ދަރުމަވަންތަ ހޮސްޕިޓަލުގައި ގާއިމުކުރި އިންޕޭޝަންޓް ފެސިލިޓީތަކާއެއްކޮށް، އައިޖީއެމްއެޗާއި ދަރުމަވަންތަ ހޮސްޕިޓަލުގައި 121 އެނދު އިތުރުވާނެ ކަމަށް ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރަައްޒާގް ހަލީމް މިރޭ ވިދާޅުވެއްޖެއެވެ،
ހަލީމް މިފަދައިން ވިދާޅުވީ ޓާޝަރީ ފެންވަރުގައި ރަސްމީކޮށް، ދަރުމަވަންތަ ހޮސްޕިޓަލް ހުޅުވުމަށް ބޭއްވި ރަސްމިއްޔާތުގައެވެ.
އެ ރަސްމިއްޔާތުގައި ވާހަކަދައްކަވަމުން ހަލީމް ވިދާޅުވީ މާލެ ސަރަހައްދުގައި ދިރިއުޅޭ އާބާދީއަށް ހޮސްޕިޓަލްތަކުން ދެވޭ ޚިދުމަތްތައް އިތުރުކުރެވޭއިރު، ބެޑް ކެޕޭސިޓީ ބޭނުންވާ ވަރަށް ނެތުމަކީ ހޮސްޕިޓަލްތަކަށް ދިމާވެފައިވާ ވަރަށް ބޮޑު ގޮންޖެހުމެއް ކަމަށެވެ.
މިގޮތުން، އައިޖީއެމްއެޗް ހޮސްޕިޓަލުގައި މިހާރު ހިނގަމުންދާ 75 އެނދު އިތުރުކުރުމުގެ މަޝްރޫއުގެ މަސައްކަތް މިއަހަރު ތެރޭ ނިންމެނޭ ކަމަށް ހަލީމް ވިދާޅުވިއެވެ.
ދަރުމަވަންތަ ހޮސްޕިޓަލުގައި ގާއިމުކޮށްފައިވާ އިންޕޭޝަންޓު ފެސިލިޓީތަކާ އެއްކޮށް، އެނދުމަތި ކޮށްގެން ފަރުވާ ކުރުމަށް ހުރި ގޮންޖެހުންތަކަށް ބޮޑު ހައްލެއް ލިބިގެންދާނެ ކަން އޭނާ ފާހަގަކުރެއްވިއެވެ.
އެގޮތުން، ދަރުމަވަންތަ ހޮސްޕިޓަލާއި އައިޖީއެމްއެޗް ހޮސްޕިޓަލުގައި 121 އެނދު އިތުރުވެގެންދާނެ. މީގެއިތުރުން، މިހާރު ޑިޒައިން މަރުހަލާގައި އޮތް ވިލިމާލޭގައި ގާއިމުކުރެވޭ 100 އެނދުގެ ޓާޝަރީ ހޮސްޕިޓަލާއި ހުޅުމާލޭ ހޮސްޕިޓަލަށް އަންނަ ތަރައްގީއާއި ސަރުކާރުން އަޅަން ނިންމާފައިވާ ކެންސަރު ހޮސްޕިޓަލާއި މާލޭގެ އެހެން ސަރަހައްދުތަކުގައި ގާއިމުކުރެވޭ ސްޕެޝަލައިޒް ހޮސްޕިޓަލްތައް ގާއިމުކުރެވުމުން ސިއްހީ ނިޒާމު މުޅިން އާ ހަރުފަތަކަށް ވާސިލްވާނެ ކަން ޔަގީން
އިތުރަށް ވާހަކަދައްކަވަމުން ހަލީމް ވިދާޅުވީ، މި ސަރުކާރު ވެރިކަމާ ހަވާލުވިއިރު ދަރުމަވަންތަ ހޮސްޕިޓަލް އޮތީ ތަޞައްވުރުކޮށްލަން ވެސް އުނދަގޫ ހާލަތެއްގައި ކަމަށެވެ.
ތަނުގެ ފިނި ހޫނު މިން ބަލަހައްޓާ ނިޒާމުތައް ހުރީ މަރާމާތުނުކޮށް ގިނަ ދުވަސްވުމުގެ ސަބަބުން ބޭނުންނުކުރެވޭ ހާލަތުގައި ކަމަށާއި ހޮސްޕިޓަލްގެ ޚިދުމަތްތައް ދެމުން ދިޔައީ އެކި ފަންގިފިލާތަކުގައި އެކި ވަގުތުތަކުގައި ފިނި ހޫނުމިން ބަހައިގެން ކަމަށް އޭނާ ވިދާޅުވިއެވެ.
އެކަމުގެ ސަބަބުން 25 ބުރީގެ އެ ބިޔަ އިމާރާތުގައި ހުރި އަގުބޮޑު އެތައް ވަސީލަތްތަކެއް ބޭނުންނުކުރެވޭ ހާލަތަށް ގޮސްފައި ހުރިކަން ހަލީމް ވަނީ ފާހަގަކުރައްވާފައެވެ.
މީގެއިތުރުން، އޭނާ ސިފަކުރެއްވި ގޮތުން އެ ހޮސްޕިޓަލްގެ ގިނަ ފަންގިފިލާތައް ހުރީ ހޮހަޅައެއްގެ ގޮތުގައި ގުދަން ކުރަން ދޫކޮށްލާފައި ކަމަށެވެ.
އޭނާ ވިދާޅުވީ, އާ ސަރުކާރުން ވެރިކަމާ ހަވާލުވެ މިފަދަ ހުރިހާ އިހުމާލުތަކެއް ބަލައި، މައްސަލަތައް ހައްލުކޮށްފައިވާ ކަމަށެވެ. އަދި ހަލާކުވެފައި ހުރި އިކުއިޕްމަންޓުތައް ބަދަލުކޮށްފައިވާ ކަމަށް ވެސް ވިދާޅުވިއެވެ. އަދި، ކުރިން ބޭނުންނުކޮށް ހުރި ފަންގިފިލާތައް ވެސް މިހާރު އޮޕަރޭޝަނަށް ގެނެވިފައިވާ ކަމަށް ހަލީމް ވިދާޅުވިއެވެ.