އއ. ރަސްދޫގައި މިދިޔަ މަހުގެ 14ވަނަ ދުވަހު ސްނޯކްލިންއަށް ގޮސް އުޅެނިކޮށް ފަތުރުވެރިއަކު މަރުވި ހާދިސާއެއް ހިނގާފައިވާއިރު، ފަތުރުވެރިޔާ ސްނޯކްލިންއަށް ގެންދިޔަ އެކްސްކާޝަން ސެންޓަރުގެ ލައިސަންސް އޮތީ ހަމަވެފައި ކަމަށް މިއަދު ޓޫރިޒަމް މިނިސްޓްރީން ބުނެފިއެވެ.
މި ހާދިސާގައި މަރުވީ، އުމުރުން 27 އަހަރުގެ ޗައިނާ ފަތުރުވެރިއެކެވެ. އެ މީހާ ހެލްތު ސެންޓަރަށް ގެންދިޔައިރު ވެސް މަރުވެފައިވާ ކަމަށް ހެލްތު ސެންޓަރާ ހަވާލާދީ ފުލުހުން ބުންޏެވެ.
މިއަދު މަޖިލީހުގައި ބޭއްވި ގަވާއިދު ކޮމިޓީގައި މިހާދިސާއާ ގުޅޭ ގޮތުން ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް ވަނީ ޓޫރިޒަމް މިނިސްޓްރީއާ ސުވާލު ކުރައްވައިފައެވެ.
އެ ސުވާލަށް ޖަވާބު ދެއްވަމުން މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ، ފަތުރުވެރިޔާ ސްނޯކްލިންއަށް ގެންދިޔަ އެކްސްކާޝަން ސެންޓަރަކީ ރަޖިސްޓްރީކޮށްގެން ހިންގި ތަނެއް ކަމަށެވެ.
ނަމަވެސް، އެ ހާދިސާ ހިނގީ އެ ސެންޓަރުގެ ލައިސަންސް މުއްދަތު ހަމަވެފައި ވަނިކޮށްކަން އޭނާ ފާހަގަކުރެއްވިއެވެ.
"އެހެން ނަމަވެސް އަޅުގަނޑުމެންނަށް ފާހަގަވީ ހާދިސަ ހިނގުމަށްފަހުގައި އެ ފަރާތުން ރަޖިސްޓްރީ ކުރުމަށްޓަކައި އެޕްލިކޭޝަނެއް ލާފައި އޮތްކަން،" އޭނާ ވިދާޅުވިއެވެ.
ނާޒިމް ވިދަޅުވީ، މިކަމާ ގުޅޭ ގޮތުން އިންޓާނަލް ބައްދަލުވުމެއް ކުރިއަށް ގެންދިޔަ ކަމަށެވެ. އަދި ގާނޫނުގައި އެޅެން އޮތް އެންމެ ބޮޑު ފިޔަވަޅެއް އެ އެކްސްކާޝަން ސެންޓަރާ މެދު އަޅާނެކަމަށް އޭނާ ވިދާޅުވިއެވެ.
މުހައްމަދު އިބްރާހީމް ވަނީ މިފަދަ ހާދިސާތަކުގެ ސަބަބުން ރާއްޖޭގެ ފަތުރުވެރިކަމަށް ވަރަށް ބޮޑު ގެއްލުމެއް ލިބޭނެކަން ފާހަގަކުރައްވާފައެވެ. އަދި އެ ގެއްލުން ކުޑަކުރަން ކުރަނީ ކޮންކަމެއްތޯ ވެސް އޭނާ ސުވާލު ކުރެއްވިއެވެ.
އެ ސުވާލަށް ޖަވާބުދެއްވަމުން ނާޒިމް ވިދާޅުވީ، މިނިސްޓްރީގެ ވެސް އެންމެ ބޮޑު ކަންބޮޑުވުމަކީ ގާނޫނުން ލާޒިމްކޮށްފައި އޮތް ގަވާއިދެއް ތަންފީޒު ނުކުރެވި އޮތް އޮތުން ކަމަށެވެ.
ދާދި ފަހުން ހިނގި މިފަދަ ދެ ހާދިސާއާ ގުޅިގެން މިހާރު ފުލުހުންނާއި މިނިސްޓްރީ ގުޅިގެން ކޮމިޓީއެއް ވެސް އެކުލަވާލައިފައި ވާކަމަށް ނާޒިމް ވިދާޅުވިއެވެ. އަދި މި މައްސަލަތައް ތަހުގީގުކުރުން ބާރު ސްޕީޑުގައި ކުރިއަށްދާކަމަށައި މިފަދަ ކަމެއް ތަކުރާރުވިޔަ ނުދިނުމަށްޓަކައި ކުރަން ޖެހޭ ކަންކަން ވެސް ފުލުހުންނާ ގުޅިގެން ކުރަމުން އަންނަ ކަމަށް އޭނާ ވިދާޅުވިއެވެ.
ސިންގަޕޫރުގެ ސްކޫލަކުން ސްޓަޑީ ޓުއާއެއްގައި އދ. ދިގުރަށަށް ގޮސް އުޅެނިކޮށް ކަނޑުމަތީގައި ހިނގި ހާދިސާއެއްގައި 15 އަހަރުގެ އަންހެން ކުއްޖަކު މިދިޔަ ހުކުރު ދުވަހު މަރުވެފައިވެއެވެ.
ފުލުހުން ބުނެފައިވާ ގޮތުގައި އެ ކުއްޖާ މަރުވީ ދިގުރަށް ކައިރިއަށް ސްނޯކްލިންއަށް ގޮސް، ދޯނިން ފުންމާލި ވަގުތު ބުރަފަތީގައި ޖެހިގެންނެވެ.