މިދިޔަ ބުރާސްފަތި ދުވަހު ހުޅުމާލޭ ދެވަނަ ފިޔަވަހީގެ ހިޔާ ފުލެޓެއްގައި މީހަކު ރަހީނުކުރި މައްސަލައިގައި ހައްޔަރުކުރި 12 މީހުންގެ ތެރޭގައި އެ ފުލެޓުގެ ވެރިފަރާތް ވެސް ހިމެނޭ ކަމަށް ފުލުހުން މިއަދު ބުނެފިއެވެ.
ފުލުހުން ތަހުގީގު ކުރަމުންދާ ބައެއް މައްސަލަތަކާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް އޮފް ޕޮލިސް އަހުމަދު ސާމީ ވިދާޅުވީ އެ މައްސަލައިގެ މައުލޫމާތު ފުލުހުންނަށް ލިބުމާއެކު ފުލުހުން ހަރަކާތްތެރިވެ، އެ ހާދިސާ ހިނގި ނުވަ ވަނަ ޓަވަރުގެ ސީސީޓީވީ ފުޓެޖު ބަލައިގެންނާއެކު އެޕާޓްމެންޓު ހޯދި ކަމަށެވެ.
އެ އެޕާޓްމެންޓަށް ފުލުހުން ވަދެ ބެލިއިރު، ބެލްކަނީ ކައިރީ ބިންމަތީގައި އަނިޔާ ލިބުނު މީހުން އިން ކަމަށާއި އޭނާގެ ބޯ ބާލައިފައި ހުރި ކަމާއި، އިސްތަށިތައް ބިންމަތީގައި ހުރި މަންޒަރު ފެނުނު ކަމަށް ސާމީ ވިދާޅުވިއެވެ.
އެ މައްސަލައިގެ އިތުރު ތަފުސީލު ދެއްވަމުން، ފުލުހުންގެ ސީރިއަސް އެންޑް ހައި އިމްޕެކްޓް ކްރައިމްގައި އިސްކޮށް ހުންނަވާ އަލީ އިސްމާއިލް ވިދާޅުވީ އަނިޔާ ލިބުނު މީހާ އެތަނަށް ގެންދިޔައީ ފައިސާގެ މައްސަލައެއްގައި ބިރުދައްކައިގެން ކަމަށެވެ.
"ފުލުހުންނަށް އެ އެޕާޓްމެންޓަށް އެ ގަޑީގައި އާދެވުނީ އޭނާގެ އިނގިލިތައް ބުރިކުރާނެ ކަމަށް ބުނެ އިންޒާރެއް ދީފައި ވަނިކޮށް ކަމަށް ވިކްޓިމް ބުނެފައިވަނީ،" އޭނާ ވިދާޅުވިއެވެ.
އަލީ އިސްމާއިލް ވިދާޅުވީ އެ އެޕާޓްމެންޓަކީ މަސްތުވާތަކެތި ބޭނުންކޮށް ވިޔަފާރި ކުރާ ތަނެއްކަން ފާހަގަކުރެވި މީގެ ކުރިން ބަލައި ފާސްކޮށްފައި ހުރި ތަނެއް ކަމަށެވެ. އަދި ހުޅުމާލޭ މެޖިސްޓްރޭޓް ކޯޓުގެ އަމުރެއްގެ ދަށުން އެޕާޓްމެންޓް ބަލައި ފާސްކުރިއިރު މަސްތުވާތަކެތި ކަމަށް ލަފާކުރެވޭ ތަކެތި އަޅައިފައިވާ ޕެކެޓުތަކާއި ބިޔަރު ދަޅުތައް ފެނުނު ކަމަށް އޭނާ ވިދާޅުވިއެވެ.
އެ މައްސަލައިގައި ފުލުހުން ވަނީ 12 މީހަކު ހައްޔަރުކޮށް އެ މީހުންގެ ވަނަވަރު ވެސް ހާމަކޮށްފައެވެ.
