ބޭރު ފައިސާއާ ބެހޭ ގަވާއިދަށް މިހާރުން މިހާރަށް އަމަލުކުރުން މަޑުޖައްސާލައި ފަތުވެރިކަމުގެ ދާއިރާގެ ޖަމިއްޔާތަކާ މަޝްވަރާ ކުރަން ދަ ޑިމޮކްރެޓްސްއިން މިއަދު ގޮވާލައިފިއެވެ.
ޑިމޮކްރެޓްސް އިން މިފަދައިން ގޮވާލާފައި ވަނީ ބޮޑެތި ބްރޭންޑްތައް ހިމެނޭގޮތަށް އެތައް ރިސޯޓަކުން ބޭރު ފައިސާއާ ބެހޭ ގަވާއިދުގެ ދަށުން ޑޮލަރު މާރު ކުރަން ދަތިކަން ހާމަކުރަމުން އަންނަނިކޮށެެވެ.
ގަވާއިދުގައި ވާގޮތުން، ކެޓަގަރީ "އޭ"ގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނަށް އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު އެ މަހަށްފަހު ހިނގާ ތިންވަނަ މަހުގެ 28ވަނަ ދުވަހުގެ ކުރިން ބޭންކަށް މާރުކުރަން ވާނެއެވެ. "އޭ" ކެޓަގަރީގައި ހިމެނެނީ ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ ރާއްޖޭގައި ހިންގާ ޓޫރިސްޓު ރިސޯޓުތަކާއި އިންޓަގްރޭޓެޑް ޓޫރިސްޓު ރިޒޯޓުތަކާއި ރިޒޯޓު ހޮޓާތަކެވެ.
އެ ގަވައިދާ ގުޅުވައި ކަންބޮޑުވުން ފާޅުކުރައްވައި، އެ ޕާޓީން ނެރުނު ބަޔާނެއްގައި ބުނީ، އެ ގަވައިދު މިހާރު އޮތް ގޮތުން، ފަތުރުވެރިކަމުގެ ދާއިރާއަށާއި މުޅި ރާއްޖެއަށް އެކަމުގެ ސަބަބުން އިންތިހާއަށް ގެއްލުން ވެދާނެ ކަމަށް ދެކޭ ކަމަށެވެ.
އެއާޕޯޓުގައި ފަތުރުވެރިންތަކެއް: ބޭރު ފައިސާއާ ބެހޭ ގަވައިދަށް އަމަލުކުރުން މަޑުޖައްސާލައި، ދާއިރާގެ ފަރާތްތަކާ މަޝްވަރާ ކުރަން ޑިމޮކްރެޓްސް އިން ގޮވާލައިފި -- ސަން ފޮޓޯ/ އަމަން ލަތީފް
ފަތުރުވެރިކަމުގެ ދާއިރާގެ ފައުންޑަރެއް ކަމަށްވާ ޗަންޕާ މުޙައްމަދު މޫސާ އާއި އެނޫން ވެސް އެތައް ވިޔަފާރިއަކުން ބޭރު ފައިސާއާ ބެހޭ ގަވައިދުގައި ބުނާ އަދަދަށް ފައިސާ މާރުކުރުމަކީ ނުކުރެވޭނެ ކަމެއް ކަން ބުނެފައިވާއިރު، އެ ބޭފުޅުންނަށް އާޑަފުރައްސާރަ ކުރާ ގޮތަށް ސަރުކާރުގެ އެކި ބޭފުޅުން ލިޔުއްވުން ކުށްވެރިކުރާ ކަމަށް އެ ޕާޓީން ބުނެފައިވެއެވެ.
އަދި، މިކަމުގެ ސަބަބުން ދިވެހިރާއްޖޭގެ އިންވެސްޓަރުންގެ އިތުބާރު ހޯދުމާ ހިފެހެއްޓުމަށް ކުރިމަތިވެދާނެ ގިނަގުނަ ހުރަސްތަކާމެދު ނުހަނު ކަންބޮޑުވުވަމެވެ.ޑިމޮކްރެޓްސް
އިތުރަށް ޑިމޮކްރެޓްސް އިން ބުނީ، އަލަށް މާކެޓަށް ނެރޭ ރަށްރަށަށް އިންވެސްޓުކުރާނެ އިންވެސްޓަރުންގެ އިތުބާރު ހޯދުމަށް މަސައްކަތް ކުރުން ބޭނުންތެރިކަމަށް ދެކޭ ކަމަށެވެ.
އެ ގަވައިދު މިހާރު އޮތް ގޮތުން، ރިސޯޓުތަކާއި ހޮޓާތަކާއި ގެސްޓުހައުސްތަކުގެ ވިޔަފާރިތައް ހަލާކުވެ، ބަންދުކުރަން ޖެހިދާނެ ކަމުގެ ބިރު އޮތުމުން މިހާރުން މިހާރަށް ބޭރު ފައިސާއާ ބެހޭ ގަވައިދަށް އަމަލު ކުރުން މަޑުޖައްސާލަން ޑިމޮކްރެޓްސްއިން ވަނީ ގޮވާލާފައެވެ.
މި މައްސަލަ ހައްލު ކުރުމަށް ފަތުރުވެރިކަމުގެ ދާއިރާ ތަމްސީލުކުރާ ޖަމިއްޔާތަކާ ވީއެންމެ އަވަހަށް މަޝްވަރާ ކުރުމަށް ޑިމޮކްރެޓްސްއިން ވަނީ ސަރުކާރަށް ގޮވައިލާފައެވެ.