މިދިޔަ ޖުލައި މަހުގެ 24ވަނަ ދުވަހުގެ ވަގުތެއްގައި މއ.މަސްފަން ގެއަށް ދިވެހި ފިރިހެނަކު ވައްދައި އެ މީހާއަށް ވަޅިން ބިރުދައްކައި ބަރަހަނާކޮށް، ފޭރުނު މައްސަލައިގައި ތިން މީހެއްގެ މައްޗަށް ޕްރޮސެކިއުޓަ ޖެނެރަލް (ޕީޖީ)ގެ އޮފީހުން ދައުވާކޮށްފިއެވެ.
މި މައްސަލާގައި ތުހުމަތުކުރާ ދެ ފިރިހެނުންނާއި އަންހެން މީހާގެ މައްޗަށް ދައުވާކުރުމަށް ފުލުހުން ޕީޖީއަށް ފޮނުވީ މިދިޔަ މަހު ނުވަ ވަނަ ދުވަހުއެވެ.
ޕީޖީން ދައުވާކޮށްފައި ވަނީ:
- މއ. މަސްފަން، އުމުރުން 43 އަހަރުގެ ޢާއިޝަތު
- މއ. މަސްފަން، އުމުރުން 27 އަހަރުގެ މުޙައްމަދު ރީހާން
- ސ. ހިތަދޫ / ސޯމާ، އުމުރުން 35 އަހަރުގެ ޝަފީޤު އިބްރާހީމް
ޕީޖީ އޮފީހުން ބުނިގޮތުގައި ދިލްބަހާރުމަގު މއ. މަސްފަންގެ ކައިރީގައި ހުރި މީހަކަށް ގޮވައި އޭނާ އެ ގެއަށް ވައްދައި ވަޅިން ބިރު ދައްކައި، ބަރަހަނާކޮށް، އަނިޔާކޮށްފައިވާ ކަމަށެވެ. އަދި އޭނާގެ ފޯނު އަތުލައި އޭނާގެ އެކައުންޓުން ފައިސާ ޓްރާންސްފާކުރުމަށް ފަހު އޭނާގެ ކޭޝް ކާޑް ބޭނުންކޮށްގެން އޭޓީއެމްއިން ފައިސާ ނަގާފައިވާ ކަމަށް ވެސް އެ އޮފީހުން ބުންޏެވެ.
އަދި އެ މައްސަލައިގައި ދައުވާ ކުރުމަށް މިދިޔަ މަހުގެ 23 ގައި ކްރިމިނަލް ކޯޓަށް ހުށަހަޅާފައިވާ ކަމަށް ޕީޖީން ބުންޏެވެ.
އެ ތިން މީހުންގެ މައްޗަށް ތިން ދައުވާއެއް ކުރުމަށް ވަނީ ހުށަހަޅާފައެވެ. އެއީ:
-
ދިވެހިރާއްޖޭގެ ޤާނޫނުލްޢުޤޫބާތު ގެ 120 ވަނަ މާއްދާގެ ދަށުން - އަނިޔާއެއް ދިނުން
-
ދިވެހިރާއްޖޭގެ ޤާނޫނުލްޢުޤޫބާތު ގެ 232 ވަނަ މާއްދާގެ ދަށުން – އެނގިހުރެ ހުއްދަނޫން ގޮތެއްގައި މަޢުލޫމާތު ހޯދުން
-
ދިވެހިރާއްޖޭގެ ޤާނޫނުލްޢުޤޫބާތު ގެ 213 ވަނަ މާއްދާގެ ދަށުން - ފޭރުން
މި މައްސަލައާ ގުޅިގެން ފުލުހުން މީގެ ކުރިން ބުނީ ކޯޓުއަމުރެއްގެ ދަށުން އެ ތިން މީހުން ހައްޔަރުކޮށް، އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައި ވާކަމަށެވެ.