އަލީ އިސްމާއިލް ވިދާޅުވީ ހައްޔަރުކުރި މީހުންގެ ތެރޭގައި ހިމެނޭ ލ. މާވަށް/ ޖަމީލާ މަންޒިލް، އާދަމް ހުސައިން، 48އ، އަކީ އެ އެޕާޓްމެންޓުގެ ވެރިފަރާތް ކަމަށެވެ. އަދި އޭނާ މަސްތުވާތަކެއްޗަށް ޓެސްޓުކުރިއިރު ޕޮޒިޓިވްވެފައިވާކަން ވެސް އޭނާ ފާހަގަކުރެއްވިއެވެ.
އެ މައްސަލައިގައި ހައްޔަރުކުރި މީހުންނަކީ:
- އަލްމާން އަލީ ޚާލިދު، 22އ، ގދ. ވާދޫ/ ވެހި
- މުޙައްމަދު އިޒްކާން، 18އ، މ. ހަތިކަނޑު
- އިޒާން އަހުމަދު، 18އ، ކ. ގުރައިދޫ/ ޒުނައިޓްވިލާ
އެ ތިން މީހުން ފަސް ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފައިވާ ކަމަށް މިދިޔަ ހޮނިހިރު ދުވަހު ފުލުހުން ވަނީ ބުނެފައެވެ. އާދަމް ހުސައިން ހިމެނޭ ގޮތަށް، ބާކީ ނުވަ މީހުންނަށް ކޯޓުން ޖެހީ ހަތް ދުވަހެވެ. އެއީ:
- އަހުމަދު ޒާހިދު، 36އ، ށ. ފޯކައިދޫ/ ދަންމަރު
- އާދަމް ހުސައިން، 48އ، ލ. މާވަށް/ ޖަމީލާ މަންޒިލް
- އިބްރާހީމް ނަޝީދު، 34އ، ލ. އިސްދޫ/ ހިޔާލީގުލްޝަން
- އަހުމަދު ސަމީހު، 22އ، ބ. ގޮއިދޫ/ ނައިޓްސްޓާ
- އިސްމާއީލް ވިޝާމް މުހައްމަދު، 29އ، ވ. ގާމާ
- ވިޝަމް މުހައްމަދު، 23އ، ގދ. ވާދޫ، ޗިޗަންޑާގެ
- ވިސާން މުހައްމަދު، 30އ، ހުޅުމާލެ ހިޔާ 3-17-14
- މުސްތާގު ޝާކިރު، 37އ، ގދ. ވާދޫ، ޖަނަވަރީގެ
- ހަސަން ގާލިބް، 38އ، މ. ކޮޅުފުށި، އާރެސް
އެ މީހާ ސަލާމަތް ކުރުމަށް ކުރިއަށްގެންދިޔަ އޮޕަރޭޝަން ބައްލަވައިލެއްވުމަށް ހޯމް މިނިސްޓަރު އަލީ އިހުސާން ވެސް ވަޑައިގަތެވެ.
އެ މައްސަލައާ ގުޅޭ ގޮތުން އިހުސާން ވިދާޅުވީ ބައެއް ފުލެޓުތަކާއި އެ ނޫންވެސް ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ބޭނުންކުރާކަން ފާހަގަވާ ކަމަށާއި، އެފަދަ ތަންތަން ގާނޫނަށް ބަދަލު ގެނެސްގެން ނަމަވެސް ދައުލަތަށް ނެގޭނެ ގޮތެއް ހަމަޖައްސަވާނެ ކަމަށެވެ.
ހިޔާ ފުލެޓުތަކަށް މީހުން އޮޅުވާލައިގެން ގެންގޮސް، ބިރުދައްކައި، ރަހީނުކޮށްގެން ފައިސާ ހޯދުމުގެ މައްސަލަތަކެއް މީގެ ކުރިން ވެސް ފެންމަތިވެފައިވެއެވެ.