އިސްރާއީލް ޕާސްޕޯޓު މަނާކުރާނަމަ، ތާއީދުކުރަނީ ހަމައެކަނި އެ ގައުމުގެ ވެރީންގެ ޕާސްޕޯޓު މަނާކުރުމަށް ކަމަށް ނޭޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަނުން މިއަދު ބުނެފިއެވެ.
އިސްރާއީލް ޕާސްޕޯޓު މަނާކުރުމާ ގުޅޭގޮތުން 241 ކޮމިޓީގައި ވާހަކަދައްކަވަމުން ގެސްޓު ހައުސް އެސޯސިއޭޝަނުގެ ފަރާތުން އެ އެސޯސިއޭޝަނުގެ ނައިބު ރައީސް އަހްމަދު ވަހީދު ވަނީ އެ ޖަމިއްޔާއިން ދެކޭ ގޮތުގެ މުހިންމު ކަންކަން ހާމަކުރައްވައިފައެވެ. އެ ކަންކަމަކީ:
- ފަލަސްތީނުގައި ދިރިއުޅޭ މުސްލިމުން ވެސް އިސްރާއީލުގެ ޕާސްޕޯޓު ގެންގުޅޭތީ މުޅި އިސްރާއީލުގެ ހުރިހާ ރައްޔިތުންގެ ޕާސްޕޯޓު މަނާކުރަން ތާއީދު ނުކުރާ ކަމަށް.
- ނަމަވެސް އިސްރާއީލުގެ ވެރިންގެ ޕާސްޕޯޓު މަނާކުރަން އެ އެސޯސިއޭޝަނުން ތާއީދުކުރާކަމަށް.
- އިސްރާއީލުގެ ޕާސްޕޯޓު މަނާކުރަން ވާނީ ސިފައިން ވެސް ނުހިމެނޭ ގޮތަށްކަަމަށާއި އެއީ މުޅި އިސްރާއީލުގެ ކޮންމެ ރައްޔިތަކީ އަސްކަރީ ޚިދުމަތުގައި އުޅެންޖެހޭ މީހަކަށް ވާތީކަމަށް.
އިސްރާއީލް ޕާސްޕޯޓު ގެންގުޅޭ އެންމެންނަށް ރާއްޖެ ނާދެވޭ ގޮތް ހަދައިފިނަމަ ރާއްޖޭގެ ފަތުރުވެރިކަމަށް ވެސް ނުރަނގަޅު އަސަރުތަކެއް ކުރާނެކަމަށް ބެލެވޭ ކަމަށް އެ ޖަމިއްޔާއިން ބުންޏެވެ.
"ޚާއްސަކޮށް މި އޮންލައިން ޕްލެޓްފޯމްތަކަކީ، މޭޖާ ޝެއާ ހޯލްޑް މި އޮންނަނީ ޔަހޫދީ ދައުލަތަށް ނިސްބަތްވާ ބައެއްގެ އަތުގައި. އެހެންވީމާ ރާއްޖެ ކަހަލަ ކުޑަ ގައުމަކުން އަޅުގަނޑުމެންގެ އިގްތިޞާދަށް ހީނަރުކަމެއް އައިސްފާނެ މި ވަރުގެ ބޮޑު ސްޓޭންޑެއް އަޅުގަނޑުމެން ނަގައިިފިއްޔާ،" އަހްމަދު ވިދާޅުވިއެވެ.
އެސޯސިއޭޝަނުން ކޮމިޓީގައި އިތުރަށް ބުނި ގޮތުގައި ތަފާސްހިސާބުން ފެންނަ ގޮތުގައި މިދިޔަ އަހަރު އސްރާއިލުން ރާއްޖެ އައީ 3،380 ފަތުރުވެރިން ކަމަށެވެ. މި އަހަރުގެ މިހާތަނަށް އިސްރާއިލުން ރާއްޖެ އައި ފަތުރުވެރިންގެ އަދަދު އުޅެނީ 1،200 ގައިކަމަށް ވެސް ފާހަގަކުރިއެވެ.
"އެހެންވީމާ ވަަރަށް ބޮޑު ޑިކްލައިނެއް މި އިންނަނީ މިކަހަަލަ ކަމެއް ނުކުރިއަސް [ޕާސްޕޯޓު މަނާ ނުކުރިއަސް] އަޅުގަނޑުމެންނަށް އައިސްފައި،" އެ އެސޯސިއޭޝަންގެ އެސިސްޓެންޓް ސެކެރެޓަރީ ޖެނެރަލް ނިމާދު އިބްރާހީމް ވިދާޅުވިއެވެ.
ސީދާ އިސްރާއީލުން މިހާރު ވެސް މިހާ މަދު އަދަދެއްގެ ފަތުރުވެރިން އަންނައިރު، އިސްރާއިލު ޕާސްޕޯޓެއް އޮންނަ އެހެން ގައުމަކަށް ނިސްބަތްވާ މީހަކަށް ވެސް، އިސްތިސްނާއެއް ނެތި ތަންފީޒުވާ ގޮތަށް މަނާކޮށްފި ނަމަ އިގްތިޞާދަށް އޭގެ ނުރަނގަޅު އަސަރު ފެންނާނެކަމަށް އެ އެސޯސިއޭޝަނުން ބުންޏެވެ.