އިދިކޮޅު އެންމެ ބޮޑު ޕާޓީ، އެމްޑީޕީން 2028 ވަނަ އަހަރުގެ ރިޔާސީ އިންތިޚާބުގައި ވާދަކުރައްވަން ފަސް ބޭފުޅަކު މިހާރުވެސް ޝައުގުވެރިކަން ފާޅުކުރައްވާ ކަމަށް ކުރީގެ ރައީސް އިބްރާހީމް މުހައްމަދު ޞާލިޙު މިއަދު ވިދާޅުވެއްޖެއެވެ.
ރާއްޖެ ޓީވީގެ 'ފަށާއިރު' ޕްރޮގްރާމްގައި 2028 ވަނަ އަހަރުގެ ރިޔާސީ އިންތިޚާބުގައި އެމަނިކުފާނު ވާދަކުރައްވަންތޯ ވަނީ ސުވާލު ކުރިމަތިކުރުވާފައެވެ. އެ ސުވާލަށް ސާފު ޖަވާބެއް ނުދެއްވި ނަމަވެސް ޞާލިޙު ވިދާޅުވީ އެމަނިކުފާނުގެ ސިޔާސީ ހަޔާތާއި ކުރިމަގާ ބެހޭގޮތުން ޕާޓީގެ އިސްވެރިންނާ ވާހަކަދައްކަވާފައި ވާނެ ކަމަށެވެ. އަދި އެމަނިކުފާނުގެ ނިންމުން އެއްވެސް ޝައްކެއް ނެތް މިންވަރަށް މިހާރު ޕާޓީގެ ލީޑާޝިޕަށް އެނގިވަޑައިގަންނަވާނެ ކަމަށް ވެސް އެމަނިކުފާނު ވިދާޅުވިއެވެ.
އެމްޑީޕީގެ ލީޑާޝިޕްގެ އިސްވެރިންގެ ތެރޭގައި ފަސް ބޭފުޅަކު ރިޔާސީ އިންތިޚާބުގައި ވާދަކުރައްވަން ޝައުގުވެރިކަން ފާޅުކުރައްވާ ކަމަށް އެމަނިކުފާނު ވިދާޅުވިއެވެ.
ޕާޓީ ތެރެއިން ކުރިމަތިލާން ބޭނުންފުޅުވާ ހަތަރު ފަސް ބޭފުޅަކު މިހާރު ވެސް އެބަ ފެނޭ. ވަރަށް ރަނގަޅު ކަމެއް އެއީ. އެއީ ވާދަވެރި އިންޓާނަލް މަސައްކަތްތަކެއް ކުރުން. އެކަމަކު އަޅުގަނޑު އެ ހުރިހާ ބޭފުޅުންގެ ކިބައިން ވެސް އެދޭ ކަމަކީ ޕާޓީ ހިންގުމުގައި އެ ހުރިހާ ބޭފުޅުން ވެސް ޝާމިލުވުމަށް، ކުރީގެ ރައީސް އިބްރާހީމް މުހައްމަދު ޞާލިޙު
އެ ފަސް ބޭފުޅުންގެ ކިބައިން ޞާލިޙު އެދިވަޑައިގަތީ އަމިއްލަ ޝައުގުވެރިކަން އެކަމުގައި އޮތް ނަމަވެސް ޕާޓީއައިގެން ކުރިއަށް ވަޑައިގަތުމަށެވެ.
ރިޔާސީ ކެންޑިޑޭޓުންނަށް ވާން ޝައުގުވެރިކަން ފާޅުކޮށްފައިވަނީ ކޮން ބޭފުޅުންނެއް ކަމެއް ޞާލިޙު ވިދާޅެއްނުވެއެވެ.
އެ މަނިކުފާނުގެ ވިސްނުން އާއްމުންނަށް ހާމަކުރައްވާނެ ކަމަށް ޞާލިޙް ވިދާޅުވިއެވެ. އަދި އެކަމުގައި އެ މަނިކުފާނު ނިންމަވާފައިވާ ގޮތް މިހާރު ހާމަކުރައްވައިފިނަމަ ޕާޓީއަށް ލިބޭނެ ފައިދާއަށްވުރެ ލިބޭނެ ގެއްލުން ބޮޑުވެދާނެ ކަމަށް އެމަނިކުފާނު ވިދާޅުވިއެވެ.
ރިޔާސީ އިންތިޚާބަށް އަދި ހަތަރު އަހަރު އޮތްއިރު ކުރީގެ ރައީސް އަބްދުﷲ ޔާމީން ވެސް ވަނީ އެ އިންތިޚާބުގައި ވާދަ ކުރައްވާނެކަން ހާމަ ކުރައްވައިފައެވެ.