މިދިޔަ ސަރުކާރުން އިއުލާނު ކުރި 4000 ފްލެޓު ލިސްޓަށް އެއްވެސް ނުފޫޒެއް ނުފޯރުވޭނެ ކަމަށާއި، ފްލެޓު ލިސްޓުގެ މަސައްކަތް ލަސްވަނީ ލިސްޓުގެ ސައްހަކަން ޔަގީންކުރާތީ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ، ސަރުކާރަށް އަހަރު ފުރުމާ ގުޅިގެން މިރޭ ކުރިޔަށް ގެންދާ "ހަފުތާ 52 ފާހަގަ ކުރުމުގެ ރަސްމިއްޔާތު"ގައި ވާހަކަފުޅު ދައްކަވަމުންނެވެ.
"އަޅުގަނޑު ދެންނެވީ ގެޒެޓުކޮށްފައި އޮތް އެއްވެސް ލިސްޓެއް އެއީ ގޯތިވިޔަސް ފްލެޓު ވިޔަސް އަތުލުމަކީ އަޅުގަނޑުގެ ސިޔާސަތެއް ނޫނޭ. އެހެން ނަމަވެސް، އަބަދު ވެސް ކަންކުރާ އުސޫލުން ގަވާއިދާ ޚިލާފަށް އޮޅުވައިލައިގެން މަކަރުހަދައިގެން ޑޮކިއުމަންޓްސްތައް ނުލާ އެކަން ކޮށްފައި އޮވެއްޖެއްޔާ އެމީހަކު އަތުން ކެންސަލް ވާނެއޭ އެއީ އެންމެ ކުރީއްސުރެ ވެސް އެކަން ކުރާގޮތޭ،" ރައީސް ވިދާޅުވިއެވެ.
ރައީސް ވިދާޅުވީ، ފްލެޓު ލިސްޓާ ގުޅިގެން އެންޓި ކޮރަޕްޝަން ކޮމިޝަން (އޭސީސީ)ން ބެލި ބެލުމުން އުސޫލާ ޚިލާފަށް ކޮށްފައި ހުރި ކަންކަން ފާހަގަވެފައި ވާކަމަށެވެ. އެގޮތުން މިދިޔަ ސަރުކާރުގައި ގެދޮރުވެރިން ކޮމިޓީގައި ހިމެނޭ ސިޔާސީ ފަރާތްތަކަށް ފްލެޓު ލިބޭގޮތަށް ޕޮއިންޓު އޮޅުވައިލާފައި ވާކަމަށެވެ.
އަދި އުސޫލާ ޚިލާފަށް ކުރީ ސަރުކާރުގެ އިސްވެރިންގެ އާއިލީ ފަރާތްތަކަށް ވެސް ފްލެޓު ދީފައި ވާކަމަށް ރައީސް ވިދާޅުވިއެވެ. އަދި އެއް އާއިލާއެއްގެ ގިނަ މީހުންނަށް ވެސް އުސޫލާ ޚިލާފަށް ފްލެޓު ދީފައި ވާކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ފްލެޓް ލިސްޓު އިއުލާނު ކުރާއިރު މިއީ ކޮން ބައެއްކަން ހާމަވާނެ ކަމަށެވެ.
"އަދަދުތަކަ އެއްކޮށް އަޅުގަނޑުމެން ލިސްޓު ނެރޭއިރުގައި ކޮންމެ މީހެއްގެ ނަން ކައިރީގައި އޮންނާނެ ތަފްސީލު. ވަރަށް ދެފުށް ފެންނަ ލިސްޓެއް ނެރޭނަށް އަޅުގަނޑުމެން. ކޮންމެ މީހެއްގެ ތަފްސީލު އަޅުގަނޑުމެން ހޮވުނު ގޮތް ވިޔަސް ނުހޮވުނު ގޮތް ވިޔަސް އޮންނާނެ،" ރައީސް ވިދާޅުވިއެވެ.
އުސޫލާ ޚިލާފަށް އެތަށް ކަމެއް ކޮށްފައިވާކަން ފާހަގަކުރައްވައި އެމަނިކުފާނު ވިދާޅުވީ، ފްލެޓު ލިސްޓަށް އެއްވެސް ނުފޫޒެއް ނުފޯރުވޭނެކަމަށެވެ. އަދި އެކަންކަން ބަލައި ނިމުނުހާ އަވަހަކަށް ލިސްޓު އާންމު ކުރާނެ ކަމަށް އެމަނިކުފާނު ވިދާޅުވިއެވެ.
