ޖަލުގައި ހުންނެވި ޕާކިސްތާނުގެ ކުރީގެ ބޮޑު ވަޒީރު އިމްރާން ޚާން މިނިވަން ކުރުމަށް ގޮވާލައި ޕާކިސްތާނުގެ އެތައް ހާސް ބަޔަކު ކުރަމުންދާ މުޒާހަރާގައި ސަލާމަތީ ބާރުތަކާއި އާންމުންނާ ދެމެދު ހިނގި ކުރިމަތިލުންތަކުގައި ހަތަރު ފުލުހަކު މަރުވެއްޖެއެވެ.
ޕާކިސްތާނުގެ އެކި ސަރަހައްދުތަކުން އިމްރާން ޚާނަށް ތާއިދުކުރާ ފަރާތްތަކުން ވަނީ މުޒާހަރާތައް ފަށައި، ވެރިރަށް އިސްލާމްއާބާދަށް މިސްރާބު ޖަހައިފައެވެ. އެ މީހުން އިސްލާމްއާބާދަށް ވަނުން ހުއްޓުވުމަށް ޓަކައި ފުލުހުން ވަނީ ބެރިކޭޑު ޖަހައި، އެ ސިޓީގައި އެއްވުންތައް ބޭއްވުން ދެ މަހަށް މަނާކޮށްފައެވެ.
މިއަދު އެ މުޒާހަރާތަކުގެ ބައިވެރިން ވަނީ އިސްލާމްއާބަދަށް ވަދެގަނެފައެވެ.
ބޮޑުވަޒީރު ޝެހްބާޒް ޝަރީފްގެ އޮފީހުން ނެރުނު ބަޔާނެއްގައި ވަނީ، އެ މުޒާހަރާތަކުގައި އުޅަނދަކުން ޖައްސައި ހަތަރު އޮފިސަރުން މަރައިލައިފައިވާ ކަމަށެވެ. އެ އޮފީހުން ވަނީ އެއީ ސުލްހަވެރި މުޒާހަރާއެއް ނޫން ކަމަށާއި، އެއީ ހައްދުފަހަނައަޅައި ދިޔުން ކަމަށް ބުނެފައެވެ.
ހަތަރު އޮފިސަރަކު މަރުވެފައިވާ ކަމަށް ސަރުކާރުން ބުނި ނަމަވެސް، މަރުވި މީހުންގެ ތެރޭގައި އާންމުންގެ މީހަކުވެސް ހިމެނޭ ކަމަށް މީޑިއާތަކުން ރިޕޯޓުކުރެއެވެ.
އެ މުޒާހަރާތައް ހުއްޓުވަން، އިންޓަނެޓުގެ ޚިދުމަތް ލިމިޓުކޮށް، 20،000 އެއްހާ ފުލުހުން ދަނީ އިސްލާމްއާބާދުގެ ބޮޑު މަގުތަކުގައި ފޯރިމަރަމުންނެވެ.
ދެހާސް އަށާރައިން 2022 ވަނަ އަހަރާ ދެމެދު ވެރިކަމުގައި ހުންނެވިއިރު ލިބިވަޑައިގަތް ހަދިޔާތަކަކުން ގަވާއިދާ ޚިލާފަށް ވިޔަފާރި ކުރެއްވުމުގެ ކުށް ސާބިތުވެ، އިމްރާން ޚާން ތިން އަހަރަށް ޖަލަށް ލާން ހުކުމްކުރީ މިދިޔަ އަހަރުގެ އޮގަސްޓު މަހެވެ. އެ ހުކުމަށް ކަފާލާތުގެ ދަށުން މިނިވަން ވީ ނަމަވެސް، އެމަނިކުފާނުގެ މައްޗަށް އިތުރު ޝަރީއަތްތަކެއް ކުރިއަށްދާތީ، އަދިވެސް ހުންނަވަން ޖެހެނީ ޖަލުގައެވެ.
ޚާންގެ ތަހްރީކީ އިންސާފް ޕާޓީ (ޕީޓީއައި)އިން އަންނަނީ އެމަނިކުފާނު މިނިވަންކުރުމަށް ގޮވާލަމުންނެވެ. ޚާނަކީ އިދިކޮޅުގައި އެންމެ މަގުބޫލު ބޭފުޅާއެވެ.
ޕާކިސްތާނުގެ ސިޔާސީ މަޝްރަހު ދިރާސާކުރާ ބައެއް ފަރާތްތަކުންނާއި ޕީޓީއައިއިން ބުނާ ގޮތުގައި، އިމްރާންގެ މައްޗަށް ކޮށްފައިވާ ދައުވާތަކަކީ ސިޔާސީ ގޮތުން ކޮށްފައިވާ ދައުވާތަކެކެވެ.