އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ހަނގުރާމައިގެ ޖަރީމާތަކެއް ހިންގުމުގެ ތުހުމަތުގައި ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓު (އައިސީސީ)ން އަމުރެއް ނެރެފިއެވެ.
އައިސީސީން ވަނީ ނަތަންޔާހޫގެ އިތުރަށް ކުރީގެ ދިފާއީ ވަޒީރު ޔޯއަވް ގަލަންޓް ހައްޔަރުކުރަން ވެސް އަމުރުނެރެފައެވެ.
އެ މީހުންގެ މައްޗަށް ކޮށްފައި ވަނީ މިދިޔަ އަހަރުގެ އޮކްޓޫބަރު ހަތް ވަނަ ދުވަހުން ފެށިގެން މި އަހަރުގެ މޭ މަހުގެ 20ގެ ނިޔަލަށް ހަނގުރާމައިގެ ޖަރީމާތައް ހިންގައިފައިވާ ކަމުގެ ތުހުމަތެވެ.
"ގަލަންޓާއި ނަތަންޔާހޫ ގަސްތުގައި އަދި އެނގިހުރެ ޣައްޒާގެ ރައްޔިތުންގެ ދިރިތިބުމަށް ކޮންމެހެން ބޭނުންވާ ތަކެތި، ކާނާއާއި ފެނާއި ބޭހާއި ސިއްހީ ސާމާނުގެ އިތުރުން ތެލާއި ކަރަންޓުން ވެސް މަހުރޫމްކުރި ކަމަށް ގަބޫލުކުރެވޭނެ އެކަށީގެންވާ ސަބަބުތައް އެބަހުރި،" އެ އަމުރުގައި ބުނެފައިވެއެވެ.
އެ ދެމީހުންގެ އިތުރުން، އިސްރާއީލާއި ފަލަސްތީނުގައި އިންސާނިއްޔަތާ ޚިލާފު ޖަރީމާތަކާއި ހަނގުރާމައިގެ ޖަރީމާތައް ހިންގާފައިވާ ކަމަށް ތުހުމަތު ކުރެވޭ ކަމަށް ބުނެ މުޙައްމަދު ޟައީފްގެ ނަމުން މަޝްހޫރު ހަމާސްގެ އަސްކަރީ ކޮމާންޑަރު މުހައްމަދު އަލް މަސްރީ ހައްޔަރު ކުރުމުގެ އަމުރެއް ވެސް ކޯޓުން ވަނީ ނެރެފައެވެ. އެގޮތުން އޭނާގެ މައްޗަށް ތުހުމަތުކޮށްފައި ވަނީ މީހުން މެރުމާއި އަނިޔާކުރުމާއި ރޭޕްކުރުމާއި އެހެނިހެން ޖިންސީ އަނިޔާތައް ފަދަ ކުށްތައް ކުރި ކަމުގެ ތުހުމަތެވެ.
އިސްރާއީލުން ބުނާ ގޮތުގައި ޟައީފް ވަނީ ގައްޒާގެ ދެކުނަށް ދިން ހަމަލާއެއްގައި މިދިޔަ ޖުލައި މަހު މަރާލާފައެވެ. ނަމަވެސް އައިސީސީއަކީ އޭނާ މަރުވިތޯ ނުވަތަ ދިރިހުރިތޯ ކަނޑައަޅާ ކޯޓެއް ނޫން ކަމަށްބުނެ އެ އަމުރު ކުރިއަށް ގެންދިއުމަށް ކޯޓުން ވަނީ ނިންމާފައެވެ.
ނަތަންޔާހޫ އާއި ގަލަންޓް ހައްޔަރުކުރުމުގެ އަމުރަކަށް މިދިޔަ މެއި މަހު އެދުނީ އައިސީސީގެ ޕްރޮސެކިޔުޓާ ކަރީމް ޚާން އެވެ. އެއީ ފަލަސްތީނުގައި މީހުން ބަނޑަށް ޖެއްސުމާއި، މެރުމާއި ނަސްލު ނައްތާލުމުގެ ޖަރީމާތަކާ ގުޅިގެންނެވެ.
ނަތަންޔާހޫ ވަނީ މި މަހުގެ ކުރީކޮޅު ގަލަންޓް ޑިފެންސް މިނިސްޓަރުކަމުގެ މަގާމުން ވަކިކޮށްފައެވެ.
އައިސީސީގެ މެންބަރު ގައުމުތަކުގެ އަދަދު 124އަށް އަރާއިރު، ހައްޔަރުކުރުމުގެ އަމުރު ރައްދުވާ ފަރާތަކު އޭގެތެރެއިން ގައުމަކަށް ޒިޔާރަތް ކުރުމުން ހައްޔަރުކުރަން ލާޒިމުވާނެއެވެ. ނަމަވެސް އެފަދަ އަމުރުތައް ތަންފީޒު ކުރުމުގެ ބާރު އައިސީސީއަކަށް ނޯވެއެވެ.
އެމެރިކާ އާއި އިސްރާއީލަކީވެސް އައިސީސީގެ މެންބަރުންނެއް ނޫނެވެ. ނަމަވެސް 2015 ވަނަ އަހަރު އައިސީސީން ވަނީ ފަލަސްތީނަކީ ވަކި ދައުލަތެއް ކަމަށް ބަލައިގެންފައެވެ.
އައިސީސީއަކީ ހަނގުރާމައިގެ ކުށްތަކާއި، އިންސާނިއްޔަތާ ޚިލާފު ކުށްތަކާއި، ގަތުލުއާންމުތަކުގެ މައްސަލަތައް ބަލާ ދުނިޔޭގެ އެންމެ މަތީ ކޯޓެވެ. އައިސީސީ އެކުލަވައިލީ 1998 ވަނަ އަހަރުއެވެ.
ނަތަންޔާހޫގެ އިރުޝާދުގެ ދަށުން އިސްރާއީލުން ޣައްޒާއަށް ދެމުންގެންދާ ލާއިންސާނީ ހަމަލާތަކުގައި މިހާތަނަށް ވަނީ 44،056 މީހުން ޝަހީދުކޮށްލާފައެވެ. ހަމަލާތަކުގައި ޒަޚަމްކޮށްލާފައިވާ މީހުންގެ އަދަދު ވަނީ 104،286 އަށް އުފުލިފައެވެ.