މި ސަރުކާރަށް އަހަރެއް ފުރޭއިރު ލޯން ނަގައިފައިނުވާ ކަމަށް ބުނާ ނަމަވެސް، ލޯނުގެ ގޮތުގައި 8.8 ބިލިއަން ރުފިޔާ ނަގައިފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުން ދައްކާ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް މިރޭ ވިދާޅުވެއްޖެއެވެ.
އެމްޑީޕީން 'ފުދިއްޖެ-ފުނޑިއްޖެ'ގެ ނަމުގައި ބޭއްވި ޖަލްސާގައި ޞާލިޙް ވިދާޅުވީ މި އަހަރުގެ ބަޖެޓު ހުސްވިއިރުގައި ދައްކަން ހުރި ލޯންތަކުގެ ތެރެއިން ދެއްކެން ހުރި އެއްވެސް ލޯނެއް މި ސަރުކާރުން ދައްކައިފައި ނުވާ ކަމަށެވެ. އަދި އިންޑިއާއަށް ދައްކަން އޮތް 100 މިލިއަން ޑޮލަރު ޗައިނާއަށް ދައްކަން ޖެހޭ 75 މިލިއަން ޑޮލަރު އެގައުމުތަކުން ފަސްކޮށްދީފައިވާކަން އެ މަނިކުފާނު ފާހަގަކުރެއްވިއެވެ.
"ދެން ކޮން ކަމެއްތޯ ކުރީ މި 49 ބިލިއަން ރުފިޔާއިން. ދޮގު ހަދަމުންހަދަމުން ގޮސް އިއްޔެ ރޭ ވިދާޅުވީ ކީކޭތޯ، މި އަހަރު މި ނިންމާލަނީ އެއްވެސް ދަރަންޏެއް ނުނަގަޔޭ، ލޯނެއް ނުނަގަޔޭ. އެހެންނަމަވެސް 55 ބިލިއަން ރުފިޔާގެ ބަޖެޓެއް ހުސްކުރާއިރުގައި އާމްދަނީގެ ގޮތުގައި މި ލިބެނީ 35 ބިލިއަން ރުފިޔާ. އަނެއް ބައި ހޯދީ ކިހިނެއްތޯ؟" ޞާލިޙް ސުވާލު އުފެއްދެވިއެވެ.
"އެކަމަކު އެމްއެމްއޭއިން ލިބެން ހުރި މައުލޫމާތު އެބަ އެނގޭ މި އަހަރު ތެރޭގައި ޑޮމެސްޓިކް މާކެޓުން 8.8 ބިލިއަން ރުފިޔާ ނަގާފައި އޮތްކަން؛ މިއީ ލޯނެއް ނޫންތޯ، މިއީ ދަރަންޏެއް ނޫންތޯ."
އެ މަނިކުފާނު ވިދާޅުވީ މި ސަރުކާރުން ބޭރުން ނަގައިފައި ހުރި ލޯންތަކާއި ދީފައިވާ ގެރެންޓީގެ ތަފުސީލެއް ހާމަ ނުކުރާ ކަމަށާއި އެހެންވެ ދަރަނީގެ ހަގީގީ މިންވަރެއް ރައްޔިތުންނަށް ނޭނގޭ ކަމަށެވެ.
ޞާލިޙް ވިދާޅުވީ އެމްޑީޕީ ސަރުކާރުން ލޯނު ނެގި ކަމަށް މި ސަރުކާރުން ބުނަމުން އަންނައިރު، އެ ޕާޓީގެ ސަރުކާރުން އަމަލު ކުރި ގޮތާއި ކޮވިޑް-19ގެ ދުވަސްވަރު ރާއްޖެ އޮތް ހާލަތަށް ބަލަން ޖެހޭ ކަމަށެވެ. އަދި ދައުލަތެއްގައި އޮންނަ ވެރިކަމެއްގެ ބޭނުމަކީ އުނދަގޫ ދަނޑިވަޅުތަކުގައި ރައްޔިތުންނަށް އެހީވުން ކަމަށާއި އެ މަނިކުފާނުގެ ސަރުކާރުން އަމަލު ކުރީ އެގޮތަށް ކަމަށް ޞާލިޙް ވިދާޅުވިއެވެ.
ކޮވިޑްގެ ދުވަސްވަރުގެ މުވައްޒަފުންނަށް މުސާރަ ދީ، މީހުން ވަޒީފާއިން ވަކިނުކޮށް، ރިސޯޓުތަކުގެ ކުލި ފަސްކޮށްދިންކަން އެ މަނިކުފާނު ފާހަގަކުރެއްވިއެވެ.
"މިއަދު މި ހާލަތުގައި ގައުމު މި އޮތީ އެ ދުވަހު އެމަސައްކަތް ކުރީމައި. އަޅުގަނޑު ކެރިގެން މި ދަންނަވަނީ، އެއީ އަޅުގަނޑުމެން ކުރި ރަނގަޅު ކަމެއް. މިއަދު މި ގައުމު ސަލާމަތްވެފައި މި އޮތީ އެ ދުވަހު އަޅުގަނޑުމެން ކުރި މަސައްކަތުން،" ޞާލިޙް ވިދާޅުވިއެވެ.
އޭރު އިގުތިސާދު ކުރިއެރި ނަމަވެސް މިހާރު އިގުތިސާދީ ކުރިއެރުން ހުއްޓިފައިވާ ކަމަށާއި އޭގެ ސަބަބަކީ ސަރުކާރު ހިންގަން ނޭނގުން ކަމަށް އެ މަނިކުފާނު ވިދާޅުވިއެވެ.
މިދިޔަ ނޮވެމްބަރު މަހު ވެރިކަމަށް ވަޑައިގެންނެވި ރައީސް ޑރ. މުޙައްމަދު މުއިއްޒުގެ ސަރުކާރަށް ދިމާވެފައިވާ އެންމެ ބޮޑު ގޮންޖެހުންތަކުގެ ތެރޭގައި މިއަހަރާއި ކުރިއަށް އޮތް އަހަރުތަކުގައި ދައްކަން ޖެހޭ ބޮޑު ދަރަނިތައް ހިމެނެއެވެ. އޭގެ ސަބަބުން ބައިނަލްއަގުވާމީ މާލީ އިދާރާތަކުން ކަންބޮޑުވުން ފާޅުކޮށްފައިވާއިރު މި ސަރުކާރުން ވަނީ ޑީފޯލްޓްނުވެ، ދަރަނިތައް ދެއްކޭނެ ކަމުގެ ޔަގީންކަން ދީފައެވެ.