މުޅި ރާއްޖެ ހިމެނޭ ގޮތަށް, ރައްޔިތުންގެ ކަންބޮޑުވުން ދެނެގަތުމަށް ފުލުހުންގެ އިސް ވެރިން ބައިވެރިވެގެން މިއަދު ހަރަކާތެއް ކުރިއަށްގެންގޮސްފިއެވެ.
ފުލުހުން ބުނީ މިއަދުގެ 16:00އިން 18:00އަށް ފުލުހުން ކުރިއަށް ގެންދިޔަ މި ހަރަކާތަކީ އަމާން މުޖުތަމައެއް ގާއިމުކުރުމަށާއި، ރައްޔިތުންނާ ގުޅުން ބަދަހިކުރުމާއި، އާންމު ރައްޔިތުންގެ ހުރި ކަންބޮޑުވުންތައް ދެނެގަތުމާއި، ފުލުހުންގެ ވިޒިބިލިޓީ އިތުރުކުރުމާއި، އެކި ސަރަހައްދުތަކަށް ޒިޔާރަތްކުރުމާއި، ކުށްތަކުން ރައްކާތެރިކުރުވުމަށް ރައްޔިތުން ހޭލުންތެރިކޮށް މައުލޫމާތުދިނުމަށް ކުރިއަށް ގެންދިޔަ ހަރަކާތެއް ކަމަށެވެ.
މި ހަރަކާތުގެ ތެރެއިން ސްކޭމްގެ މައްސަލަތަކުން ރައްކާތެރިކުރުމަށް މައުލޫމާތުދިނުމާއި ކުށްތައް ހިނގާ ސަރަހައްދުތައް ދެނެގަނެ ކުށްމަދު ކުރުމަށް ރައްޔިތުންނާ ގުޅިގެން ކުރެވިދާނެ ކަންކަން ދެނެގަނެވޭނެ ކަމަށް ފުލުހުން ބުންޏެވެ.
މުޅި ރާއްޖެ ހިމެނޭ ގޮތަށް ރައްޔިތުންގެ ކަންބޮޑުވުން ދެނެގަތުމަށް ފުލުހުން ކުރިއަށްގެންދިޔަ "ވޯކް އެންޑް ޓޯކް" ހަރަކާތުގެ ތެރެއިން --- ފޮޓޯ/ ފުލުހުން
މި ހަރަކާތުގެ ތެރެއިން ފުލުހުން ވަނީ ރައްޔިތުންނާ ބައްދަލުކޮށް ވާހަކަ ދައްކައި، ރައްޔިތުންގެ ހުރި ކަންބޮޑުވުންތައް އޮޅުންފިލުވައިފައެވެ. އަދި ފުލުހުންގެ މަސައްކަތްތަކާއި އިތުރަށް ރަނގަޅުކުރުމަށް ކުރެވިދާނެ ކަންކަމާ ގުޅޭގޮތުން ރައްޔިތުންނާ މަޝްވަރާކޮށް ހިޔާލު ހޯދާފައިވާ ކަމަށް ވެސް ފުލުހުން ބުންޏެވެ.
މުޅި ރާއްޖެ ހިމެނޭގޮތަށް، ފުލުހުން ގާއިމުވެފައިވާ ހުރިހާ ރަށެއްގައި އެއްވަގުތެއްގައި ކުރިއަށް ގެންދިޔަ މި ހަރަކާތުގައި ކޮމިޝަނާ އޮފް ޕޮލިސް ޢަލީ ޝުޖާއުއާއި ޑެޕިއުޓީ ކޮމިޝަނާ އޮފް ޕޮލިސް އިސްމާއީލް ނަވީން އަދި އެހެނިހެން ރޭންކުތަކުގެ ފުލުހުންނާއި ރަށްރަށުގެ ޕޮލިސް ސްޓޭޝަންތަކާއި ޕޮލިސް ޕޯސްޓު އަދި ޕޮލިސް ޑެސްކުތަކުގައި މަސައްކަތްކުރާ ފުލުހުން ހިމެނޭ ގޮތަށް ގިނަ އަދަދެއްގެ ފުލުހުން ވަނީ ބައިވެރި ވެފައެވެ.
މުޅި ރާއްޖެ ހިމެނޭ ގޮތަށް ރައްޔިތުންގެ ކަންބޮޑުވުން ދެނެގަތުމަށް ފުލުހުން ކުރިއަށްގެންދިޔަ "ވޯކް އެންޑް ޓޯކް" ހަރަކާތުގެ ތެރެއިން --- ފޮޓޯ/ ފުލުހުން
މި ހަރަކާތުގެ ސަބަބުން، ރައްޔިތުންނާއި ފުލުހުންގެ މެދުގައި އޮންނަ ގުޅުން ބަދަހިވެ އަދި ރައްޔިތުންގެ ކަންބޮޑުވުންތައް ދެނެގަނެ ކުށްމަދުކުރުމަށް މަސައްކަތްކުރުމާއި ފުލުހުންގެ މަސައްކަތްތައް އިތުރަށް ހަރުދަނާކުރުމަށް މަގުފަހިވެފައިވާ ކަމަށް ފުލުހުން ބުންޏެވެ.