ގޫގުލްގެ އޭއައި އަސާސްކޮށްފައިވާ, ފެންބޮޑުވުމުގެ މޫސުމީ އިންޒާރު ދިނުމުގެ ނިޒާމު 100 ޤައުމަކަށް ފުޅާކޮށްފިއެވެ.
ދުނިޔޭގެ އެންމެ ބޮޑު ސާޗް އިންޖިނު ކަމުގައިވާ ގޫގުލްއިން އިޢުލާނުކޮށްފައިވާ ގޮތުގައި، އެ ކުންފުނީގެ އާޓިފިޝަލް އިންޓެލިޖެންސް (އޭއައި) އަސާސްކޮށްފައިވާ ފެންބޮޑުވުމުގެ އިންޒާރު ދިނުމުގެ ނިޒާމު މިހާރު 100 ޤައުމަކަށް ފުޅާކޮށްފައިވާއިރު، މި ނިޒާމުގެ ސަބަބުން 700 މިލިއަން މީހުންނަށް ކޯރުތަކުގައި ފެންބޮޑުވުމުގެ އިންޒާރު ލިބޭނެއެވެ.
ގޫގުލްއިން ބުނެފައިވާ ގޮތުގައި މި ނިޒާމު ފުޅާކުރެވުނީ އެ ކުންފުނިން ކުރި ދިރާސާތަކުގެ ސަބަބުންނެވެ. މި ދިރާސާތަކުގެ ސަބަބުން އޭއައި މޮޑެލްތައް ތަމްރީނުކުރުމަށް ބޭނުންވާ ލޭބަލްކުރެވިފައިވާ ޑޭޓާ އިތުރަށް ލިބުނެވެ. އަދި އައު ފޯކާސްޓިން މޮޑެލްއެއް ތައްޔާރުކުރެވި، އައު މޮޑެލް އާކިޓެކްޗާއެއް ބޭނުންކުރެވުނެވެ.
މީގެ އިތުރުން، ގޫގުލްއިން ވަނީ މި ނިޒާމުގެ ޑޭޓާސެޓްތައް ދިރާސާކުރާ ފަރާތްތަކަށާއި ޕާޓްނަރުންނަށް ލިބޭނެ ގޮތް ހަދައިދީފައެވެ. މިގޮތުން ގޫގުލް ރަންއޮފް ރީއެނަލިސިސް އެންޑް ރީފޯކާސްޓް (ޖީއާރްއާރްއާރް) އިން މިހާރު ވެސް ޑޭޓާ ލިބެން ހުންނާނެއެވެ. އަދި އައު އޭޕީއައިއެއް ތައްޔާރުކުރުމުގެ މަސައްކަތް ކުރަމުންދާ ކަމަށް ގޫގުލްއިން ބުނެފައިވެއެވެ.
ކުރިން މި ނިޒާމު ބޭނުންކުރެވެމުން ދިޔައީ 80 ޤައުމެއްގައި ކަމަށާއި، އޭރު ވެސް 400 މިލިއަން މީހުންނަށް މި ޚިދުމަތް ލިބެމުންދިޔަ ކަމަށް ގޫގުލްއިން ބުނެފައިވެއެވެ. އެހެންކަމުން މި އިޢުލާނާ އެކު މި ނިޒާމުގެ ޚިދުމަތް ލިބޭ މީހުންގެ އަދަދު ދެގުނަ އިތުރުވެފައިވާކަން ފާހަގަކުރެވެއެވެ.
މި ނިޒާމުގެ ސަބަބުން ފެންބޮޑުވުމުގެ ކާރިސާތަކުން ރައްކާތެރިވުމަށް އިތުރު ފުރުސަތުތަކެއް ލިބިގެންދާނެ ކަމަށް ބެލެވެއެވެ. އަދި ދިރާސާކުރާ ފަރާތްތަކަށާއި ޕާޓްނަރުންނަށް މި ޑޭޓާ ލިބުމުގެ ސަބަބުން އިތުރު ކުރިއެރުންތަކެއް ހޯދޭނެ ކަމަށް ވެސް ބެލެވެއެވެ.