ގަވާއިދާ ޚިލާފަށް ބަނގުރާ ގެންގުޅެ، އެ ތަކެތީގެ ވިޔަފާރިކުރާ ކަމުގެ ތުހުމަތުގައި ތިން ދިވެހި ފިރިހެނުން ރޭ ހއްޔަރުކޮށްފިއެވެ.
މިއީ މީލާދީ އައު އަހަރާ ދިމާކޮށް ފުލުހުން ހިންގި މަސްތުވަތާކެތީގެ އޮޕަރޭޝަނުގެ ތެރެއިން ހައްޔަރުކުރި ބައެކެވެ.
މި މައްސަލައިގައި ހައްޔަރުކުރީ މާލޭ ގ. ރެއިންބޯ، އުމުރުން 26 އަހަރުގެ އިސްމާއީލް މާހީން މުސްތަފާއާއި، ސ. ހުޅުދޫ ހެޕީޑްރީމްސް، އުމުރުން 19 އަހަރުގެ އިބްރާހީމް އަކްމަލް އަބްދުއްސައްތާރުގެ އިތުރުން، ސ. ހުޅުދޫ ޗާންދަނީގޭ އުމުރުން 22 އަހަރުގެ އަހްމަދު އާނިޝްއެވެ.
ފުލުހުން ބުނީ މި ތިން މީހުން ވެސް ރޭ ހައްޔަރުކުރީ، ބަނގުރާ ގެންގުޅެ، އެ ތަކެތި ބޭނުންކޮށް، އަދި އޭގެ ވިޔަފާރިކުރާ ކަމުގެ ތުހުމަތުގައި ކަމަށެވެ.
މި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިތު ކުރުމުން ޝަރުތު ކުރުމަށްފަހު ދޫކޮށްލާފައިވާ ކަމަށް ފުލުހުން ބުންޏެވެ.
ފުލުހުން އަންނަނީ މި މައްސަލަ ތަހުގީގު ކުރަމުންނެވެ.
އައު އަހަރާ ދިމާކޮށް، މަސްތުވާތަކެތި ބޭނުން ކުރުން އިތުރުވާނެ ކަމަށް ބެލެވޭތީ ފުލުހުން ވަނީ މި ދުވަސްކޮޅާ ދިމާކޮށް ޚާއްސަ އޮޕަރޭޝަނެއް ފަށައިފައެވެ.