އިރުމަތީ މެދުތެރޭ ޗައިނާގެ ހެނާން ޕްރޮވިންސްގެ ވެރިރަށް، ޖެންގްޖޯއިން ދޮޅުގަޑިއިރު ދުއްވާފައި އައިސް އަޅުގަނޑު އިން ބަސް މަޑުކޮށްލީ އެ ޕްރޮވިންސްގެ އެހެން ސިޓީއެއް ކަމަށްވާ، ކައިފެންގްގައި ހުންނަ ޝިންމިން ޝެންހަން ޕާކު ކައިރިއަށެވެ. އޭރު މުޅި ސަރަހައްދަށް ހީވަނީ އީދެއް އައިސްގެން އުޅޭހެންނެވެ. ދެ ޖިންސުގެ އެކި އުމުރުގެ މީހުންނާއެކު މުޅި ސަރަހައްދު އޮތީ ފުރިފައެވެ. އޭގެ ތެރެއިން ގިނަ ބަޔަކު ތިބީ ޗައިނާގެ އެ ރީތި ސަފާގީ ހެދުންތަކުން ޒީނަތްތެރި ވެލައިގެންނެވެ.
ޓިކެޓް ގަނެގެން އެ ޕާކަށް ވަނުމަށް ހަދާފައި ހުރި ގޭޓު ފެނިފައި ވެސް މިއީ އާދައިގެ ކަމެއް ނޫންކަމުގެ އިހުސާސް ކުރެވުނެވެ. ދިގު ކިޔޫއެއްގައި ހުރެ ގޭޓުން އެތެރެވެލިއިރު ހަލަބޮލި އެ މާހައުލުން ފެނުނީ އިންތިހާއަށް ރީތި މަންޒަރުތަކެކެވެ. ޗައިނާގެ ގަދީމީ ޑިޒައިންގެ އިމާރާތްތަކާއި އެ ގައުމުގެ ގައުމީ އެކިއެކި މާތަކުން މުޅި ސަރަހައްދު އޮތީ ޒީނަތްތެރިކޮށްފައެވެ. ސަފާގީ ހެދުން ލައިގެން ޖިންސުއްލަތީފުން އެކި ގޮތްގޮތަށް ތިބެ ފޮޓޯ ނަގަމުން ދަނީއެވެ.
އެ ރީތި މަންޒަރުތަކަށް އާޝޯހު ވެފައި ހުއްޓާ އަޅުގަނޑުމެންގެ ގައިޑު އެ ޕާކާ ގުޅޭ މައުލޫމާތުތައް ހިއްސާކުރަން ފެށިއެވެ. ޒަންގް ޒެދުއަންގެ މަޝްހޫރު ކުރެހުން 'އަލޯންގް ދަ ރިވާ ޑިއުރިން ދަ ޝިންމިންގް ފެސްޓިވަލް'އަށް ބިނާކޮށް ހަދާފައިވާ މިޕާކުން މިތަނަށް ޒިޔާރަތް ކުރާ މީހުން ގެންގޮސް ދެނީ ޗައިނާގައި ދިގު މުއްދަތެއްގައި ވެރިކަން ކުރި ސޯންގް ޑައިނަސްޓީގެ ދައުރަށެވެ. އޭރުގެ އިމާރާތްތަކާއި އޭރުގެ އާދަކާދަތައް މި ރީތި ޕާކުގެ ތެރެއިން މިހިރީ ކުލަވާށެވެ. ރީތި ކުރެހުންތަކާއި އެކިއެކި ލިޔުންތަކުގެ އެހީގައި އެ ޒަމާނަށް މީހާގެ އިހުސާސްތައް ގެންގޮސްދެއެވެ.
މި ޕާކުތެރޭ އޮތް ކޯރުގައި ދުއްވާފައި އެ ދާ ދޯނިތަކުން ވެސް ދައްކުވައި ދެނީ އެ ޒަމާނުގެ ދަތުރުފަތުރެވެ. އަދި އެކި ހިސާބުތަކުގައި ހަދާފައި ހުރި ކާބޯތަކެތީގެ ފިހާރަތަކުގައި ވިއްކަނީ ސޯންގް ދައުރުގެ ރަހަތަކާއި މިޒަމާނުގެ ކެއުންތައް ވެސް އެކުލެވޭ ކާނާއެވެ. މި ތަނުގެ އިމާރާތްތަކުގެ ތަފުސީލަށް ދީފައިވާ ސަމާލުކަން އަހަރެންގެ ހިތްދަމައިގަތެވެ. ކޮންމެ އިމާރާތެއް ވެސް ހަދާފައި ހުރީ ސޯންގް ދައުރުގެ ފަންނުވެރިކަމާ އެއްގޮތަށެވެ. ގަދަރަތްކުލައާއި ކަޅު ކުލަ ގިނަ އަދަދަކަށް ބޭނުންކޮށްފައި އެ ޑިޒައިންތަކުގެ ފަންނުވެރިކަން ވަރަށް ވެސް ފުރިހަމައެވެ. އަދި އިމާރާތްތަކުގެ ކައިރީގައި ގިނަ އަދަދަކަށް ހައްދާފައި ހުރި މީރުވަސް ދުވާ މާތަކުން މުޅި ސަރަހައްދަށް އުޖާލާކަން ގެނުވައެވެ.
