ގޮންޖެހުންތައް ބޮޑު އަހަރަކަށް ފަހު، ކުރު މުއްދަތުގައި ދަތިތައް ދިމާވި ނަމަވެސް ދިގު މުއްދަތުގައި އެންމެންނަށް ވެސް ފައިދާ ވާނެ ކަމަށް ވިދާޅުވެ، ރައީސް ޑރ. މުޙައްމަދު މުއިއްޒު އާ އަހަރުގެ ތަހުނިޔާ ފޮނުއްވައިފިއެވެ.
ފޭސްބުކްގައި ރައީސް ކުރެއްވި ޕޯސްޓެއްގައިވަނީ، 2024 ވަނަ އަހަރަކީ އުނދަގޫ ނިންމުންތަކެއް ނިންމަން ޖެހުނު، ގޮންޖެހުން ބޮޑު އަހަރެއް ކަމަށެވެ. ނަމަވެސް އޭގެ ތެރެއިން ކޮންމެ ދަތި ނިންމުމެއް ވެސް އެ މަނިކުފާނު ނިންމެވީ ރައްޔިތުންގެ ހައްގުގައި، މުޅި ރާއްޖޭގެ ފައިދާއަށް ޓަކައި ކަމަށް ރައީސް ވިދާޅުވިއެވެ.
"ކުރު މުއްދަތުގައި ކުދިކުދި ދަތިތަކެއް ކުރިމަތިވި ނަމަވެސް ދިގު މުއްދަތުގައި އެންމެންނަށް ފައިދާ ކުރާނެ. އިރާދަކުރެއްވިއްޔާ މި ނިންމުންތަކުގެ ފޮނި މީރުކަން އިސާހިތަކު ފެންނަން ފަށާނެ،" އެ މަނިކުފާނު ވިދާޅުވިއެވެ.
"ތިޔަ އެންމެހާ ރައްޔިތުންނަށް މިކަންކަމުގެ ލާބައާއި މަންފާ ލިބެން ފަށާނެ."
ރައީސް ވިދާޅުވީ މި ފެށުނު އަހަރަކީ ނިމުނު އަހަރަށްވުރެ ނިޔާމަ އަހަރަކަށް ވާނެ ކަމަށް އެ މަނިކުފާނު އުއްމީދު ކުރައްވާ ކަމަށެވެ. އެގޮތުން ރައްޔިތުންގެ ކެރިފޯރުންތެރިކަން އިތުރުވެ، އިގްތިސާދީ ގޮތުން ވަރުގަދަ، އަދި މިހާރަށް ވުރެ ބަދަހި މުޖުތަމައެއް ގާއިމުވާނެ އަހަރަކަށް ވުމަކީ އުއްމީދު ކަމަށް އެ މަނިކުފާނު ވިދާޅުވިއެވެ.
މީގެ އިތުރުން އާ އަހަރާ ގުޅުވައި ރައީސް ދެއްވި ރަސްމީ ޚިތާބުގައި ވެސް ވަނީ، 2025 ވަނަ އަހަރަކީ އުއްމީދީ އަހަރެއް ކަމަށް ވިދާޅުވެފައެވެ.
"މާތް ﷲގެ ވާގިފުޅާއެކު، މި އުފާވެރި ވަގުތާ ދިވެހިރާއްޖެ މި ބައްދަލުކުރަނީ އުންމީދުގެ ދަންމަރުތަކާ އެކީގައެވެ. ތަރައްޤީގެ ތަޞައްވުރުތަކާ އެކީގައެވެ. ދިވެހި އިސްލާމީ އަޚްވަންތަކަމާ އެކީގައެވެ." ޚިތާބުގައިވެއެވެ.
އެ މަނިކުފާނު ވިދާޅުވީ ދިވެހި ދައުލަތަކީ މިއަދު ވަކި އަމާޒުތަކަކަށް ދަތުރުކުރާ ދައުލަތެއް ކަމަށެވެ. އެ އަމާޒުތަކުގެ ތެރޭގައި ރާއްޖޭގެ އަމިއްލަ މިނިވަންކަމާއި، ދިވެހި ގައުމިއްޔަތު ދިފާއުކުރުމާއި ކޮންމެ ދިވެއްސަކަށް ބޯހިޔާވަހިކަން ކަށަވަރުކުރުމާއި ބޭސްފަރުވާއާއި އާންމު އަސާސީ ޚިދުމަތްތައް ޒަމާނީ ފެންވަރަށް ތަރައްގީކުރުން ހިމެނޭ ކަމަށް ރައީސް ވިދާޅުވިއެވެ.
މީގެ އިތުރުން ރާއްޖެއަށް ގެންނަ އުމްރާނީ ކުރިއެރުމާއި ދުސްތޫރީ އިސްލާހުތަކާއި އިގުތިސާދު ސިންދަފާތު ކުރުމުގެ މަސައްކަތްތައް އެ މަނިކުފާނު ފާހަގަކުރެއްވިއެވެ.
