ހުޅުމާލޭގައި ކާރެއްގެ ތެރޭ މީހަކު ރަހީނުކުރި މައްސަލައިގައި ހައްޔަރުކުރި ފަސް މީހުން ބަންދުން ދޫކޮށްލައިފިއެވެ.
ކާރެއް ތެރޭ ދިވެހި ފިރިހެނަކު ރަހީނުކޮށް، އަނިޔާކުރި މައްސަލައެއް ރިޕޯޓުކޮށްފައި ވަނީ މިމަހުގެ 11ގައެވެ.
އެ މައްސަލައިގައި، ހާދިސާ ހިނގި ސަރަހައްދުން ފަސް މީހަކު ހައްޔަރުކުރި ކަމަށް ފުލުހުން ބުންޏެވެ. އެއީ:
- ހދ. ކުމުންދޫ، ރަތްބަގީޗާގެ، ހުސާމް އިބްރާހީމް (34އ)
- ގ. ކަޅަގާރިމާގެ، ހުސައިން ހައިކަލް ނިޔާޒު (23އ)
- ހދ. ކުމުންދޫ، ރަތްބަގީޗާގެ، އާދަމް ޝަރީފް (36އ)
- ހުޅުމާލެ ފްލެޓް ނަމްބަރު 71-1-04، އަހުމަދު ރިޝްފާން (26އ)
- މާލޭ، ދަފްތަރު ރސ،9022 ތޮލާލް މޫސާ (37އ)
މިމަހުގެ 12ގައި ފުލުހުން ބުނީ އެ ފަސް މީހުންގެ ބަންދާ މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން އެންމެން ވެސް ހަތް ދުވަހަށް ބަންދުގައި ބޭތިއްބުމަށް އެ ކޯޓުން އަމުރުކޮށްފައިވާ ކަމަށެވެ.
ހުޅުމާލޭގައި ކާރެއްގެ ތެރޭ މީހަކު ރަހީނުކުރި މައްސަލައިގައި ހައްޔަރުކުރި މީހެއް ---
އެ ހަތް ދުވަސް ހަމަވުމުން މިއަދު އަލުން ކޯޓަށް ހާޒިރުކުރުމުން އެ މީހުން އިތުރަށް ބަންދުގައި ބޭތިއްބުމަށް ނުފެންނާތީ, އެންމެން ވެސް ދޫކޮށްލައިފައިވާ ކަމަށް ފުލުހުން ބުންޏެވެ.
އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.
މިފަހުން މީހުން ރަހީނުކޮށް، ފައިސާ ފޭރުމުގެ މައްސަލަތައް ރިޕޯޓުކުރާ މިންވަރު އިތުރުވެފައިވެއެވެ. އެގޮތުން ހިޔާ ފުލެޓެއްގައި މީހަކު ރަހީނުކޮށް، އަނިޔާކުރި މައްސަލައެއް ވެސް ވެސް ފެންމަތިވެ އެ މައްސަލައިގައި 12 މީހަކު ހައްޔަރުކޮށްފައިވެއެވެ.