މާލެ ސަރަހައްދުގައި ގޭންގުތަކުގެ ނުރައްކާ ކުޑަކުރުމަށް، މި ސަރުކާރު ފެށުނު ފަހުން ކުރި މަސައްކަތްތަކުގެ ތެރެއިން، ގޭންގުތަކުން އެއްވާ ސަރަހައްދުތަކަށް އެއް ލައްކަ ފަހަރު ގޮސް ހާލަތު ބަލައިފައިވާ ކަމަށް ފުލުހުން މިއަދު ބުނެފިއެވެ.
ފުލުހުންގެ ނޫސްވެރިންގެ ބައްދަލުވުމެއްގައި ހެޑް އޮފް ގޭންގް ކްރައިމް އެންފޯސްމެންޓް އާރިފް ވިދާޅުވީ ގޭންގުތަކާ ގުޅުންހުރި ސަރަހައްދުތަކުން މި މުއްދަތުގައި 20،597 ފަހަރު މީހުން ހުއްޓުވައި ސުވާލުކޮށްފައިވާ ކަމަށެވެ.
އޭނާ ވިދާޅުވީ އޭގެ ތެރޭގައި ހިމެނެނީ 18 އަހަރުން މަތީގެ 5،449 މީހުން ކަމަށާއި 307 ކުޑަކުދިން ހިމެނޭ ކަމަށެވެ. އެގޮތުން އެ ކުޑަކުދިންނާ ސުވާލުކުރި އަދަދު 2،315އަށް އަރާ ކަމަށް އާރިފް ވިދާޅުވިއެވެ.
މީގެ އިތުރުން ހިއްސާކުރި ތަފާސްހިސާބުގެ ތެރޭގައި:
- ޗެކްކުރި އުޅަނދުގެ އަދަދު: 2،658
- އުޅަނދުތައް ފާސްކުރި އަދަދު: 3،043
- ޓޯކުރި އުޅަނދުގެ އަދަދު: 84
- ގޭންގުތަކުން ބޭނުންކުރާ ގޮނޑި، މޭޒު ނައްތާލި އަދަދު: 47
- ގްރެފިޓީ ނައްތާލި އަދަދު: 141
ހޯމް މިނިސްޓަރު އަލީ އިހުސާން މީގެ ކުރިން ވަނީ، ގޭންގާއި މަސްތުވާތަކެތީގެ ކުށްތައް ކުރާ އައްޑާގެ ގޮތުގައި ބޭނުންކުރާ ތަންތަން ގާނޫނަށް ބަދަލު ގެނެސްގެން ނަމަވެސް ދައުލަތަށް ނަގާނެ ކަމުގެ އިންޒާރު ދެއްވައިފައެވެ.
މި ދުވަސްވަރު މާލެ ސަރަހައްދުގައި ގޭންގުތަކުގެ ތަޅާފޮޅުންތަކެއް ހިނގަމުން އަންނައިރު މިއަދު ފުލުހުން ވަނީ އެ މާރާމާރީތައް ގުޅިފައިވަނީ މަސްތުވާތަކެތީގެ މައްސަލަތަކާ ކަމަށް ބުނެފައެވެ.