އިލެކްޝަންސް ކޮމިޝަން (އީސީ)އާއި އެންޓި ކޮރަޕްޝަން ކޮމިޝަން (އޭސީސީ)ގެ ރައީސާއި ނައިބު ރައީސް އައްޔަންކުރުމުގެ ބާރު ސީދާ ރައީސުލްޖުމްހޫރިއްޔާއަށް ލިބޭ ގޮތަށް އެ ދެ ކޮމިޝަންގެ ގާނޫނަށް ވަކިވަކިން ގެނައި ދެ އިސްލާހު ވެސް ރައީސް ޑރ. މުހައްމަދު މުއިއްޒު މިއަދު ތަސްދީގުކުރައްވައިފިއެވެ.
އީސީއާއި އޭސީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސަށް ދޭގޮތަށް ސަރުކާރުގެ ފަރާތުން ހުށަހެޅި ދެ ބިލު ތަޅުމުން ފާސްކުރީ އިއްޔެއެވެ.
ރައީސް މުއިއްޒު މިއަދު ވަނީ ދެ ބިލު ވެސް ތަސްދީގުކުރައްވައިފައެވެ. އެހެންވެ، ދެ ބިލު ވެސް މިހާރު ވަނީ ގެޒެޓުގައި ޝާއިއުކޮށްފައެވެ.
ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރަން، ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅުއްވާނީ ރައީސުލްޖުމްހޫރިއްޔާއެވެ. މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ.
މިހާރު ގާނޫނުގައި އޮންނަ ގޮތުން ނަމަ އޭސީސީ އަދި އީސީގެ ރައީސް އަދި ނައިބު ރައީސް އައްޔަނުކުރަނީ އެ ދެ ކޮމިޝަންގެ މެންބަރުންގެ މެދުގައި ނަގާ ވޯޓަކުންނެވެ. މި ވޯޓުގެ ނަތީޖާ 28 ގަޑިއިރު ތެރޭ ރައީސުލްޖުމްހޫރިއްޔާއަށާއި މަޖިލީހަށް ހުށަހަޅަން ޖެހޭނެއެވެ.
ފާހަގަކޮށްލެވޭ ގޮތުގައި، މި ޤާނޫނަށް ޢަމަލުކުރަން ފެށުމުގެ ކުރިން ކޮމިޝަނުގެ ރައީސާއި ނައިބު ރައީސްގެ މަގާމަށް ޢައްޔަންކޮށްފައިވާ މެންބަރުން، ގާނޫނުގައިވާ ގޮތުގެމަތިން މަގާމުން ވަކިވަންދެން އެ މަގާމުގައި ދެމިތިބޭނެއެވެ. އެކަމަކު، އީސީގެ ރައީސްކަމުގައި ހުންނެވި ފުއާދު ތައުފީގުގެ ދައުރު ހަމަވުމުން އޭނާ ވަނީ އެ މަގާމުން ވަކިވެފައެވެ.
ތައިލޭންޑަށް ކަނޑައަޅުއްވާފައި ހުންނަވާ ސަފީރުކަމަށް ފުއާދު އައްޔަންކުރައްވަން ރައީސް ވަނީ މަޖިލީހަށް އޭނާގެ ނަން ފޮނުއްވައިފައެވެ.
އޭސީސީގެ ރައީސް އާދަމް ޝާމިލް އެކަމަކު އަދިވެސް ހުންނެވީ މަގާމުގައެވެ. އެހެންނަމަވެސް، އެ ކޮމިޝަންގެ ނައިބު ރައީސް އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު ވަނީ މެންބަރުކަމުން އިސްތިއުފާދެއްވައިފައެވެ. އެ ބޭފުޅުން މަގާމުން އިސްތިއުފާދެއްވީ، އެ ބޭފުޅުން މަގާމުން ވަކިކުރަން މަޖިލީހުން ފާސްކުރަން އުޅެނިކޮންނެވެ.
މަޖިލީހުން އިއްޔެ ވަނީ އީސީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަކިކުރަން ފާސްކޮށްފައެވެ. އެކަމަކު، އެ ކޮމިޝަންގެ މެންބަރު ޑރ. މުހައްމަދު ޒާހިރު ވަކިނުކުރަން ވަނީ ނިންމައިފައެވެ.
އީސީއާއި އޭސީސީގެ މެންބަރުން ވަކިކުރަން މަޖިލީހަށް ހުށަހެޅީ ބޮޑެތި ތުހުމަތުތަކެއް ކުރުމަށް ފަހެވެ.
އޭގެ ތެރޭގައި، އެންޓި ކޮރަޕްޝަން ކޮމިޝަންގެ މެންބަރުންނަށް ކުރި ތުހުމަތުތަކުގެ ތެރޭގައި މައްސަލަތަކަށް ނުފޫޒު ފޯރުވުން ވެސް ހިމެނެއެވެ. އަދި، އީސީގެ މެންބަރުންނަށް ކުރި ތުހުމަތުތަކުގެ ތެރޭގައި ރީ-ރެޖިސްޓްރޭޝަން ފޯމުތައް އޮޅުވާލުމާއި ނިންމުންތަކަށް ނުފޫޒު ފޯރުވަން މަސައްކަތްކުރުން ހިމެނެއެވެ.