މައިކްރޯސޮފްޓްގެ ސާޗް އިންޖީން ބިންގުން، ގޫގުލް ކޮޕީކުރާ ކަމަށް ޓެކް ރިޕޯޓެއްގައި ބުނެފިއެވެ.
ދަ ވާޖް އިން ރިޕޯޓު ކުރާ ގޮތުގައި މައިކްރޯސޮފްޓްގެ ސާޗް އިންޖިން ކަމުގައިވާ ބިންގުން، ގޫގުލްއާ އެއްގޮތަށް އިންޓަފޭސް ބަދަލު ކޮށްގެން ސާޗް އިންޖިން ބޭނުން ކުރާ ފަރާތްތައް އޮޅުވާލަން ވަނީ މަސައްކަތް ކޮށްފައެވެ. މި ބަދަލު ފެންނަނީ ބިންގް ސާޗް އިންޖިން އިން "ގޫގުލް"އަށް ސާޗް ކުރާ ވަގުތުގައެވެ.
ދަ ވާޖްގެ ރިޕޯޓުގައި ބުނެފައިވާ ގޮތުގައި ބިންގުން ދައްކާފައި ވަނީ ގޫގުލްގެ ހޯމްޕޭޖްއާ އެއްގޮތް އިންޓަފޭސްއެކެވެ. މީގެ ތެރޭގައި ގޫގުލްގެ ޑޫޑަލް އާއި އެއްގޮތް ޑޫޑަލްއެއް ހިމެނޭ ކަމަށާއި، އަދި ސާޗް ބާގެ ތިރީގައިވާ ލިޔުން ވެސް ގޫގުލްއާ އެއްގޮތަށް ހުރި ކަމަށް ވެއެވެ. އަދި ހަމަ އެއާއެކު ބިންގް އިންޖިންގެ ލޯގޯ ނުފެންނަ ގޮތަށް ސްކްރީން އަމިއްލަ އަށް ސްކްރޯލް ވެސް ވެއެވެ.
ބިންގް ސާޗް އިންޖީނުން ދެއްކި ކަމަށްބުނާ އިންޓަފޭސް --
މި ކަމާ ގުޅިގެން ގޫގުލް ކްރޯމްގެ ވައިސް ޕްރެސިޑެންޓް އަދި ޖެނެރަލް މެނޭޖާ ޕަރީސާ ތަބްރިޒް ވަނީ މައިކްރޯސޮފްޓްގެ މި ޢަމަލަށް ފާޑުކިޔާ، މިއީ "ދަށުދަރަޖައިގެ ކަމެއް" ކަމުގައި ބުނެފައެވެ. އެކްސް (ކުރީގެ ޓްވިޓާ) ގައި ޕަރީސާ ހިއްސާ ކުރެއްވި ޕޯސްޓެއްގައި މިކަން ހާމަކުރެއްވިއެވެ.
މައިކްރޯސޮފްޓުން މީގެ ކުރިން ވެސް ވަނީ ގޫގުލްގެ ޕްރޮޑަކްޓްތަކަށް ބަދަލުވާ މީހުން ހުއްޓުވުމަށް އެކި ގޮތްގޮތުން މަސައްކަތް ކޮށްފައެވެ. މިގޮތުން އެޖް ބްރައުޒާ އިން ގޫގުލް ކްރޯމް އިންސްޓޯލް ކުރަން އުޅޭ ވަގުތު ޕޮޕްއަޕް މެސެޖެއް ދައްކައެވެ. "ނޯ، ތެންކްސް" ކިޔާފައި އޮންނަ ބަޓަން ވެސް ކުޑަކޮށް ނުފެންނަ ގޮތަށް ބެހެއްޓުމަކީ ވެސް މައިކްރޯސޮފްޓުން ކުރާ ކަމެކެވެ.
މި މައްސަލަ ރިޕޯޓު ކުރެވުމާއި ގުޅިގެން މައިކްރޯސޮފްޓް އިން މިހާރު ވަނީ އިންޓަފޭސް އާންމު ގޮތަށް ބަދަލުކޮށްފައި ކަމަށް ބެލެވެއެވެ.
ގެޖެޓްސް 360 އާއި އެހެން ޓެކް ނޫސްތަކުން ބުނާ ގޮތުގައި މިހާރު އެފަދަ އިންޓަރފޭސްއެއް ނުފެނެއެވެ. ނަމަވެސް ވިންޑޯސް ލޭޓެސްޓް އަދި 9ޓު5ގޫގުލް އިން ވެސް މިކަން ކަށަވަރު ކޮށްފައިވެއެވެ.