ތިމާވެށި ހިމާޔަތް ކުރުމުގެ މަސައްކަތްތަކަށް ފައިސާ ހޯދަން ސަރުކާރާއި ބައިނަލްއަގުވާމީ ޖަމިއްޔާއެއް ކަމަށްވާ ދަ ނޭޗާ ކޮންސާވަންސީ (ޓީއެންސީ)އާއެކު ފަހުމުނާމާއެއްގައި ސޮއިކޮށްފިއެވެ.
ފިނޭންސް މިނިސްޓްރީން ނެރުނު ބަޔާނެއްގައި ބުނީ، މޫސުމަށް އަންނަ ބަދަލުތަކާ ކުރިމަތިލުމުގެ ގާބިލުކަން އިތުރުކުރުމާއެކު އިގުތިސާދީ ދެމެހެއްޓެނިވިކަން ކުރިއެރުވުމަށް އެ ފަހުމުނާމާގައި ސޮއިކުރީ އަޒަރުބައިޖާނުގައި މިހާރު ކުރިއަށްދާ ކޮޕް29 ސަމިޓުގެ ތެރެއިން ކަމަށެވެ.
އެ ފަހުމުނާމާގައި ސޮއިކުރުމަށް ބޭއްވި ރަސްމިއްޔާތުގައި ފިނޭންސް މިނިސްޓަރު މޫސާ ޒަމީރު އާއި އެންވަޔަރަމަންޓް މިނިސްޓަރު ތާރިގު އިބްރާހީމްގެ އިތުރުން ޓީއެންސީގެ ގްލޯބަލް ޑިރެކްޓަރު މިސް މެލިސާ ބައިވެރިވެވަޑައިގަތެވެ.
އެ ފަހުމުނާމާގައި ސޮއިކުރުމުގެ ރަސްމިއްޔާތުގައި ޒަމީރު ވިދާޅުވީ ޓީއެންސީއާއެކު ގާއިމުކުރާ ޕާޓްނާޝިޕަކީ ދެމެހެއްޓެނިވި އަދި ފާގަތި މުސްތަގުބަލަކާ ދިމާއަށް އެޅޭ ފިޔަވަޅެއް ކަމަށާއި ގުދުރަތީ ގޮތުން ދިމާވާ ގޮންޖެހުންތަކާ ގުޅުންހުރި ހައްލުތަކަށް ދެމެހެއްޓެނިވި ފައިނޭންސިން ހޯދުމަކީ ކުރިއެރުމަށް ވަރަށް މުހިންމު ކަމެއް ކަމަށެވެ.
މީގެ އިތުރުން ކާބަން ފައިނޭންސިން އާއި ކޮންޒަވޭޝަން ޓްރަސްޓް ފަންޑުތަކާއި ސަރުކާރާއި އަމިއްލަ ފަރާތްތަކުގެ ބައިވެރިވުން ހިމެނޭ ގޮތަށް މާލީ ވަސީލަތްތައް ބޭނުންކޮށްގެން ރައްޖޭގެ ތިމާވެށި ރައްކާތެރިކުރުމާއެކު އިގުތިސާދު ކުރިއެރުވުމުގެ މުހިންމު ކަމަށް އޭނާ އަލިއަޅުއްވައިލެއްވިއެވެ.
ރައީސް ޑރ. މުޙައްމަދު މުއިއްޒާއި ފިނޭންސް މިނިސްޓަރު މޫސާ ޒަމީރު: ތިމާވެށި ހިމާޔަތް ކުރުމުގެ މަސައްކަތްތަކަށް ފައިސާ ހޯދަން ސަރުކާރާއި ބައިނަލްއަގުވާމީ ޖަމިއްޔާއަކާ ދެމެދު ވަނީ އެމްއޯޔޫއެއްގައި ސޮއިކޮށްފައި -- ފޮޓޯ/ ރައީސް އޮފީސް
ފިނޭންސް މިނިސްޓްރީން ބުނީ އެ ޕާޓްނާޝިޕް މެދުވެރިކޮށް ފަހިކުރެވޭ ފައިނޭންސިން ނިޒާމުތަކުން ފައިސާ ހޭދަކުރާނީ ތިމާވެށި ހިމާޔަތް ކުރުމުގެ މަސައްކަތްތަކަށާއި ރަށްރަށުގެ އިގުތިސާދު ކުރިއެރުވުމަށް މޫސުމަށް އަންނަ ބަދަލުތަކާ ކުރިމަތިލުމުގެ ގާބިލުކަން އިތުރުކުރުމަށް ކަމަށެވެ.
އެ ޕާޓްނާޝިޕް މެދުވެރިކޮށް ކުރާ މަސައްކަތްތަކުގެ އަލީގައި ރާއްޖޭގެ މެދު ރާސްތާގެ މެކްރޯ ފިސްކަލް ސްޓެބިލިޓީއާއި ދަރަނީގެ ދެމެހެއްޓެނިވިކަން ކަށަވަރު ކުރުމަށް އިތުރު ބާރެއް ލިބޭނެ ކަމަށް ވެސް މިނިސްޓްރީން ބުންޏެވެ.
ޓީއެންސީއަކީ ތިމާވެށި ހިމާޔަތް ކުރުމުގެ ދާއިރާގައި ދުނިޔޭގެ ފެންވަރުގައި އިސް ދައުރެއް އަދާކުރާ ޖަމިއްޔާއެކެވެ. އެ ޖަމިއްޔާއިން 70އަށް ވުރެ ގިނަ ގައުމުތަކުގައި މަސައްކަތް ކުރަމުންދަނީ ވެށި ހިމާޔަތް ކުރުމަށާއި މޫސުމަށް އަންނަ ބަދަލުތަކާ ކުރިމަތިލުމަށާއި ތިމާވެއްޓާއި މުސޫމަށް އަންނަ ބަދަލުތަކާ ގުޅޭ ކަންކަން ކުރިއެރުވުމަށެވެ.
ފިނޭންސް މިނިސްޓްރީން ބުނީ، ތިމާވެއްޓާ ރަށްޓެހި ގްރީން ފައިނޭންސިންގެ އެހީގައި ބައެއް ގައުމުތަކުގެ ދަރަނި ކުޑަކުރުމުގެ މުއާމަލާތްތަކުގައި ޓީއެންސީން ކާމިޔާބުކަމާއެކު މަސައްކަތްކޮށްފައިވާ ކަމަށެވެ. އޭގެ ތެރޭގައި ގެބޮން، ބެލީޒް، ބާބަޑޮސް އަދި ސީޝެލްސް ހިމެނޭ ކަމަށް މިނިސްޓްރީން ބުންޏެވެ.