މެޓާގެ ދަށުން ހިންގާ މުވާޞަލާތީ އެޕްލިކޭޝަން ވަޓްސްއެޕްއިން ވޮއިސް މެސެޖުތައް އަމިއްލައަށް ލިޔުމަށް ބަދަލުކޮށްދޭ އާ ޚިދުމަތެއް ތަޢާރަފުކޮށްފިއެވެ.
މި އާ ޚިދުމަތަކީ ބައްދަލުވުންތަކުގައި އަޑުގެ މެސެޖު އަޑުގަދަނުކޮށް ބެލުމަށާއި، އެހެން މީހުންނާ އެކުގައި އަޑުގެ މެސެޖު އަޑުއެހުން ބޭނުންނުވާ ހާލަތްތަކުގައި ވަރަށް ބޭނުންތެރި ޚިދުމަތެކެވެ. މި ޚިދުމަތަކީ އަޑުގަދަ ތަންތަނުގައި ތިބޭއިރު އަދި އަޑުއިވުމުގެ ނުކުޅެދުންތެރިކަން ހުންނަ ފަރާތްތަކަށް ވެސް ވަރަށް ބޮޑަށް ފައިދާކުރާނެ ކަމެކެވެ.
ވަޓްސްއެޕްގެ މި އާ ޚިދުމަތް މި ވަގުތު ލިބެން ހުންނާނީ ހަތަރު ބަހަކުންނެވެ. އެއީ، އިނގިރޭސި، ޕޯޗުގީޒް، ސްޕެނިޝް އަދި ރަޝިއަން ބަހުންނެވެ. ނަމަވެސް، ކުރިއަށް އޮތް މަސްތަކުގައި އިތުރު ބަސްތައް މި ޚިދުމަތަށް އިތުރުކުރެވޭނެ ކަމަށް ވަޓްސްއެޕްއިން މަޢުލޫމާތު ދީފައިވެއެވެ.
އަޑުގެ މެސެޖު ޓެކްސްޓަށް ބަދަލުކުރެވެނީ ބޭނުންކުރާ މީހާގެ ފޯނުގައި ކަމަށާއި، މި ޚިދުމަތް ވަނީ އެންޑް-ޓު-އެންޑް އެންކްރިޕްޝަންއިން ރައްކާތެރިކުރެވިފައިކަން ވަޓްސްއެޕްއިން ފާހަގަކޮށްފައިވެއެވެ.
ވޮއިސްޓެކްސްޓަށް ބަދަލުކުރުމަށް އެކްޓިވޭޓްކޮށްލަން ޖެހޭނެ -- ފޮޓޯ/ އޭޕީ
މި އާ ޚިދުމަތް ބޭނުންކުރުމަށް އެންމެ ފުރަތަމަ އެ ފީޗާ އެކްޓިވޭޓް ކުރަންޖެހޭނެއެވެ. އެކްޓިވޭޓްކުރުމަށްޓަކައި ވަޓްސްއެޕް ސެޓިންގްސް ހުޅުވުމަށް ފަހު ޗެޓްސްއަށް ގޮސް، ވޮއިސް މެސެޖް ޓްރާންސްކްރިޕްޓްސް އޮން ކުރަންވާނެއެވެ. އޭގެ ފަހުން ބޭނުންވާ ބަސް ޚިޔާރުކުރެވިދާނެއެވެ.
އަޑުގެ މެސެޖެއް ޓެކްސްޓަށް ބަދަލުކުރަން ބޭނުންވާނަމަ، އެ މެސެޖަކަށް އިރުކޮޅެއް ވަންދެއް ފިތައިގެން ހުރުމަށް ފަހު 'ޓްރާންސްކްރައިބް؛އަށް ޓެޕްކުރަންވާނެއެވެ.
މި ޚިދުމަތަކީ ޑިފޯލްޓްކޮށް ކަނޑާލެވިފައި ހުންނަ ޚިދުމަތެއްކަމުން، ބޭނުންކުރުމުގެ ކުރިން އެކްޓިވޭޓްކުރަން ޖެހޭނެއެވެ.
ވަޓްސްއެޕްއިން ވަނީ މި ޚިދުމަތުގެ ރައްކާތެރިކަން ކަށަވަރުކޮށްދީފައެވެ. އެގޮތުން، އެއްވެސް ފަރާތަކަށް، އެ ކުންފުންޏަށް ވެސް، އަޑުގެ މެސެޖުތައް އަޑުއެހުމަށް ނުވަތަ ޓްރާންސްކްރިޕްޓް ބެލުމުގެ ފުރުސަތު ނުލިބޭނެ ކަމަށް ވަޓްސްއެޕްއިން ބުނެފައިވެއެވެ.