"މި ހުރިހައި ކަމަކާއެކީގައި ތަރައްގީވެފައިވާ ގައުމުތަކުގެ ސަފަށް ހިޖުރަކުރުމަށް ކުރަހާލެވިފައިވާ ސާފު މަގުޗާޓެވެ. ދިވެހިރާއްޖޭގެ ތަރައްގީގެ ދަތުރުގެ މިއަދުގެ އަމާޒަކީ މިއެވެ." ރައީސް ވިދާޅުވިއެވެ.
އެ މަނިކުފާނު ވިދާޅުވީ މި ފެށުނު އަހަރު ވާނީ އެ ކަންކަމުގެ އަމަލީ މަސައްކަތްތަކުގެ އަހަރު ކަމަށެވެ. އެގޮތުން، ރާއްޖޭގެ އެކިކަންކޮޅުތަކުގައި ތަރައްގީގެ އެކި މަޝްރޫއުތައް ފެށުމުން، އިގުތިސާދީ ފުދުންތެރިކަން އިއާދަވެ، މަސައްކަތްތެރީންނަށް ފުރުސަތުތައް ހުޅުވޭނެ ކަމަށް ރައީސް ވިދާޅުވިއެވެ.
"އެއާއެކު، އާންމު ތިޔާގިކަމެއް މުޅި ގައުމަށް ލިބެން ފަށާނެއެވެ." އެ މަނިކުފާނުގެ ޚިތާބުގައިވެއެވެ.
ރައީސް ވިދާޅުވީ އާ އަހަރުގައި އެންމެންގެ ފަރުދީ އަޒުމަކަށް ވާންވީ، ކަންކަމާ މެދު ހެޔޮ ރަނގަޅު ވިސްނުން ކުރިޔަށް ނެރެ، ސުލްހަ މަސްލަހަތު އިސްކުރުން ކަމަށެވެ. އަދި ތަރައްގީއާއި ހިތްހަމަޖެހުމުގެ ބިންގަލަކީ އަމާންކަމާއި އިޙްތިރާމާއި ކުލުނުވެރިކަން ކަމުން، މި ފެށުނު އަހަރަކީ ތަރައްގީގެ އަހަރަކަށް ހެދުމަށް ޓަކައި ކޮންމެ ރައްޔިތަކު ވެސް ކަންކަމާ މެދު ހެޔޮ ރަނގަޅު ވިސްނުން އިސްކުރުމަށް އެ މަނިކުފާނު އިލްތިމާސްކުރެއްވިއެވެ.
"އިރާދަކުރެއްވިއްޔާ 2025ވަނަ އަހަރަކީ ތިޔާގިކަމުގެ އަހަރެވެ. މަޝްރޫއުތަކުގެ އަމަލީ މަސައްކަތުގެ އަހަރެވެ. އެންމެން ގުޅިގެން ގައުމީ ތަރައްގީގައި އެއް އަމާޒަކަށް ދަތުރުކުރުމުގެ އަހަރެވެ. ދިވެހީންގެ ރާއްޖޭގެ އަންނަން އޮތް މުސްތަގުބަލަށް ޓަކައި ޒިންމާދާރުކަމާއެކީ ޤައުމު ބިނާކުރުމުގެ އަހަރެވެ." ރައީސް ވިދާޅުވިއެވެ.
ދެހާސް ތޭވީސް ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ވެރިކަމާ ހަވާލުވެވަޑައިގެންނެވި ރައީސް މުއިއްޒުގެ ސަރުކާރަށް އިގުތިސާދީ ގޮތުން ގިނަ ގޮންޖެހުންތަކެއް ކުރިމަތިވިއެވެ. އެގޮތުން ދަރަނި ބޮޑުވެފައިވާ ދަނޑިވަޅެއްގައި އާ ސަރުކާރުގެ މަސައްކަތްތައް ފެށިއިރު، ޑޮލަރުގެ ތާށިކަމާއެކު މަޝްރޫއުތައް މަޑުޖެހި، ބައިނަލްއަގުވާމީ އިދާރާތަކުން ފާޅުކުރަމުން ދިޔަ ކަންބޮޑުވުންތަކާ ކުރިމަތިލާން ޖެހުނެވެ.
މި ސަރުކާރުން ވަނީ ދަރަނިތައް އަދާކުރެވޭނެކަމުގެ ޔަގީންކަންދީ، އިސްލާހީ ފިޔަވަޅުތައް ތަންފީޒުކޮށް، އިގުތިސާދު ސިންދަފާތު ކުރުމަށް ކުރާ މަސައްކަތްތަކުން ރާއްޖޭގެ ތަރައްގީގެ ދުވެލި އަވަސްކުރެވޭނެ ކަމަށް ބުނެފައެވެ.
އެ އިސްލާހީ ފިޔަވަޅުތަކުގެ ތެރޭގައި، ޚަރަދު ބޮޑު އާސަންދައާއި ސަބްސިޑީ ނިޒާމަށް ބަދަލުތައް ގެނައުމާއި ޓެކްސް ބޭސް ފުޅާކުރުން ހިމެނޭއިރު، އޭގެ ސަބަބުން ދަތިތައް ކުރިމަތިވެދާނެ ކަމުގެ ކަންބޮޑުވުން ބައެއް ރައްޔިތުން ފާޅުކުރެއެވެ.