ސަރުކާރުގެ މައި ހޮސްޕިޓަލްގެ ގޮތުގައި، ޓާޝަރީ ފެންވަރުގައި, މުހިންމު ޚިދުމަތްތަކަކާއެކު ކުރީގެ ރައީސް އަބްދުﷲ ޔާމީންގެ ވެރިކަމުގައި ތަރައްގީކުރެއްވި ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވައިފިއެވެ.
މި ހޮސްޕިޓަލް ރަސްމީކޮށް ހުޅުވައިދެއްވީ ރައީސް ޑރ. މުޙައްމަދު މުއިއްޒެވެ.
ދަރުމަވަންތަ ހޮސްޕިޓަލަކީ 500 އެނދުގެ ބޮޑު ހޮސްޕިޓަލަކެވެ. އެ އިމާރާތަށް ދައުލަތުގެ ބަޖެޓުން 140 މިލިޔަން ޑޮލަރު (2.1 ބިލިޔަން ރުފިޔާ) ޚަރަދުކޮށްފައިވެއެވެ.
މިހާރު މި ހޮސްޕިޓަލުގައި މުހިންމު ޚިދުމަތްތައް ޒަމާނީ ފެންވަރުގައި ގާއިމްކޮށްފައިވާއިރު ހޮސްޕިޓަލް ޓާޝަރީ ފެންވަރުގައި ހިންގުމުގެ އޮޕަރޭޓިން ލައިސެންސް ވެސް ހެލްތު މިނިސްޓްރީންވަނީ އެ ހޮސްޕިޓަލާ ހަވާލުކޮށްފައެވެ.
15 ނޮވެމްބަރު 2024: ދަރުމަވަންތަ ހޮސްޕިޓަލަށް ޓާޝަރީ ފެންވަރުގައި ހިންގުމުގެ އޮޕަރޭޓިން ލައިސެންސް ހަވާލުކުރުން -- ފޮޓޯ: ރައީސް އޮފީސް
ހޮސްޕިޓަލް ހުޅުވިއިރު ފެށި މުހިންމު ޚިދުމަތްތައް:
- ކުޑަކުދިންނަށް ޚާއްސަ އީއާރެއްގެ ގޮތުގައި ދަރުމަވަންތައިގެ ޚިދުމަތް ހަމަޖެއްސުން. މިއީ ރާއްޖޭގައި އަލަށް ތައާރަފްކުރާ ޚިދުމަތެއް. އެއީ އައިޖީއެމްއެޗުގެ އެމަޖެންސީ ޚިދުމަތް ހޯދާ 20 ޕަސެންޓަކީ ކުޑަކުދިން ކަމަށް ވާތީ.
- އެންމެ ޒަމާނީ ހައިބްރިޑް ކެތުލެބުގެ ޚިދުމަތް. މި ޚިދުމަތާއެކު ރާއްޖެއިން ބޭރަށް ޚިދުމަތް ހޯދަން ދާ މިންވަރު މަދުވާނެ.
- ނެޝަނަލް ފާޓިލިޓީ ސެންޓަރުގެ ޚިދުމަތް. މި ތަނުން އައިވީއެފް، ސްޕާމް ފްރީޒިން ދަރިމައިވުމުގެ ކަންކަމާ ގުޅޭ މުހިންމު ފަރުވާތައް ލިބޭނެ.
- ކުޑަކުދިންގެ އައިސީޔޫ
- ޕްރައިވެޓް އެޑްމިޓް ރޫމްތައް
މި ރަސްމިއްޔާތުގައި ވާހަަކަދައްކަަވަމުން ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރަައްޒާގް ހަލީމް ވިދާޅުވީ ކުރީ ސަރުކާރުން އޮތީ ދަރުމަވަންތަ ހޮސްޕިޓަލް "ހޮހޮޅަ"އަކަށް ހަދައި ގުދަނެއްގެ ގޮތުގައި ދޫކޮށްލައިފައި ކަމަށެވެ. ހޮސްޕިޓަލުގައި ހުރި މުހިންމު މެޝެނެރީތަކަށް ބޭނުންވާ މެއިންޓެނެންސްތައް ވެސް ހުރީ ނުކޮށް ކަމަށް ވިދާޅުވިއެވެ.
15 ނޮވެމްބަރު 2024:ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރަައްޒާގް ހަލީމް -- ފޮޓޯ: ރައީސް އޮފީސް
"މި ސަރުކާރުން ވެރިކަމާ ހަވާލުވީއިރު ދަރުމަވަންތަ ހޮސްޕިޓަލް އޮތީ ތަސައްވުރުކޮށްލަން ވެސް ދަތި ހާލަތުގައި،" އޭނާ ވިދާޅުވިއެވެ.
އޭނާ ވިދާޅުވީ އާ ސަރުކާރުން ވެރިކަމާ ހަވާލުވެ މިފަދަ ހުރިހާ އިހުމާލުތަކެއް ބަލައި، މައްސަލަތައް ހައްލުކޮށްފައިވާ ކަމަށެވެ. އަދި ހަލާކުވެފައި ހުރި އިކުއިޕްމަންޓުތައް ބަދަލުކޮށްފައިވާ ކަމަށް ވެސް ވިދާޅުވިއެވެ.
މީގެ އިތުރުން ކުރިން ބޭނުންނުކޮށް ހުރި ފަންގިފިލާތައް ވެސް މިހާރު އޮޕަރޭޝަނަސް ގެނެވިފައިވާކަމަށް ވިދާޅުވިއެވެ.
އެގޮތުން 17 ވަނަ ފަންގިފިލާގައި ޑެލިވަރީ ސޫޓްތަކާއި، 18 އަދި 19 ވަނަ ފަންގިފިލާގައި، އެޑްމިޓްކުރަން ޚާއްސަ 14 ކޮޓަރިއާއި 21ވަނަ ފަންގިފިލާ އިދާރީ ޚިދުމަތްތަކަށް ޚާއްސަކޮށްފައިވާކަމަށް ވިދާޅުވިއެވެ. މީގެ އިތުރުން 22 ވަނަ ފަންގިފިލާގައި ނެޝަނަލް ފާޓިލިޓީ ސެންޓަރު ވެސް ގާއިމްކޮށްފައިވާ ކަމަށް ވިދާޅުވިއެވެ.
އެއާއެކު ހަލީމް ވަނީ ރަސްމީކޮށް ދަރުމަވަންތަ ހޮސްޕިޓަލް މިރޭ ހުޅުވުނީތީ ރައީސަށް މަރުހަބާ ވިދާޅުވެފައެވެ. އަދި ސިއްހީ ދާއިރާގެ ތަރައްގީއަށް ރައީސް ދެއްވާ އަހައްމިއްޔަތަށް ވެސް ޝުކުރު އަދައިކުރައްވައިފައެވެ.
މީގެ އިތުރުން ޑޮކްޓަރުންނާއި، ސިއްހީ ޚިދުމަތްތެރިންނަށާއި، ސިއްހަތާ ބެހޭ ވުޒާރާއަށާއި، މާލީ ވުޒާރާއަށް ވެސް ޝުކުރު އަދައިކުރެއްވިއެވެ.