ލޯބިވެރިޔާއަށް ބިރުދައްކައި ބްލެކްމެއިލްކުރި ފުލުހަކު ހައްޔަރުކޮށްފި

ލޯބިވެރިޔާއަށް ބިރުދައްކައި ބްލެކްމެއިލްކުރި ފުލުހަކު ހައްޔަރުކޮށް އޭނާގެ ބަންދަށް ތިން ދުވަހުގެ މުއްދަތެއް ޖަހައިފިއެވެ.

މިއަދު ފުލުހުން މީޑިއާތަކާ ހިއްސާކުރި މެސެޖެއްގައި ވަނީ ލޯބިވެރިޔާއަށް ބިރުދައްކައި އޭނާގެ އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ސޯޝަލް މީޑިއާގައި ލީކްކޮށްލާނެ ކަމަށްބުނެ ބިރުދައްކައި އިންޒާރުދީ، ބްލެކްމެއިލް ކުރިކަމަށް ތުހުމަތުކުރެވޭ މައްސަލައެއްގައި އިއްޔެ ކޯޓު އަމުރެއްގެ ދަށުން މީހަކު ހައްޔަރުކޮށްފައި ވާކަމަށެވެ.

މި މައްސަލައިގައި ހައްޔަރުކޮށްފައި ވަނީ އއ. މަތިވެރި ފަޒާ، އުމުރުން 19 އަހަރުގެ ޒައިދާން މުޙައްމަދު ކަމަށާއި އޭނާއަކީ އެރަށުގެ ޕޮލިސް ސްޓޭޝަނުގައި މަސައްކަތްކުރާ ރެކްރޫޓު ފުލުހެއް ކަމަށްވެސް ފުލުހުން ވަނީ ބުނެފައެވެ.

އަދި އޭނާގެ ބަންދާމެދު ގޮތެއް ނިންމުމަށް މަތިވެރީ މެޖިސްޓްރޭޓް ކޯޓަށް މިއަދު ހާޒިރުކުރުން ތިން ދުވަހުގެ މުއްދަތަށް އޭނާ ބަންދުކުރުމަށް އެ ކޯޓުން އަމުރު ކޮށްފައި ވާކަމަށް ފުލުހުން ވަނީ ބުނެފައެވެ.

ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.

ބިރުދައްކާ ބްލެކްމެއިލް ކުރުމުގެ މިފަދަ މައްސަލަތައް މިހާރު ދޭތެރެއަކުން ފެންމަތިވެއެވެ.