މިމަހުގެ ހަތް ވަނަ ދުވަހު ހުޅުމާލޭ ދެވަނަ ފިޔަވަހީގެ ހިޔާ ފުލެޓެއްގައި މީހަކު ރަހީނުކުރި މައްސަލައިގައި ހައްޔަރުކުރި 12 މީހުންގެ ތެރެއިން އަށް މީހަކު ތަހުގީގު ނިމެންދެން ބަންދުކޮށްފިއެވެ.
އެ މައްސަލައިގައި ހައްޔަރުކުރި މީހުންގެ ތެރެއިން ތިން މީހަކަށް ކްރިމިނަލް ކޯޓުން ފުރަތަމަ ފަސް ދުވަސް ޖަހައި ބާކީ މީހުންނަށް ހަތް ދުވަސް ޖެހިއެވެ.
މިއަދު ފުލުހުން ބުނީ އެ މީހުންގެ ބަންދުގެ މުއްދަތު ނިމުމުން އަލުން ކޯޓަށް ހާޒިރުކުރުމުން އޭގެ ތެރެއިން ށ. ފޯކައިދޫ/ ދަންމަރު، އަހުމަދު ޒާހިދު، 36އ، ފަސް ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ. އަދި ގދ. ވާދޫ/ ވެހި، އަލްމާން އަލީ ޚާލިދު، 22އ، މ. ހަތިކަނޑު، މުޙައްމަދު އިޒްކާން، 18އ، އަދި ކ. ގުރައިދޫ/ ޒުނައިޓްވިލާ އިޒާން އަހުމަދު، 18އ، އަށް ދުވަހަށް ބަންދުކުރަން އެންގި ކަމަށް ވެސް ފުލުހުން ބުންޏެވެ.
"ދެން ތިބި އެންމެން ވެސް ތަހުގީގު މަރުހަލާ ނިމެންދެން ބަންދުކުރުމަށް ވަނީ އަމުރުކޮށްފައި،" ފުލުހުން ބުންޏެވެ.
އެ މައްސަލައިގައި ދެން ހައްޔަރުކުރީ:
- އަހުމަދު ޒާހިދު، 36އ، ށ. ފޯކައިދޫ/ ދަންމަރު
- އާދަމް ހުސައިން، 48އ، ލ. މާވަށް/ ޖަމީލާ މަންޒިލް
- އިބްރާހީމް ނަޝީދު، 34އ، ލ. އިސްދޫ/ ހިޔާލީގުލްޝަން
- އަހުމަދު ސަމީހު، 22އ، ބ. ގޮއިދޫ/ ނައިޓްސްޓާ
- އިސްމާއީލް ވިޝާމް މުހައްމަދު، 29އ، ވ. ގާމާ
- ވިޝަމް މުހައްމަދު، 23އ، ގދ. ވާދޫ، ޗިޗަންޑާގެ
- ވިސާން މުހައްމަދު، 30އ، ހުޅުމާލެ ހިޔާ 3-17-14
- މުސްތާގު ޝާކިރު، 37އ، ގދ. ވާދޫ، ޖަނަވަރީގެ
- ހަސަން ގާލިބް، 38އ، މ. ކޮޅުފުށި، އާރެސް
އޭގެ ތެރެއިން އާދަމް ހުސައިން، 48އ، އަކީ އެ އެޕާޓްމެންޓުގެ ވެރިފަރާތް ކަމަށް ފުލުހުން ވަނީ ބުނެފައެވެ. އަދި އޭނާ މަސްތުވާތަކެއްޗަށް ޓެސްޓުކުރިއިރު ޕޮޒިޓިވްވެފައިވާކަން ވެސް ފުލުހުން ހާމަކޮށްފައިވެއެވެ.
ފުލުހުން ބުނެފައިވަނީ، އެ އެޕާޓްމެންޓަކީ މަސްތުވާތަކެތި ބޭނުންކޮށް ވިޔަފާރި ކުރާ ތަނެއްކަން ފާހަގަކުރެވި މީގެ ކުރިން ބަލައި ފާސްކޮށްފައި ހުރި ތަނެއް ކަމަށެވެ. އަދި ހުޅުމާލޭ މެޖިސްޓްރޭޓް ކޯޓުގެ އަމުރެއްގެ ދަށުން އެޕާޓްމެންޓް ބަލައި ފާސްކުރިއިރު މަސްތުވާތަކެތި ކަމަށް ލަފާކުރެވޭ ތަކެތި އަޅައިފައިވާ ޕެކެޓުތަކާއި ބިޔަރު ދަޅުތައް އެޕާޓްމެންޓުން ފެނުނު ކަމަށް ފުލުހުން ބުނެފައިވެއެވެ.