ވެރިކަން ކުރާ ޕީއެންސީގެ އެތެރޭގެ އިންތިޚާބުގެ ވޯޓުލުން ކުރިޔަށް ދަނިކޮށް ތ. ކަނޑޫދޫ ދާއިރާއަށް ވާދަކުރި ދެ ކެންޑިޑޭޓުންގެ ދެމެދުގައި ހަމަނުޖެހުމެއް ހިނގައި، ވޯޓު ފޮށި ފަޅާލައިފިއެވެ.
ސޯޝަލް މީޑިއާގައި ދައުރުވަމުން އަންނަ ވީޑިއޯއިން ފެންނަނީ މީހަކު ދުވެފައިގޮސް ވޯޓު ފޮށްޓާ އަރައިހަމަވުމާއެކު، އެހެން މީހަކު އައިސް އޭނާ ހިފަހައްޓަން މަސައްކަތްކުރާ މަންޒަރެވެ. އަދި އެ ދެ މީހުން ވެސް އޮޅުލައިގަނެގެން ގޮސް ބިންމައްޗަށް ވެއްޓޭ މަންޒަރު އެ ވީޑިއޯއިން ފެނެއެވެ.
މި ކަމާ ގުޅިގެން ކަނޑޫދޫ ކައުންސިލްގެ ރައީސް އަހުމަދު ރީހާން "ސަން"އަށް ވިދާޅުވީ މި ހަމަނުޖެހުން ހިނގި ސީދާ ވަގުތެއް ވިދާޅުވާން ދަތި ކަމަށެވެ. ނަމަވެސް މި ހަމަނުޖެހުން ހިނގީ، ވޯޓާސް ލިސްޓުގައި ނެތް ބަޔަކަށް ވޯޓުލުމުގެ ފުރުސަތު ދިންކަމުގެ ތުހުމަތާ އެކުގައި ކަމަށް އޭނާ ވިދާޅުވިއެވެ. ރީހާން ވިދާޅުވީ ހަމަނުޖެހުމުގެ ތެރެއިން ވޯޓު ފޮށި ފަޅާލި ނަމަވެސް، އިތުރަށް މައްސަލަ ގޯސްނުވާ ކަމަށެވެ.
ޕީއެންސީގެ އެތެރޭގެ އިންތިޚާބުގެ ވޯޓުލުން ކުރިޔަށް ގެންގޮސްފައިވަނީ މިއަދު ހެނދުނު 10:00އިން މެންދުރު ފަހު 14:00ގެ ނިޔަލަށެވެ.
ޖުމުލަ 1984 މަގާމަށް މީހުން އިންތިޚާބު ކުރުމަށް ހަމަޖެހިފައިވާ މި އިންތިޚާބުގައި 648 ކެންޑިޑޭޓުން ވާދަކުރެއެވެ. މީގެތެރެއިން 1300 މަގާމަށް އެންމެ ކެންޑިޑޭޓަކު ކުރިމަތިލާފައިވާތީ އެ 1300 މަގާމަށް ވަނީ އިންތިޚާބަކާ ނުލައި މީހުން ހޮވިފައެވެ.
މި އިންތިޚާބުގައި ވޯޓް ލުމުގެ ހައްގު ލިބިފައިވާ މީހުންގެ އަދަދު 33،500އަށް އަރައެވެ.