ނިމިދިޔަ ސަރުކާރުގެ ގެދޮރުވެރިޔާ ސްކީމްގެ ދަށުން ފްލެޓްތައް ދިނުމަށް ލިސްޓު ހެދުމުގައި ވަރަށް ގިނަ ގޯސްތަކެއް ހުރިކަމަށް ގަބޫލު ކުރައްވާ ކަމަށާއި، ފްލެޓު ލިސްޓުގައި ހަދާފައި ހުރި ގޯސްތަކުގެ ދިރާސާ ރިޕޯޓެއް މި މަސް ނިމުމުގެ ކުރީން ނެރޭނެ ކަމަށް ހައުސިން މިނިސްޓަރު ޑރ. އަލީ ހައިދަރު އަޙްމަދު ވިދާޅުވެއްޖެއެވެ.
މި ސަރުކާރަށް އަހަރެއް ފުރުމާ ގުޅިގެން "ސަން"އަށް ދެއްވި ޚާއްސަ ބަސްދީގަތުމެއްގައި ހައިދަރު ވިދާޅުވީ މި ސަރުކާރުން ވެރިކަމަށް އައިއިރު ފަހިދިރިއުޅުން ކޯޕަރޭޝަން (އެފްޑީސީ)އިން އިމާރާތްކުރަމުންދާ 4000 ފްލެޓަށް ހޮވޭ ފަރާތްތަކުގެ ލިސްޓަށް ގިނަ އަދަދެެއްގެ ޝަކުވާތަކެއް އައުމުން އެންޓި ކޮރަޕްޝަން ކޮމިޝަން (އޭސީސީ)އިން ފުލެޓްތައް ދޫކުރުން ހުއްޓުވާފައި އޮތް ކަމަށެވެ.
އޭސީސީން މައްސަލަ ބެލުމަށް ފަހު، ބައެއް ކަންތައްތަކުގައި ގޮތް ނިންމުމަށް ފެބްރުއަރީ މަހު މިނިސްޓްރީއާ ހަވާލުކުރިކަން ހައިދަރު ފާހަގަކުރެއްވިއެވެ. އެގޮތުން 15 އަހަރު ދުވަހު މާލޭގައި ދިރިއުޅުނުކަން ސާބިތުކުރުމަށް މީހުން ހުށަހެޅި ލިޔުންތަކާ ބެހޭގޮތުން ގޮތެއް ނިންމުމަށް އެ ވުޒާރާއާ ހަވާލުކުރި ކަމަށް އޭނާ ވިދާޅުވިއެވެ.
"އިއުލާނުކޮށްފައި ގެޒެޓުކޮށްފައި އޮތް ލިޔުންތަކުގައި އޮންނަނީ ވަކި ކަހަލަ ލިޔުންތަކެއް ބަލައިގަންނާނެ ކަމަށް. ދެން އެޕްލިކޭޝަންގެ ސުންގަޑި ހަމަވިފަހުން އާ ލިޔުންތަކެއް ވެސް ބަލައިގަންނާނެ ކަމަށް ނިންމުމަކީ އޭސީސީން ދެކޭ ގޮތުގައި ވަކި ބަޔަކަށް ދިނުމަށް ނޫނީ އެކަހަލަ ކަމަކަށް މަގުފަހިވާ ކަމަކަށް ފާހަގަވޭ،" ހައިދަރު ވިދާޅުވިއެވެ.
ނަމަވެސް އޭނާ ވިދާޅުވީ މިނިސްޓްރީން އެ މަސައްކަތް ކުރުމަށް ވުރެ، މިނިވަން ކޮމިޓީއަކުން އެކަން ކުރުން ބުއްދިވެރި ކަމަށް ފެންނާތީ ރައީސް ޑރ. މުޙައްމަދު މުއިއްޒުގެ އިރުޝާދާ އެއްގޮތަށް ހަތް މެމްބަރުންގެ މިނިވަން ކޮމިޓީއަކުން ދިރާސާތައް ފެށީ ކަމަށެވެ.
ވަރަށް ގިނަ ފޯމުތަކަކާ އެއްޗެހި ބަލައިގެން ނޫނީ ނޭނގޭ ކިހިނެއް ކަމެއް މިކަން ކޮށްފައި އޮތީ. ކޮށްފައި އޮތީ ކޮން ގޮތަކަށް ކަން އަޅުގަނޑުމެން ތަންކޮޅެއް ފަހުން ތަފްސީލުކޮށް ދަންނަވާލާނަން ރައްޔިތުންނަށް. އެއީ އަޅުގަނޑު ދެކޭ ގޮތުގައި ހަމަ ވަރަށް ގިނަ ގޯސްތަކެއް ހެދިފަހުރި ކުރީގައި ލިސްޓު އާންމުކުރުމުގެ ތެރޭގައި. ހައުސިން މިނިސްޓަރު ޑރ. އަލީ ހައިދަރު އަޙްމަދު
ކުރީ ސަރުކާރުން ފެށި މަޝްރޫއުގައި ހިމެނޭ 4،000 ފުލެޓުގެ މަސައްކަތްތައް ފަހިދިރިއުޅުން ކޯޕަރޭޝަނުން އަންނަނީ މިހާރު ވެސް ކުރަމުންނެވެ. ނަމަވެސް ފުލެޓުތައް ދޫކުރުން ލަސްވާތީ ގިނަ ބަޔަކު އަންނަނީ ނުރުހުން ފާޅުކުރަމުންނެވެ.
މީގެ ކުރިން ހައުސިން މިނިސްޓްރީން ބުނީ އޮކްޓޯބަރު މަހު ފުލެޓު ލިސްޓު އާންމުކުރާނެ ކަމަށެވެ. އެއަށްފަހު މިމަހުގެ ފުރަތަމަ ދެ ހަފުތާ ތެރޭގައި ލިސްޓު ނެރޭނެ ކަމަށް ބުނުމަށް ފަހު، މިދިޔަ ހޮނިހިރު ދުވަހު މިނިސްޓްރީން ވަނީ ލިސްޓު މުރާޖާކޮށް ނުނިމޭތީ، ލިސްޓު ނެރުން މުއްދަތެއް ނެތް ގޮތަށް ފަސްކޮށްފައެވެ.
ރައީސް ޑރ. މުޙައްމަދު މުއިއްޒު ވަނީ އެ ލިސްޓަށް އެއްވެސް ނުފޫޒެއް ނުފޯރުވޭނެ ކަމަށާއި، ލިސްޓުގެ މަސައްކަތް ލަސްވަނީ ސައްހަކަން ޔަގީންކުރާތީ ކަމަށް ވިދާޅުވެފައެވެ.