ސިނގިރޭޓުން ނަގާ ޑިއުޓީ ބޮޑުކުރުމާ އެކު، ކުރިން އެއް ދުވަހުން ކާޓަންއެއް ވިކި ހުސްވި ނަމަވެސް މިހާރު ސިނގިރޭޓު ކާޓަންއެއް ވިކި ހުސްވާން ދެ ދުވަސް ނަގާ ކަމަށް ބައެއް ވިޔަފާރިވެރިން މިއަދު ބުނެފިއެވެ.
ދުންފަތުގެ އިސްތިޢުމާލު ކުރުމުން ދުރުހެލިވުމަށް ބާރު އެޅުމުގެ ގޮތުން, ސިނގިރޭޓާއި ބިޑިން ނަގާ އިމްޕޯޓު ޑިއުޓީ ގާތްގަނޑަކަށް ތިން ގުނަ ބޮޑުކުރަން ރައީސް ޑރ. މުޙައްމަދު މުއިއްޒު ވަނީ ނިންމަވައިފައެވެ. އެ ބަދަލު ގެނައުމަށް ރައްޔިތުންގެ މަޖިލީހަށް ހުށަހަޅައި ފާސްކުރި އެކްސްޕޯޓް އިމްޕޯޓްގެ ގާނޫނަށް 19 ވަނަ އިސްލާހު ގެނައުމުގެ ބިލު އެ މަނިކުފާނު ވަނީ މި މަހުގެ 13 ވަނަ ދުވަހު ތަސްދީގުކުރައްވައިފައެވެ.
އެ އިސްލާހާ އެކު ކުރިން ސިނގިރޭޓަކުން ނަގަމުން އައި ތިން ރުފިޔާ ވެސް އަށް ރުފިޔާއަށް ވަނީ ބޮޑުކޮށްފައެވެ.
"ސަން"އާ ވާހަދެއްކި ބައެއް ވިޔަފާރިވެރިން ބުނި ގޮތުގައި، މީގެ ކުރިން ދުވާލެއްގެ މައްޗަށް ސިނގިރޭޓު ކާޓަންއެއް ނުވަތަ ދެ ކާޓަންއެއް ވިކެއެވެ. ނަމަވެސް، މިހާރު ކާޓަންއެއް ވިކި ހުސްވާން ދެ ދުވަސް ނަގައެވެ.
މީހަކު ސިނގިރޭޓެއް ބޮނީ: މިހާރު ސިނގިރޭޓު ފޮއްޓެއް ވިއްކަނީ 230 އާއި 250 އާ ދެމެދުގެ އަގުތަކެއްގައި -- ސަން ފޮޓޯ/ ނާއިޝް ނާހިދު
މީގެ އިތުރުން، ސަރުކާރުން ގެނައި ބަދަލާ އެއްކޮށް، ސިނގިރޭޓު ފޮއްޓެއްގެ އަގު ވެސް ވަނީ އުފުލިފައެވެ. މިހާރު ސިނގިރޭޓު ފޮއްޓެއް ފިހާރަތަކުގައި ވިއްކަން ހުރީ 240 އާއި 290 ރުފިޔާއާ ދެމެދުގެ އަގުތަކެއްގައެވެ.
އަދި، ސިނގިރޭޓު ކާޓަންއެއްގެ އަގު ހުރީ 2،240 ރުފިޔާއާ ހަމައަށް އުފުލިފައެވެ.
އެކަމަކު، ދުންފަތުގެ އެހެން ބައެއް ބާވަތްތައް ހެޔޮ އަގުގައި މީހުން ގަންނަ ކަމަށް ބައެއް ވިޔަފާރިވެރިން ބުންޏެވެ. އެ ގޮތުން، ޕެކެޓުގައި ނުއޮޅާ ބަންދުކޮށްފައި ހުންނަ ދުންފަތް މީހުން ގިނައިން ގަންނަ ކަމަށް ބައެއް ވިޔަފާރިވެރިން ބުންޏެވެ.
ރައީސް ތަސްދީގުކުރެއްވި އިސްލާހުގައިވަނީ، ދުންފަތާއި ދުންފަތުން ތައްޔާރުކޮށްފައި ހުންނަ ބާވަތްތަކާއި ދުންފަތުގެ ބަދަލުގައި ބޭނުންކުރާ ބާވަތްތަކުން ނަގަމުން އަންނަ އިމްޕޯޓް ޑިއުޓީގެ މިންވަރު އިތުރުކުރުމެވެ.
ފާހަގަކޮށްލެވޭ ގޮތުގައި މި މަހު 15 އިން ފެށިގެން އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އެފަދަ އާލާތްތައް ރާއްޖެ އެތެރެކުރުން ވެސް ވަނީ މަނާކޮށްފައެވެ. އަންނަ މަހުގެ 15 އިން ފެށިގެން އެ ތަކެތި ބޭނުންކުރުމާއި ވިއްކުމާއި ހިލޭ ބެހުން ވެސް މުޅިން މަނާވާނެއެވެ.
ދުންފަތުގެ އިސްތިއުމާލު ކުރުމާއި ވޭޕު ކުރުމާއި އީ-ސިނގިރޭޓު ބުއިން މާނަކަން އަންގައިދޭން ހަރުކޮށްފައިވާ ނިޝާނެއް: ކުރިން އެއް ދުވަހުން ވިކި ހުސްވާ، ސިނގިރޭޓު ކާޓަންއެއް މިހާރު ވިކެނީ ދެ ދުވަހުން --- ފޮޓޯ/ގެޓީ އިމޭޖަސް
އިސްލާހުތަކާ އެކު ސިނގިރޭޓާއި ބިޑިން ނަގައި ޓެކުހުން ލިބޭ އާމްދަނީ ވަރަށް ބޮޑަށް އިތުރުވާނެ ކަމަށް ވަނީ ލަފާކޮށްފައެވެ. އެގޮތުން، އަންނަ އަހަރު އެކަނި ވެސް 1.05 ބިލިއަން ރުފިޔާ އާމްދަނީގެ ގޮތުގައި ދައުލަތަށް ލިބޭނެ ކަމަށް އަންދާޒާކޮށްފައިވެއެވެ.
ފާހަގަކޮށްލެވޭ ގޮތުގައި ސިނގިރޭޓު ވަކިން ވިއްކުން ވެސް އޮންނަނީ މަނާކޮށްފައެވެ.
އެކަމަކު، އަދިވެސް ވަރަށް ގިނަ ފިހާރަތަކުން ސިނގިރޭޓު ވަކިވަކިން ވިއްކައެވެ. އެކަން ހުއްޓުވާނެ ކަމަށް ސަރުކާރުން މީގެ ކުރިން ބުނެފައިވެއެވެ.