މި ރީތި އަޖައިބުގެ ތެރެއަށް ގެއްލިފައި ހުއްޓާ ގައިޑު އަވަސްވެގަތީ ވަކި ދިމާލަކަށް ދިއުމަށެވެ. އޭރު ޗައިނާ ބަހުން ވާހަކަ ދައްކާ އަޑާއި ގަދަ މިއުޒިކާއެކު ބާރުގަދަ އަޑެއް ދިޔައީ އިވެމުންނެވެ. ހިނގަމުން، ދުވަމުން އޭރު ގިނަ ބަޔަކު އެ އަޑު އަންނަ ދިމާލަށް ދިޔައީ މިސްރާބު ޖަހަމުންނެވެ. އެ މީހުންގެ ފަހަތުން އަޅުގަނޑުމވެސް ގޮސް އެތަނަށް ވަދެފީމެވެ.
އެއީ ކުރިމަތީގައި ސްޓޭޖަކާއި ބޮޑު ހުސްޖާގައެއް އޮތް ތަނެކެވެ. ވަށައިގެން ކަހަލަ ގޮތަކަށް އޮތީ ކުޅި ބަލަން ތިބޭ މީހުންނަށް ޚާއްސަ ސަރަހައްދެވެ. އެތަނަށް ވަދެ އިށީނދެ މާއިރުތަކެއް ނުވެ ސްޓޭޖް ތަމްސީލު ފެށިއްޖެއެވެ. މި ތަމްސީލުން ދައްކުވައިދެނީ އެ ޒަމާނުގައި ލަޝްކަރުގެ ޖެނެރަލެއް ކަނޑައެޅުމަށް ހަރަކާތްތައް ކުރިއަށްގެންދާ ގޮތެވެ.
ބޮޑެތި ދިދަތަކެއް ހިފައިގެން ތިބި ބަޔަކު އަސްތަކެއްގެ މަތީގައި އެއްކޮޅުން އަނެއްކޮޅަށް ދުއްވަމުން ދަނީއެވެ. އިރުކޮޅަކުން އަސްގާޑިޔާތަކުގައި މީހުން އަންނަން ފެށިއެވެ. ކުއްލިއަކަށް ދެން ފެންނަން ފެށީ ދެ ފައުޖެއްގެ މީހުން އަސްތަކެއްގެ މަތީ ސަވާރުވެ ތިބެ ކުރަމުން ދިޔަ ހަނގުރާމައެވެ. މި ތަމްސީލުން އެ ޒަމާނުގައި ހަނގުރާމަތައް ކުރަމުންދިޔަގޮތުގެ މަންޒަރުތައް ރީއްޗަށް ސިފަވެއެވެ. އަދި ޗައިނާ ބަހުން އެ މީހުން ދިޔައީ އެ ވަމުން ދިޔަ ކަންކަން ކިޔައިދެމުންނެވެ. މި ތަމްސީލު ބަލަން އެތައް ސަތޭކަ ބަޔަކު އާޝޯހުވެފައި ތިއްބެވެ.
މި ތަމްސީލު ނިމުމާއެކު އެންމެން ދެން މިސްރާބު ޖެހީ މި ޕާކުގައި ހުރި އެހެން އިމާރާތަކާ ދިމާލަށެވެ. އެތަނަށް ގޮސް ކިޔޫގައި އިރުކޮޅަކު މަޑުކޮށްލަން ޖެހުނެވެ. ދެން ވަދެވުނީ ވަރަށް ޒަމާނީކޮށް ހަދާފައިވާ ތަނަކަށެވެ. އެކިއެކި ލައިޓުތަކާއި ލެޑްތަކުން މުޅި ސަރަހައްދު އޮތީ ދިއްލާލާފައެވެ. ފަހުގެ ޓެކްނޮލޮޖީތައް ބޭނުންކޮށްގެން ހަދާފައިވާ މިތަނުގެ ތެރޭން އިރުކޮޅެއްގެ ތެރޭގައި ފެށުނީ ތިއޭޓްރިކަލް ޕާފޯމަންސްތަކެވެ. ގިނަ އަދަދެއްގެ ޖިންސުއްލަތީފުން މެދުވެރިކޮށް ހުށަހަޅައިދިން މި ޕާފޯމަސްތަކުން އެ ވެރިކަމުގެ ދުވަސްތައް މަންޒަރާއި އަޑުން މީހުންނަށް ދިޔައީ ސިފަކޮށްދެމުންނެވެ.
