މއ. މަސްފަން ގެއަށް ދިވެހި ފިރިހެނަކު ވައްދައި އެ މީހާއަށް ވަޅިން ބިރުދައްކައި ބަރަހަނާކޮށް، ފޭރުނު މައްސަލައިގައި ހިމެނޭ ތިން މީހުން ވެސް އެއް އަހަރާއި ތިން މަސްދުވަހަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މިއީ މާލޭ މއ. މަސްފަންގައި ދިވެހި ފިރިހެނަކު ބަންދުކޮށް، އޭނާއަށް އަނިޔާކޮށް ބިރުދައްކައިގެން އޭނާގެ ކޭޝް ކާޑުން 25،000 ރުފިޔާ އަދި އިންޓަނެޓް ބޭންކިން މެދުވެރިކޮށް 20،000 ރުފިޔާ ފޭރިގަތުމުގެ މައްސަލައެވެ.
މި މައްސަލައިގައި މިދިޔަ ސެޕްޓެންބަރު ނުވައެއްގައި ދައުވާކޮށްފައިވަނީ މއ. މަސްފަން، އުމުރުން 43 އަހަރުގެ ޢާއިޝަތާއި، މއ. މަސްފަން، އުމުރުން 27 އަހަރުގެ މުޙައްމަދު ރީހާނުގެ އިތުރުން، ސ. ހިތަދޫ / ސޯމާ، އުމުރުން 35 އަހަރުގެ ޝަފީގު އިބްރާހީމްގެ މައްޗަށެވެ.
މި ތިން މީހުންގެ މައްޗަށް ތިން ދައުވާއެއްކޮށްފައިވެއެވެ. އެއީ އަނިޔާއެއް ދިނުމާއި، އެނގިހުރެ ހުއްދަނޫން ގޮތެއްގައި މަޢުލޫމާތު ހޯދުމުގެ ކުށުގެ އިތުރުން، ފޭރުމުގެ ކުށުގެ ދައުވާއެވެ.
އަނިޔާއެއް ދިނުމުގެ ކުށުގެ އަދަބަކީ ދެ މަހާއި 12 ދުވަހަށް ޖަލަށްލުމެވެ. ހުއްދަ ނޫން ގޮތެއްގައި މައުލޫމާތު ހޯދުމުގެ ކުށުގެ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ. އަދި ފޭރުމުގެ ކުށުގެ އަދަބަކީ ނުވަ މަހާއި 18 ދުވަހުގެ މުއްދަތަކަށް ޖަލަށްލުމެވެ.
އެހެން ކަމުން މި މައްސަލައިގައި ތިން މީހުންގެ މައްޗަށް ވެސް ކަނޑައެޅޭ އަދަބަކީ އެއް އަހަރާއި ތިން މަހަށް ޖަލަށްލުމެވެ.
މި ތިން މީހުން ވެސް ވަނީ ކޯޓުގައި ކުށަށް އިއުތިރާފުވެފައެވެ. އެއާއެކު އަދަބު ކަނޑައެޅުމުގެ އަސާސީ މިންގަނޑަށްވުރެ އެއް ދަރަޖަ ދަށްވާނެއެވެ.
މި މައްސަލައިގައި ހިމެނޭ ކުށަކީ ޖިނާއަތުގެ ފަސްވަނަ ދަރަޖައިގެ ކުށެކެވެ. އަދި މި މައްސަލައިގައި ފަރުވާލެއް ނެތި އަނިޔާވެރިކަމެއް ދައްކާފައިވާތީއާއި، އިންސާނެއްގެ ގަދަރާއި ކަރާމާތަށް ކަނޑައެޅިގެން ފަރުވާތެރިކަމެއް ބެހެއްޓުމަކާނުލައި އަމަލު ހިންގާފައިވާތީ، އެއް ދަރަޖަ މަތިވާނެ ކަމަށް ކޯޓުން ފާހަގަކޮށްފައިވެއެވެ.
މި މައްސަލައިގައި ހިމެނޭ ތިން މީހުން ވެސް ބަންދުގައި ހޭދަކުރި މުއްދަތުން ޖަލު އަދަބުގައި ހޭދަކުރަންޖެހޭ މުއްދަތު އުނިކުރުމަށް ފަހު ވަނީ ހުކުމްކޮށްފައެވެ.
މި ތިން ދައުވާގައި ހުކުމްކުރި ގޮތުން އާއިޝަތު ތަންފީޒުކުރަންޖެހޭ ޖަލު އަދަބުގެ މުއްދަތަކީ 10 މަހާއި ހަ ދުވަހެވެ. އަދި ރީހާންގެ 10 މަހާއި ފަސް ދުވަހުގެ ޖަލު އަދަބެއް ތަންފީޒުކުރަންޖެހޭއިރު، ޝަފީގު، އެއް އަހަރާ އެއް މަހާއި 12 ދުވަހުގެ ޖަލު އަދަބެއް ތަންފީޒުކުރަން ޖެހެއެވެ.