ރާއްޖޭގައި އެންމެ ފުޅާކޮށް ފަތުރުވެރިކަމުގެ ޚިދުމަތްދޭ ސަރަހައްދުތަކުގައި އެ ޚިދުމަތް ދެނީ ގަވާއިދާ އެއްގޮތަށްތޯ ބެލުމަށް ދެ ހަފުތާތެރޭ އިންސްޕެކްޝަނެއް ފެށުމުގެ މަސައްކަތް ކުރާކަމަށް ޓޫރިޒަމް މިނިސްޓްރީން މިއަދު ބުނެފިއެވެ.
މިއަދު މަޖިލީހުގައި ބޭއްވި ގަވާއިދު ކޮމިޓީގައި ވާހަކަދައްކަވަމުން މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ، މި އިންސްޕެކްޝަން ހިންގާނީ އެހެން މުއައްސަސާތަކުގެ އެހީތެރިކަމާ ވެސް އެކުގައި ކަމަށެވެ.
"މިވަގުތު އަޅުގަނޑުމެންގެ ރިސޯސަސް ހުރި ގޮތުން، އެހެން މުއައްސަސާތަކުގެ އެހީތެރިކަމާއެކު އަޅުގަނޑުމެން މިކަން ކުރާ ސަބަބަކީ ވެސް ތަންކޮޅެއް ފުޅާ ދާއިރާއެއްގައި މި އިންސްޕެކްޝަން ހިންގުން،" އޭނާ ވިދާޅުވިއެވެ.
ނާޒިމް ވިދާޅުވީ، މިނިސްޓްރީގެ ޑޭޓާބޭސްތަކުން އެނގޭނީ ހަމަ އެކަނި ލައިސަންސްއަށް އެދި ހުށަހަޅާ، އެ ލައިސަންސް ދޫކޮށްފައިވާ ފަރާތްތައް ކަމަށެވެ.
"އެހެންވީމަ މިސާލަކަށް ލައިސަންސާ ނުލާ ބަޔަކު ތަނެއް ހިންގި ކަމުގައި ވީނަމަވެސް، އަޅުގަނޑުމެންނަށް ޝަކުވާއެއް ނުލިބޭކަމަށް ވަންޏާ އަދި ކައުންސިލަކުން ނާންގާކަމަށް ވަންޏާ މިނިސްޓްރީއަށް ގިނަ ފަހަރަށް މި އޮންނަނީ ނޭނގިފައި،" އޭނާ ވިދާޅުވިއެވެ.
ގަވައިދާ ޚިލާފަށް ހިންގާ ތަންތަން އެނގެނީ ހާދިސާއެއް ހިނގާ ރިޕޯޓެއް ލިބުނީމައި ކަން ފާހަގަކުރައްވައި އޭނާ ވިދާޅުވީ، މިފަދަ އިންސްޕެކްޝަނެއް ފެށުމުގެ ބޭނުމަކީ އެގޮތަށް ހިންގާ ތަންތަން ހުއްޓުވުން ކަމަށެވެ.
މިފަހުން ސްނޯކްލިންއަށް ގޮސް އުޅެނިކޮށް، ފަތުރުވެރިއަކާއި ސްޓަޑީ ޓުއާއެއްގައި އައި ކުޑަކުއްޖަކު މަރުވި ދެ ހާދިސާއެއް ހިނގައިފައިވެއެވެ.
މިކަމާ ގުޅިގެން މިއަދު ކޮމިޓީގައި ވާހަކަ ދައްކަވަމުން ނާޒިމް ވިދާޅުވީ، މިފަދަ ހާދިސަތައް މަދުކުރުމަށް ވެސް ފުލުހުންނާ އެކު ކޮމިޓީއެއް އެކުލަވާލައި ބާރު ސްޕީޑުގައި މަސައްކަތް ކުރަމުން އަންނަ ކަމަށެވެ.