ބޮޑު ރަސްކަމެއްގެ ދުވަސްތައް ދައްކުވައިދިން މި ޕާކުގައި މުޅިން ހުރީ ތާރީހީ ތަންތަނެއް ވެސް ނޫނެވެ. މިތަން ޑިޒައިން ކޮށްފައި ހުރީ އެންމެންގެ ޝައުގުވެރިކަން ހޯދޭނެ ގޮތަށެވެ. އެގޮތުން ކުޑަކުދިންނާއި ޒުވާނުން އަރައި އެކިއެކި ކުޅިވަރުތައް ކުޅޭނެ ޒަމާނީ ތަންތަން ވެސް ހުރީ ހަދައިފައެވެ.
މިތަން ހަދާފައި ހުރީ އާއިލާތަކާއި އެކުވެރިންގެ އިތުރުން ލޯބިވެރިން މިތަނަށް އައިސް އޭރުގެ ތާރީހު ޒަމާނީ ވަސީލަތްތަކުގެ އެހީގައި ބަލައިލާ ވަރަށް އުފާވެރި މާހައުލެއް ތަޖުރިބާކުރެވޭނެ ގޮތަށެވެ. ފޫހިކަމެއްނެތި ތާރީހީ މައުލޫމާތުތައް ހޯދޭނެ ގޮތަށް ކުރެހުންތަކާއި ޑްރާމާތަކުގެ އިތުރުން ޕާފޯމަސްތައް ދިޔައީ ހުށަހަޅައިދެމުންނެވެ.
ހަމަ ގައިމުވެސް މީހަކު ހުރެ އޭރުގެ ވާހަކަތަކެއް ކިޔައި ދިނުމަށްވުރެން މިގޮތަށް މަންޒަރާއި އަޑު ބޭނުންކޮށްގެން ދެއްކުމުން އެ ބަލަން ތިބޭ ބަޔަކު ޝައުގުވެރިވެފައި އެ މައުލޫމާތު ސިނކުޑީގައި ގިނަ ދުވަހު ހަރުލާފައި ހުރުމަށް އެހީއަކަށް ވާނެއެވެ.
ދާރުލްއާސާރުތައް ވެސް އެހާ ޝައުގުވެރި
ރާއްޖޭގައި ހުންނަ ޗައިނާގެ އެމްބަސީގެ ދައުވަތަކަށް އަޅުގަނޑު ހެނާން ޕްރޮވިންސަށް މިދިޔަ ހަފުތާގައި ކުރި ހަ ދުވަހުގެ ދަތުރުގައި އެ ސިޓީގެ ގިނަ ތަންތަނަކަށް ޒިޔާރަތް ކުރުމުގެ ފުރުސަތު ލިބިގެންދިޔައެވެ. އޭގެ ތެރޭގައި ޝިންމިން ޝެންހަން ޕާކުގެ އިތުރުން ހެނާން މިއުޒިއަމްއަކީ ވެސް ވަރަށް ޝައުގުވެރިތަނެކެވެ. އެ ތަނުގައި 130،000 އަށް ވުރެ ގިނަ ސަގާފީ އާސާރުތައް ހުއްޓެވެ.
މި މިއުޒިއަމަކީ ޗައިނާގެ ތާރީޚުގެ ޚަޒާނާއެކެވެ. މިތަނުގައި ޗައިނާގެ އެންމެ ޒަމާންވީ ސަގާފަތް ދައްކުވައިދެއެވެ. މިއުޒިއަމްގެ ހޯލްތަކުގައި ހިނގާލާއިރު، ޔަންގްޝައޯ އަދި ލޯންގްޝާން ސަގާފަތުގެ ތާރީޚުގެ ކުރީގެ އަލާތްތަކާއި އޭރުގެ އިމާރާތްތަކާއި މީހުން ހިފާގެންގުޅޭ ތަކެއްޗަށް ދާންދެން ހުރީ ދައްކަން ބަހައްޓައިފައެވެ. އަދި ކުރީ ޒަމާނުގެ ސަގާފަތްތަކާއި ދީނީ ގަބޫލު ކުރުންތައް ވެސް މިތަނުން ދައްކުވައިދެއެވެ. މި މިއުޒިއަމްގައި ހުރި ގިނަ ތަކެއްޗަކީ ސީދާ އާކިއޮލޮޖިކަލް ސައިޓްތަކުން ހޯދާފައިވާ ސާމާނެވެ.
ރަށްފުޅު ދިރިއުޅުން ތަޖުރިބާކޮށް ޝަފާގަތް ދަސްކުރުން
ދެން ދެވުނު ތާރީހާ ގުޅޭ ޝައުގުވެރި އަނެއް ތަނަކީ ޔަންގްޖިއާމެން ވިލެޖެވެ. މިއީ ވެސް ސަފާގަތް ދައްކައިވައި ދިނުމުގައި ވަރަށް މޮޅު އުކުޅެކެވެ. މި ތަނަކީ ޗައިނާގެ ވިލެޖްތަކުގެ ދިރިއުