ހުޅުމާލޭގައި، ރޭ ކާރެއްގެ ތެރޭ މީހަކު ހިފަހައްޓައި ރަހީނުކުރި މައްސަލައިގައި ހައްޔަރުކުރި ފަސް މީހުންގެ ބަންދަށް ހުޅުމާލޭ މެޖިސްޓްރޭޓް ކޯޓުން ހަތް ދުވަސް ޖަހައިފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ ކާރެއް ތެރޭ ދިވެހި ފިރިހެނަކު ރޭ ރަހީނުކޮށް، އަނިޔާކޮށްފައިވާ ކަމަށެވެ.
އެ މީހާގެ އާއިލާއަށް ގުޅައި ފައިސާއަށް ޑިމާންޑުކޮށްފައިވާކަމަށް ވެސް ބުންޏެވެ.
އެ މައްސަަލައާ ގުޅިގެން ހައްޔަރުކުރިކަން ފުލުހުން ފުރަތަމަ ހާމަކުރީ އެންމެ މީހެކެވެ. އެއީ މާލޭ، ދަފްތަރު ރސ،9022 އުމުރުން 37 އަހަރުގެ ތޮލާލް މޫސާއެވެ.
ކާރެއް ތެރޭ މީހަކު ރަހީނުކުރި މައްސަލައިގައި ހައްޔަރުކުރި އެކަކު: އޭނާގެ ބަންދަށް ވަނީ ހަތް ދުވަސް ޖަހައިފައި --
މިއަދު ހަވީރު ފުލުހުން ބުނީ، އެ މައްސަލައާ ގުޅިގެން ތޮލާލްއާއެކު، އޭނާ ހައްޔަރުކުރި ސަރަހައްދުން ހަތަރު މީހަކު ހައްޔަރުކޮށްފައިވާ ކަމަށެވެ. އެއީ:
- ހދ. ކުމުންދާ، ރަތްބަގީޗާގެ، ހުސާމް އިބްރާހީމް (34އ)
- ގ. ކަޅަގާރިމާގެ، ހުސައިން ހައިކަލް ނިޔާޒު (23އ)
- ހދ. ކުމުންދޫ، ރަތްބަގީޗާގެ، އާދަމް ޝަރީފް (36އ)
- ހުޅުމާލެ ފްލެޓް ނަމްބަރު 71-1-04، އަހުމަދު ރިޝްފާން (26އ)
ފުލުހުން ބުނީ އެ ފަސް މީހުންގެ ބަންދާ މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން އެންމެން ވެސް ހަތް ދުވަހަށް ބަންދުގައި ބޭތިއްބުމަށް އެ ކޯޓުން އަމުރުކޮށްފައިވާ ކަމަށެވެ.
އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.
މިފަހުން މީހުން ރަހީނުކޮށް، ފައިސާ ފޭރުމުގެ މައްސަލަތައް ރިޕޯޓުކުރާ މިންވަރު އިތުރުވެފައިވެއެވެ. އެގޮތުން ހިޔާ ފުލެޓެއްގައި މީހަކު ރަހީނުކޮށް، އަނިޔާކުރި މައްސަލައެއް ވެސް މިދިޔަ ހަފުތާގައި ވެސް ފެންމަތިވެފައިވެއެވެ.