ފެނަކައިގެ މެނޭޖިން ޑިރެކްޓަރު މުއާޒު މުޙައްމަދު ރަޝީދު މިއަދު އިސްތިއުފާ ދެއްވައިފިއެވެ.
މުއާޒުވަނީ އޭނާގެ އިސްތިއުފާ ސިޓީ އެކްސްގައި ހިއްސާ ކުރައްވައިފައެވެ.
އެ ސިޓީގައި މުއާޒު ވިދާޅުވީ އޭނާ މަގާމާ ހަވާލުވެވަޑައިގެން ހުންނެވި އެއް އަހަރުގެ ތެރޭ ކުންފުނީގެ ހިންގަން ދިމާވި ގޮންޖެހުންތަކާއި ދަތިތަކާއެކުގައި ވެސް ރައްޔިތުންނަށް މެދުނުކެނޑި ޚިދުމަތް ފޯރުކޮށްދިނުމުގައި އެދެވޭ ނަތީޖާއެއް ހާސިލްކުރެވިފައިވާ ކަމަށެވެ.
ކުންފުނިތަކަކީ ލިބޭ އާމްދަނީއިން ހިންގަންޖެހޭ ތަންތަން ކަމަށްވީ ނަމަވެސް، ފެނަކައިގެ މާލީ ހާލަތު އޮތްގޮތުން އެ ކަން އެހެން ކުރުމަކީ ނުވާނެ ކަމެއްކަމަށް މުއާޒު ވިދާޅުވިއެވެ. އެއާއެކު މުއާޒުވަނީ އެެހެން އެ ކަން ދިމާވާން މެދުވެރިވި ސަބަބުތައް ހިއްސާކުރައްވައިފައެެވެ.
- ކުންފުންޏަށް ބޭނުންވާ އަދަދަށްވުރެ އެތައް ގުނައެއް އިތުރަށް ވަޒީފާ ހަމަޖައްސަން ޖެހުން
- ކުންފުނީގެ މުވައްޒަފުންގެ އަދަދު މަދުކޮށް، ކުންފުންޏަށް ކަތާވަރަށް ހިންގުން ބަދަލުކުރުމަށް އިދާރާތަކުން އެކަށީގެންވާ އެއްބާރުލުމެއް ނުލިބުން
- ލިބޭ އާމްދަނީއަށްވުރެ ކުރަންޖެހޭ ޚަރަދު އިންތިހާއަށް އިތުރުވުން
- ކުންފުނީގެ ޚިދުމަތް ފޯރުކޮށްދޭ ގިނަ ރަށްރަށުގެ ކަރަންޓާއި، ފެނާއި، ނަރުދަމާގެ ޚިދުމަތްތައް ފާއިތުވި އަހަރުތަކުގެ ތެރޭގައި އެކަށީގެންވާ ގޮތެއްގައި މެއިންޓެނެންސްކޮށް ނުބެލެހެއްޓުމުގެ ސަބަބުން ކުރިން އޮތް ބެކްލޮގް އެއްކޮށް ރަނގަޅު ކުރެވިފައި ނުވުން.
- ކުންފުންޏާ ހަވާލުވީއިރު ދަރަނީގެ ގޮތުގައި 4.3 ބިލިއަން ރުފިޔާ އޮތުން
އެއާއެކު މުއާޒު ވިދާޅުވީ އެއް އަހަރު ތެރޭ ކުންފުނީގެ ހިންގުން ހަރުދަނާކުރަން ގިނަ މަސައްކަަތްތަކެއް ކުރެވިފައިވާނެ ކަަމަށެވެ. އޭގެ ނަތީޖާއެއްގެ ގޮތުން މިދިޔަ އަހަރުގެ އޮކްޓޯބަރު މަހުން މި އަހަރުގެ އޮކްޓޯބަރު މަހުގެ ނިޔަލަށް 160 މިލިއަން ރުފިޔާއަށްވުރެ ބޮޑު އަދަދެއް ހިންގުމުގެ ޚަރަދުން ސަލާމަތްކޮށްފައިވާނެ ކަމަށް ފާހަގަކުރެއްވިއެވެ.
"ކުންފުނީގައި އުފެދިފައިވާ ދަރަންޏަށް ބަލާއިރު ހަމައެކަނި ހިންގުމުގެ ޚަރަދު ކުޑަކޮށްގެން މިހާރު ވެއްޓިފައިވާ ހާލަތުން ކުންފުނި ސަލާމަތް ނުކުރެވޭނެ ވާހަކަ މަނިކުފާނުގެ މައުލޫމާތަށް ޓަކައި ދަންނަވަމެވެ،" އެ ސިޓީގައި ވެއެވެ.
ފެނަކަ ސަލާމަތްކުރުމަށް ތައްޔާރުކޮށްފައިވާ ޕްލޭންތައް ކަމާގުޅޭ އިދާރާތަކާ ހިއްސާކުރި ނަމަވެސް މިއަދާ ހަމައަށް ވެސް އަލިމަގެއް ނުފެންނަ ކަމަށް އެ ސިޓީގައިވެއެވެ.
ހަމައެއާއެކު މި އަހަރުގެ އޮކްޓޯބަރު މަހާއި ނޮވެމްބަރު މަހުގެ މުސާރަ ވެސް، މަސް ފެށުނުއިރު ވެސް ޖަމާކޮށް ނުދެވުނު ކަމަށް ވަނީ ވިދާޅުވެފައެވެ. މީގެ އިތުރުން މާލީ ވުޒާރާގައި ވެސް އެތައް ފަހަރަކު ހައްލަކަށް އެދި ދެންނެވި ކަަމަށް މުއާޒު ވިދާޅުވިއެވެ.
އެއާއެކު މުއާޒު ވިދާޅުވީ، ކުންފުނީގެ ޚަރަދު ބޮޑުވެ، ދެމެހެއްޓެނިވި ގޮތެއްގައި އޮޕަރޭޝަން ފޯރުކޮށް ނުދެވޭނެ ހާލަތަކަށް ކުންފުނި ވެއްޓިފައިވާތީއާއި، އޭނާ ހުރެގެން އިތުރަށް އެ ކަން ރަނގަޅުކުރެވޭނެ މަގެއް ނުފެންނާތީ މަގާމުން އިސްތިއުފާ ދެއްވާކަމަށެވެ.
ފެނަކައިގެ ހާލަތު ގޯހުން ގޯހަށް މިސްރާބު ޖަހައިފައިވާފަދަ މޭރުމަކުން ވިދާޅުވެ، މުއާޒު އިސްތިއުފާ ދެއްވިއިރު، މި ކަންބޮޑުވުމަކީ މި ސަރުކާރުން ވެރިކަމާ ހަވާލުވީއިރު ވެސް ފާހަގަކުރި ކަމެކެވެ.
އެގޮތުން ކުރީގެ ރައީސް އަބްދުﷲ ޔާމީންގެ ވެރިކަމާއި، ކުރީގެ ރައީސް އިބްރާހިމް މުޙައްމަދު ޞާލިހުގެ ވެރިކަން ނިމުނުއިރު ވެސް ކުންފުނީގެ މުވައްޒަފުންގެ އަދަދު އެތައް ހާހަކުން އިތުރުވެފައިވެއެވެ.
ހަމައެއާއެކު ނިމިދިޔަ ވެރިކަމުގައި ވެސް ފެނަކައާ ގުޅޭ ކޮރަޕްޝަންގެ ގިނަ ތުހުމަތުތަކެއް ފެންމަތިވެފައިވެއެވެ.