މިދިޔަ ސަރުކާރުގެ ގެދޮރުވެރިޔާ ސްކީމުން ގޯތިދިނުމަށް ނިންމައި، އާންމުކުރި ލިސްޓުގައި ހިމެނޭ މީހުންގެ ފޯމުތައް އިވެލުއޭޓް ކުރުމުގައި މާލެ ސިޓީ ކައުންސިލް ބައިވެރި ނުކުރާތީ، ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިހު ކަންބޮޑުވުން ފާޅުކުރައްވައިފިއެވެ.
މާލޭގެ ރައްޔިތުންނަށް ފްލެޓު ދިނުމުގައި، އެ ރައްޔިތުންގެ ފަރާތުން ހޮވާފައި ތިބި ކައުންސިލަރުންގެ ބައިވެރިވުން އޮންނަން ޖެހޭނެ ކަމަށް ރައީސް ޑރ. މުހައްމަދު މުއިއްޒު މީގެ ކުރިން އޮތީ ވިދާޅުވެފައެވެ. އަދި އެ މަސައްކަތުގައި ހައުސިން މިނިސްޓްރީއާއެކު މަސައްކަތް ކުރުމަށް މާލެ ސިޓީ ކައުންސިލްގެ ކޮމިޓީއެއް އެކުލަވައިލަން ވެސް އެ މަނިކުފާނު ނިންމަވާފައިވެއެވެ.
ގެދޮރުވެރިޔާ ސްކީމަށް ކުރިމަތިލީ 20،000 މީހުންގެ ފޯމުތަކުގެ ބަދަލުގައި މިދިޔަ ސަރުކާރުން އިއުލާނުކުރި 4000 މީހުންގެ ފުލެޓު ލިސްޓު އެކަނި ވެރިފައިކުރުމުގެ މަސައްކަތް ކުރަން ނިންމިކަން ސަރުކާރުން އިއުލާންކުރީ އިއްޔެވެ. އެހެން ނަމަވެސް އެއީ މާލެ ސިޓީ ކައުންސިލްގެ ބައިވެރިވުމެއް ނެތިއެވެ.
މާލެ ސިޓީ ކައުންސިލުން މިއަދު ބޭއްވި ޖަލްސާގައި، ސަރުކާރުގެ މި ނިންމުމާ ގުޅިގެން ސައިފްވަނީ ބައެއް ކަންކަން ފާހަގަ ކުރައްވާފައެވެ.
ރައީސް ވިދާޅުވި ގޮތަށް، ކައުންސިލަރުންގެ ކޮމިޓީއަށް ފޯމު އިވެލުއޭޓް ކުރުމުގެ މަސައްކަތުގައި ބައިވެރިވުމުގެ ފުރުސަތު ނުދީ އޮތުމުން، އޭނާވަނީ އެ ކަމާ ކަންބޮޑުވުން ފާޅު ކުރައްވައިފައެވެ. އޭނާ ވިދާޅުވި ގޮތުގައި އިވެލުއޭޝަން މަރުހަލާގެ ސައްހަކަން ކަށަވަރު ކުރުމަށް ޓަކައި ކައުންސިލަރުންގެ ކޮމީޓީ އެ މަސައްކަތުގައި ބައިވެރި ކުރުވުމަށް ހައުސިން މިނިސްޓްރީން ދަނީ ދެކޮޅު ހަދަމުންނެވެ.
އަލުން އިވެލުއޭޓް ކުރަނީ 4،000 ފޯމު އެކަނި ކަމަށް ސަރުކާރުން ބުނުމަކީ ދެކޮޅުޖެހޭ ކަމެއް ނޫން ކަމަށް ވެސް ސައިފް ވަނީ ވިދާޅުވެފައެވެ. އެއީ އިވެލުއޭޝަން މަރުހަލާގައި އެޕްލިކަންޓެއްގެ ޝަރުތު ހަމަނުވާ ހާލަތުގައި، އޭނާގެ ބަދަލުގައި ދެން ފްލެޓު ލިބޭނެ ފަރާތެއް ކަނޑައެޅެން އޮންނާނީ، ބާކީ ހުރި ހުރިހާ ފޯމެއް އަލުން ބަލައިގެންކަން ސައިފް ފާހަގަ ކުރެއްވިއެވެ.
"އަލުން ބަލާއިރު އެއިން އެޕްލިކަންޓަކު ޝަރުތު ހަމަނުވާކަމަށް ފެނިއްޖެ ޙާލަތުގައި، އޭނާގެ ބަދަލުގައި ދެން ފްލެޓް ލިބޭނެ ފަރާތެއް ބަކީ ހުރި ހުރިހާ ފޯމެއް އަލުން ނުބަލާ ކަނޑައެޅޭނެކަމަކަށް ނުފެނޭ" ސައިފް ވިދާޅުވިއެވެ.
ގެދޮރުވެރިޔާ ސްކީމްގެ ދަށުން ފުލެޓު ލިބޭ މީހުންގެ ލިސްޓު ކުރިން އާންމުކުރި ނަމަވެސް، އެ ލިސްޓުގައި ބޮޑެތި ގޯސްތަކެއް އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ކުރިން އެކަން ހުއްޓުވިއެވެ.
އަދި އޭސީސީން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު ފެބްރުއަރީ މަހު އޭސީސީން ވަނީ ބައެއް ކަންތައްތަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.
އެފްޑީސީން ހުޅުމާލޭގައި އިމާރާތްކުރާ 4،000 ފުލެޓް ލިބޭ މީހުންގެ ލިސްޓު އާންމު ކުރުމުން ގިނަ ބަޔަކު ޝަކުވާ ހުށަހެޅިއެވެ. އެގޮތުން، އެ މައްސަލައިގައި އޭސީސީއަށް 325 ޝަކުވާއެއް ވަނީ ހުށަހަޅައިފައެވެ. އެއަށް ފަހު އޭސީސީން ފެށި ޖިނާއީ ތަހުގީގަށް ފަހު އެ ކޮމިޝަނުން ބުނީ، 4،000 ފުލެޓު ލިބުނު މީހުންގެ ތެރެއިން 59.6 އިންސައްތަ މީހުންގެ ޝަރުތު ހަމަނުވާ ކަމަށެވެ.
ފާހަގަކޮށްލެވޭ ގޮތުގައި ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއުތައް ކަމަށްވާ "ބިންވެރިޔާ" އަދި "ގެދޮރުވެރިޔާ" ސްކީމުގެ ދަށުން ދޫކުރާ ފުލެޓާއި ގޯތި ލިބުން ލަސްވާތީ މާލޭގެ ރައްޔިތުން ވަނީ މި ފަހުން މުޒާހަރާ ވެސް ކޮށްފައެވެ.