ވެރިކަން ކުރާ މައި ޕާާޓީ, ޕީޕަލްސް ނެޝެނަލް ކޮންގްރެސް (ޕީއެންސީ)ގެ އެތެރޭގެ އިންތިޚާބު ފަށައިފިއެވެ.
ޕީއެންސީގެ ދާއިރާތަކުގެ އިންތިޚާބުގެ އެންމެ ފަހުގެ ތައްޔާރީތައް ނިންމާ މިއަދުގެ 10:00 ގައި ވަނީ ވޯޓުލާން ފަށާފައެވެ.
މި އިންތިޚާބުގައި މާލެއާއި އަތޮޅުތެރޭގެ 88 ރަށެއްގައި ވޯޓުލުން ކުރިޔަށްދެއެވެ. އޭގެތެރެއިން މާލެ ސަރަހައްދުގައި ބަހައްޓާފައި ހުރި 56 ވޯޓު ފޮއްޓާއި އަތޮޅުތެރޭގައި ބަހައްޓާފައި ހުރި ފޮށިތަކާ އެކު ޖުމުލަ 144 ވޯޓް ފޮށި ވަނީ ބަހައްޓައިފައެވެ.
ޕީއެންސީގެ އެތެރޭގެ އިންތިހާބުގެ ވޯޓްލުން ކުރިއަށް ދަނީ-- ސަން ފޮޓޯ: އިސްމާއިލް އަބްދުލް ގަފޫރު
ޖުމުލަ 1984 މަގާމަށް މީހުން އިންތިހާބު ކުރުމަށް ހަމަޖެހިފައިވާ މި އިންތިޚާބުގައި 648 ކެންޑިޑޭޓުން ވާދަކުރެއެވެ. މީގެތެރެއިން 1300 މަގާމަށް އެންމެ ކެންޑިޑޭޓަކު ކުރިމަތިލާފައިވާތީ އެ 1300 މަގާމަށް ވަނީ އިންތިޚާބަކާ ނުލައި މީހުން ހޮވިފައެވެ.
މި އިންތިޚާބުގައި މާލެ ސަރަހައްދުގެ ހުރިހާ ވޯޓު ފޮށިތަކެއް ބަހައްޓާފައި ވަނީ ދަރުބާރުގޭގައެވެ.
މި އިންތިޚާބުގައި ވޯޓް ލުމުގެ ހައްގު ލިބިފައިވާ މީހުންގެ އަދަދު 33500 އަށް އަރައެވެ.
އިންތިޚާބުގެ ވޯޓުލުން މިއަދު 10:00 ގައި ފަށާފައި ވާއިރު ވޯޓުލުން ނިމި ވޯޓް ފޮށިތައް ބަންދުކުރުމަށް ހަމަޖެހިފައި ވަނީ މިއަދުގެ މެންދުރުފަހު 14:00 ގައެވެ.