ވަރަށް އަވަހަށް ހދ. ހަނިމާދޫގައި ސީޕްލޭންގެ ޚިދުމަތް ފެށުމަށް ތައްޔާރުވަމުން އަންނަ ކަމަށް، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން މިއަދު ބުނެފިއެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސިސް ކޮމިޓީގައި ވާހަކަދައްކަވަމުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފް ވިދާޅުވީ ހަނިމާދޫ އެއާޕޯޓުގެ މަސައްކަތް ނިމޭއިރު، އެތަނުގައި ސީޕްލޭންގެ ޚިދުމަތް ފެށުން މުހިންމު ކަމަށެވެ.
"އެއީ އަސްލު ހަގީގަތުގަ ރާއްޖޭގެ އިންޓަނޭޝަނަލް އެއާޕޯޓެއް ފީޒަބަލް ވާނީ އެ ކައިރީ ހުރި އެނދުތަކަކަށް އެކްސެސްވެގެން. އެހެންވީމަ 180 ކިލޯގެ ރޭޑިއަސްގަ ހަނިމާދޫއަށް ޖައްސާ މަތިންދާބޯޓުތަކުން އަންނަ ފަތުރުވެރިންނަށް މި ދެންނެވި ރޭޑިއަސްގެ ރިސޯޓުތަކަށް ޕްރޮޕަޓީސްތަކަށް ދެވެންޏާ ފީސަބަލް ވާނެ،" މުޖުތަބާ ވިދާޅުވިއެވެ.
ސްޓޭޓް އޯންޑް އެންޓަޕްރައިސިސް ކޮމިޓީގައި އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފް ވާހަކަދައްކަވަނީ -- ފޮޓޯ/ މަޖިލިސް
އެހެންކަމުން އެއާޕޯޓު ތަރައްގީކުރުމުގެ މަސައްކަތް ނިމެންވާއިރަށް ހަނިމާދޫގައި ކުޑަ ސީޕްލޭން ޓާމިނަލެއް އަޅައި، އޮޕަރޭޝަނަށް ގެންނާނެ ކަމަށް މުޖުތަމާ ވިދާޅުވިއެވެ.
"އަޅުގަނޑުމެން ވަރަށް އަވަހަށް ހަނިމާދޫގަ ސީޕްލޭން ގާއިމްކުރާނަން،" މުޖުތަބާ ވިދާޅުވިއެވެ.
"...އެހެންވީމަ އަޅުގަނޑުމެންގެ ވިސްނުމަކީ ވަރަށް އަވަހަށް އެއާޕޯޓު ހުޅުވެން ވާއިރަށް މިދަނީ ޕްލޭންކުރަމުން، ހުޅުވެންވާއިރަށް ސީޕްލޭން ތަނެއް ނެތް ނަމަވެސް، ކުޑަ ޓާމިނަލެއް ހެދި އެތަނުގެ އޮޕަރޭޝަން ފަށަން. އޭރުން ވީއައިއޭއަށް ޖައްސާ ބައެއް ޕްލޭންތައް މޫވްކުރެވޭނެ،" މުޖުތަބާ ވިދާޅުވިއެވެ.
މުޖުތަބާ ވިދާޅުވީ ވެލާނާ އިންޓަނޭޝަނަލް އެއާޕޯޓު (ވީއައިއޭ)އަށް ޖައްސާ ބައެއް ސީޕްލޭންތައް ހަނިމާދޫގައި ގާއިމްކުރާ ސީޕްލޭން ޓާމިނަލަށް ޖައްސާ ގޮތަށް ހެދި ނަމަވެސް އެއްވެސް މައްސަލައެއް ދިމައެއް ނުވާނެ ކަމަށެވެ.
ސްޓޭޓް އޯންޑް އެންޓަޕްރައިސިސް ކޮމިޓީގައި އެމްއޭސީއެލްގެ މެންބަރުން -- ފޮޓޯ/ މަޖިލިސް
ހަނިމާދޫ އިންޓަނޭޝަނަލް އެއާޕޯޓު ތަރައްގީކުރުމުގެ މަޝްރޫއު ހަވާލުކުރީ 136.6 މިލިއަން އެމެރިކާ ޑޮލަރަށް އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާއެވެ. ޖޭއެމްސީ ޕްރޮޖެކްޓްސްއަކީ އިމާރާތް ކުރުމުގެ ދާއިރާއާއި ހަކަތައިގެ ދާއިރާގެ މަޝްރޫއުތައް ހިންގާ އިންޑިއާގެ ކުންފުންޏެކެވެ.
އިންޑިއާގެ އެގްޒިމް ބެންކާއި ދިވެހި ސަރުކާރާ ދެމެދު 2019 ގައި ސޮއި ކުރި ކްރެޑިޓް ލައިނުން ހިންގާ އެ މަޝްރޫއުގައި، ހަނިމާދޫގައި 2.46 ކިލޯމީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓާމިނަލެއް އިމާރާތްކުރުން ހިމަނާފައިވެއެވެ.
ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއަކީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފެށި މަޝްރޫއެކެވެ.
މި ސަރުކާރުން އެ މަސައްކަތް މިހާރު ކުރިއަށް ގެންދާއިރު، ބޮޑު މިނުގައި 42،000 އަކަފޫޓު ހުންނަ އާ އޭޕްރަންގެ މަސައްކަތް ނިމި، މިހާރު ވަނީ ބޭނުންކުރަން ވެސް ފަށާފައެވެ. އަދި އަލަށް ގާއިމުކުރެވުނު ރަންވޭ މި އަހަރުގެ ކުރީކޮޅު ވަނީ ބޭނުންކުރަން ފަށައިފައެވެ.