އިޒްރޭލުން ފަލަސްތީނުގައި ހިންގަމުންދާ ލާއިންސާނީ ގަތުލުއާންމާ ގުޅިގެން އިޒްރޭލު މީހުންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަންވާނީ އިމްޕެކްޓް އެސެސްމަންޓް ހަދާފައި ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެއެވެ.
އިޒްރޭލު ޕާސްޕޯޓު މަނާކުރަން ނިންމާ، ސަރުކާރުން އެކަން އިއުލާނުކުރީ ޖޫން މަހުގެ ދެވަނަ ދުވަހެވެ. އެ ނިންމުމަށް މުޅި ދުނިޔޭގެ ސަމާލުކަން ލިބުނެވެ.
އޭރު އިޒްރޭލު ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށްޓަކައި ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް އޮތީ މަޖިލީހަށް ބިލެއް ވެސް ހުށަހަޅާފައެވެ. ޕީއެންސީގެ ވެސް ފުރިހަމަ ތާއީދާ އެކު، އޭރު އެ ބިލު މަޖިލީހުން ބަލައިގަނެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވީ ޖޫން 10 ގައެވެ.
އޭރު ސަރުކާރު މެންބަރުން ވެސް އެ ކަމަށް ތާއީދުކުރެއްވި ނަމަވެސް ކޮމިޓީގައި އެ ބިލު އޮތީ ތާށިވެފައެވެ.
ކޮމިޓީއަށް މި މައްސަލަ ފުރަތަމަ އެޖެންޑާކުރީ މި މަހު 12 ގައެވެ. އެ މައްސަލައިގައި ކޮމިޓީގައި ވާހަކަދައްކަވަމުން ދިއްގަރު ދާއިރާގެ މެންބަރުކަން ވެސް ކުރައްވާ ނާޒިމް ވަނީ ހުށަހެޅުމެއް ހުށަހަޅުއްވައިފައެވެ. އެ ގޮތުން، ކަމާ ގުޅުންހުރި ބޭފުޅުންގެ ބަސް ހޯދާއިރު ހަތަރު ކަމެއް ސާފުކުރަން އޭނާ ހުށަހެޅުއްވިއެވެ. އެއީ:
- އިސްލާހު މިހާރު އޮތް ގޮތަށް އިޒްރޭލު ޕާސްޕޯޓު އޮންނަ މީހުން އައުން މަނާކުރާނީތޯ ނުވަތަ ނޫންތޯ ސަބަބާއެކު
- އިޒްރޭލު ޕާސްޕޯޓު އޮތް މީހުންގެ ތެރެއިން އެހެން ގައުމެއްގެ ޕާސްޕޯޓު އޮތް މީހުން އިސްތިސްނާވާނެތޯ ނުވަތަ ނޫންތޯ ސަބަބާ އެކު
- އިޒްރޭލު ޕާސްޕޯޓު އޮންނަ މީހުންގެ ތެރެއިން އިސްތިސްނާވާނެ ފަރާތްތަކެއް ވާނަމަ އެ ފަރާތްތަކަކީ ކޮބައިތޯ
- އިގުތިސާދަށް ކުރާނެ އަސަރެއް ބެލުން
"އިމްޕެކްޓް އެސެސްމަންޓެއް އެކުލަވާލަންޖެހޭ. މަޖިލީހުން ނިންމާ ނިންމުން ވާންޖެހޭނީ ވަރަށް ހަރުދަނާ، އެނގިތިބެ ނިންމާ ނިންމުމަކަށް،" ނާޒިމް ވިދާޅުވިއެވެ.
ފާހަގަކޮށްލެވޭ ގޮތުގައި ކޮމިޓީގައި ވާހަކަދައްކަވަމުން ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހް ވެސް ވަނީ އިޒްރޭލު ޕާސްޕޯޓު މަނާކުރާއިރު ފަލަސްތީނާއި އަރަބި ގައުމުތަކުގެ ލަފާ ހޯދަންޖެހޭ ކަމަށް ވިދާޅުވެފައެވެ. އޭނާ ވެސް ވަނީ މި މައްސަލަ އަވަސް އަރުވާލައިގެން ނުނިންމޭނެ ކަމަށް ވިދާޅުވެފައެވެ.
އިޒްރޭލު ޕާސްޕޯޓު މަނާކުރުމުގެ މަސައްކަތް 241 ކޮމިޓީގައި ތާށިވެފައި އޮންނަތާ އެތައް ދުވަހެއް ވެއްޖެއެވެ. އެހެންވެ، އިޒްރޭލު ޕާސްޕޯޓު މަނާކުރުން ލަސްވާތީ އެމްޑީޕީން އަންނަނީ ތަކުރާރުކޮށް ކަންބޮޑުވުން ފާޅުކުރަމުންނެވެ.
އެކަމަކު، އިޒްރޭލު ޕާސްޕޯޓު މަނާކުރުމުގެ މަސައްކަތް ނުހުއްޓޭނެ ކަމަށާއި އެ މަސައްކަތް ވީހާ ވެސް އަވަހަށް ނިންމާނެ ކަމަށް ވެސް ޕީއެންސީން ވަނީ ބުނެފައެވެ.