"އަޅުގަނޑު މިހުރީ ﷲ ގަންދީއޭ ހުވާ ކޮށްގެން. ﷲ ހުރިހާ ކަމެއް ދެނެވޮޑިގެންވޭ. އަޅުގަނޑު ކުރާނީ ތެދުވެރިކަމާ އަމާނާތްތެރިކަމާ އެކު ހުރިހާ ކަމެއް ވެސް،" ރައީސް ވިދާޅުވިއެވެ.
އެމަނިކުފާނު ވިދާޅުވީ، ހުޅުމާލެ ދެވަނަ ފިޔަވަހިން ވެސް މިހާރު ގޯތިތަށް ދޫކޮށްފަިއ ވަކަމަށެވެ. އަދި ދެން ވެސް ގޯތި ދޫކުރަން ހުރި ތަންތަން ހިއްކައި ނިމުމުން އެ ގޯތިތައް ވެސް ދޫކުރާނެ ކަމަށް އެމަނިކުފާނު ވިދާޅުވިއެވެ.
ކުރީ ސަރުކާރުން ކުރިއަށްގެންދިޔަ ގެދޮރުވެރިޔާ މަޝްރޫއުގެ ދަށުން ފުރަތަމަ 4،000 ފުލެޓު ލިބޭ މީހުންގެ ވަގުތީ ލިސްޓެއް ކުރިން އޮތީ އާންމުކޮށްފައެވެ. މިހާރު ވެސް ފަހިދިރިއުޅުން ކޯޕަރޭޝަނުން އަންނަނީ ފްލެޓްތައް ތަރައްގީކުރުމުގެ މަސައްކަތް ކުރަމުންނެވެ.
ނިމުން ފުލެޓުތައް ދޫކުރުމުގެ މަސައްކަތް ލަސްވާތީ ގިނަ ބަޔަކު އަންނަނީ ނުރުހުން ފާޅުކުރަމުން އަންނައިރު އެކަމަށް އެކި އިހުތިޖާޖުތައް ވެސް އަންނަނީ ބާއްވަމުންނެވެ.
ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އެންޓި އޭސީސީން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު ފެބްރުއަރީ މަހު އޭސީސީން ވަނީ ބައެއް ކަންތައްތަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.
ނަމަވެސް އޭގެ ފަހުން ހަތް ވަރަކަށް މަސްވީއިރު އަދިވެސް ހައުސިން މިނިސްޓްރީން ގެންދަނީ އެ ލިސްޓު ރިވިއުކުރަމުންނެވެ. މީގެ ކުރިން އެ މިނިސްޓްރީން ބުނީ އޮކްޓޯބަރު މަހު ފުލެޓު ލިސްޓު އާންމުކުރާނެ ކަމަށެވެ.
ނަމަވެސް މިހާރު އެ މިނިސްޓްރީން ބުނި ގޮތުގައި ރައީސް އެކުލަވައިލެއްވި ހައުސިން އެޑްވައިޒަރީ ކޮމިޓީއާއި، މާލޭ ސިޓީ ކައުންސިލުގެ ހައުސިން ކޮންސަލްޓޭޓިވް ކޮމިޓީއަށް ވެސް ލިސްޓުތަކުގައި މައްސަލަ އުޅޭކަމަށް ފެންނާތީ، ހުރިހާ އެޕްލިކޭޝަން ފޯމުުތައް އަންނަނީ އަލުން ބަލަމުންނެވެ.
އެކަމަށް އިތުރު ވަގުތު ބޭނުންވާ ކަމަށާއި އެހެންކަމުން ދެން ފްލެޓް ލިބޭ މީހުންގެ ވަގުތީ ލިސްޓު އާންމުކުރެވޭތޯ މަސައްކަތް ކުރަމުން އަންނަނީ މި ފެށޭ މަހުގެ ދެވަނަ ހަފުތާގެ ނިޔަލަށްކަމަށް މިނިސްޓްރީން މީގެ ކުރިން ބުންޏެވެ.