ދިވެހި މުޖުތަމައުގައި އޮތީ ބަލި ސިއްޙީ ނިޒާމެއްކަން ދެކެން ރައީސް ޑރ. މުޙައްމަދު މުއިއްޒުގެ ސިއްޙީ ސިޔާސަތުތައް ތަންނުދޭ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް މިރޭ ވިދާޅުވެއްޖެއެވެ.
ޓާޝަރީ ފެންވަރުގައި ދަރުމަވަންތަ ހޮސްޕިޓަލް ރަސްމީކޮށް ހުޅުވަން މިރޭ ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ނާޒިމް ވިދާޅުވީ، އިންސާނީ ހަޔާތުގައި ވަކި ފަރުދެއްގެ ހައިސިއްޔަތުން ވިސްނުމުން 'އަން' ޒަމާނުއްސުރެ ސިއްހީ ނިޒާމުގައި ހަރުލާފައި ހުރި ބައެއް ނުކިއްސަރު އާދަތައް ހައްލު ކުރަން މަސައްކަތް ކުރުމުން ކުޑަ ދުވަސްކޮޅަކަށް ދަތި އުނދަގޫތަކެއް ތަހަންމަލު ކުރަން ޖެހިދާނެ ކަމަށެވެ.
ނަމަވެސް، އެ ކަންތައްތަކަކީ ނިޒާމެއްގެ ގޮތުގައި ހަރުދަނާކޮށްގެން ނޫނީ ރައީސް ވިސްނަވާ ދިވެހި ގައުމު ބައްޓަން ކުރުމުގެ ނިޒާމު އަތުނުވާނެ ކަމަށް މިިނިސްޓަރު ވިދާޅުވިއެވެ.
އެގޮތުން، މީގެ ވިހި އަހަރު ފަހުން މި ގައުމު އޮންނަންޖެހޭ ނިޒާމަށް ގެންދިޔުމަށް ސިއްހީ ނިޒާމުގެ ކަންކަން ވެސް ބައްޓަން ކުރެވެނީ އެ ސިޔާސަތުތަކުންކަމަށް ނާޒިމް ވަނީ ފާހަގަކުރައްވާފައެވެ.
ދަރުމަވަންތަ ހޮސްޕިޓަލް ރަސްމީކޮށް ހުޅުވަން ބޭއްވި ޖަލްސާގެ ތެރެއިން ---- ފޮޓޯ/ ރައީސް އޮފީސް
ދިވެހި މުޖުތަމައުއަކީ ބަލި ނިޒާމެއްގެ ފަހަތުން ދުވާ ސިއްޙީ ނިޒާމެއްއޮތް މުޖުތަމައުއެއް ކަމުގައި ދެކޭކަަށް ރައީސްގެ ސިއްޙީ ސިޔާސަތުތައް ތަނެއް ނުދޭ. އޭގެ ހެއްކެއް ގޮތުން އަޅުގަނޑުމެނަށް ފެންނަނީ ދިވެހި މުޖުތަމައު ދުޅަހެޔޮ މުޖުތަމައެއް ގޮތުގައި ބޭއްވުމަށްޓަކައި ރައީސް އަޅުއްވަމުން ގެންދަވާ މުހިންމު އެހެނަސް އުނދަގޫ ފިޔަވަޅުތައް
މީގެއިތުރުން، ސިއްޙީ ނިޒާމުގައި ވަރަށް ބޮޑެތި ބާގަނޑުތަކެއް ހުރި ކަމަށާއި އެ ބާގަނޑުތައް ފޫބެއްދެވުމަށް ރައީސް މުއިއްޒު މަސައްކަތް ކުރައްވަމުން ގެންދަވާ ކަމަށް މިނިސްޓަރު ވިދާޅުވިއެވެ.
މިރޭ ފެށިގެން ދަނީ އަޅާނުލެވި ދޫކޮށްލެވިފައިވާ މަސައްކަތްތައް ތަރުތީބު ކުރުމާއި އެ މަސައްކަތްތައް ތަންފީޒުކުރުމުގެ މަސައްކަތް ކަމަށް ދެކިވަޑައިގަންނަވާ ކަމަށް ނާޒިމް ވިދާޅުވިއެވެ.
އެގޮތުން، އެ މަސައްކަތްތަކުގެ ތެރޭގައި، ބަލިވުމުން ބޭސްފަރުވާ ކުރާ ނިޒާމު ހަރުދަނާ ކުރުމާއި އެ ކަންކަން ފުޅާކުރުމާއި ބަލިމަޑުކަމުން ދުރުހެލިވެ ތިބުމަށް ޓަކައި ދުޅަހެޔޮ އާބާދީއެއް ބިނާކުރުމާއި ސިއްހީ ދާއިރާގެ ގަވަނަންސް ހަރުދަނާ ކުރުމުގެ މަސައްކަތްތައް ކަމަށް މިނިސްޓަރު ވިދާޅުވެފައިވެއެވެ.
މިނިސްޓަރު ވަނީ ކުރިއަށް އޮތް ހަތަރު އަހަރުވާނީ ސިއްޙީ ދާއިރާގެ މުޅިން އާ އުފާވެރި ބާބެއް ލިޔެވިގެންދާނެ ހަތަރު އަހަރަށް ވާނެ ކަމަށް ވެސް ވިދާޅުވެފައެވެ.