައުސިން މިނިސްޓްރީން ވަނީ ފުލެޓު ލިސްޓު ނެރޭނެ ކަމަށް ބުނެ އެކި ތާރީޚުތައް ވެސް ދީފައެވެ. އެހެން ނަމަވެސް ދިން މުއްދަތުތަކުގެ ނިޔަލަށް ފްލެޓު ލިސްޓު ނެރެވިފައެއް ނުވެއެވެ. މި ކަމާ ގުޅިގެން މިދިޔަ ހަފުތާގައި އާންމުން ވަނީ ހައުސިން މިނިސްޓްރީ ތެރެއަށްވަދެ މުޒާހަރާ ވެސް ކޮށްފައެވެ.
ގެދޮރުވެރިޔާ ސްކީމްގެ ދަށުން ދޫކުރާ 4،000 ފުލެޓު ހަވާލުކުރުން ލަސްވީ އެންޓި ކޮރަޕްޝަން ކޮމިޝަން (އޭސީސީ)ން އެ ފުލެޓުތަކާ ގުޅޭ މައްސަލަ ބެލުމަށް ފަހު، އެންގި އެންގުމާ ގުޅިގެންނެވެ. އެ ކޮމިޝަނުން ނިންމީ މިދިޔަ ސަރުކާރުން ފުލެޓުތައް ދޫކޮށްފައިވަނީ ގޯސްކޮށް ކަމަށެވެ.
އޭސީސީގެ ތަހުގީގަށް ފަހު ހައުސިން މިނިސްޓްރީން ބަލަން ޖެހޭ ކަންތައްތައް ބެލުމަށް އުފައްދާފައިވާ ކޮމިޓީއަކުން އަންނަނީ ފޯމުތައް ރީއިވެލުއޭޓް ކުރުމުގެ މަސައްކަތް ކުރަމުންނެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުންނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ.