ސަރުކާރު ހިންގާ މައި ޕާޓީ، ޕީއެންސީގެ ދާއިރާތަކުގެ އިންތިޚާބު ނުވަތަ އެތެރޭގެ އިންތިޚާބުގެ ވަގުތީ ނަތީޖާ އިއުލާނުކޮށްފިއެވެ.
ޕީއެންސީން މިރޭ ނެރުނު އިއުލާނެއްގައި ބުނެފައި ވަނީ ވަގުތީ ނަތީޖާ އިއުލާނު ކުރީ ވޯޓުލާ މަރުކަޒުތަކުގައި ވޯޓު ގުނައި، އެ މަރުކަޒުތަކުގައި އިއުލާނުކުރި ގޮތަށްކަން ކަށަވަރު ކުރުމަށް ފަހުގައި ކަމަށެވެ.
ވަގުތީ ނަތީޖާއަށް ފަހު މުޅި ރާއްޖޭގައި ބެހެއްޓި 143 ވޯޓު ފޮށި ކަރުދާސްތަކާއި ނަތީޖާ ޝީޓުތަކުގެ އަސްލު، ޕާޓީގެ ރަސްމީ އޮފީހަށް ލިބުމުން، ހުށަހެޅިފައިވާ ޝަކުވާތަކަށް ރިއާޔަތް ކުރުމަށްފަހު، ދާއިމީ ނަތީޖާ އިއުލާނު ކުރާނެ ކަމަށް އެ އިއުލާނުގައިވެއެވެ.
ޕީއެންސީން ބުނީ، ވޯޓުލުމުގެ ކުރިން އިންތިހާބުވި މެންބަރުންނާއި ވޯޓުން އިންތިހާބުވި މެންބަރުންގެ މެދުގައި ނަގާ ވޯޓަކުން 72 ގަޑިއިރު ތެރޭ އިންތިހާބު ކުރަންޖެހޭ މަގާމުތައް ކަނޑައެޅުމުގެ މަރުހަލާ ދާއިމީ ނަތީޖާއަށް ފަހު ކުރިއަށް ގެންދާނެ ކަމަށެވެ.
އެ ޕާޓީގެ ދާއިރާތަކުގެ އިންތިޚާބުގެ ވަގުތީ ނަތީޖާ އިއުލާނުކޮށްފައިވާއިރު، ނަތީޖާއާ މެދު އެއްވެސް ޝަައްކެއްވާނަމަ، ޝަކުވާ ހުށަހެޅުމަށް ވެސް ވަނީ ހުޅުވާލައިފައެވެ.
ޕީއެންސީގެ އެތެރޭގެ އިންތިޚާބުގެ ވޯޓުލުން ކުރިޔަށް ގެންގޮސްފައިވަނީ މިދިޔަ ހޮޮނިހިރު ދުވަހު ހެނދުނު 10:00އިން މެންދުރު ފަހު 14:00ގެ ނިޔަލަށެވެ.
ޖުމުލަ 1984 މަގާމަށް މީހުން އިންތިޚާބު ކުރުމަށް ހަމަޖެހިފައިވާ މި އިންތިޚާބުގައި 648 ކެންޑިޑޭޓުން ވާދަކުރެއެވެ. މީގެތެރެއިން 1300 މަގާމަށް އެންމެ ކެންޑިޑޭޓަކު ކުރިމަތިލާފައިވާތީ އެ 1300 މަގާމަށް ވަނީ އިންތިޚާބަކާ ނުލައި މީހުން ހޮވިފައެވެ.
މި އިންތިޚާބުގައި ވޯޓު ލުމުގެ ހައްގު ލިބިފައިވާ މީހުންގެ އަދަދު 33،500އަށް އަރައެވެ.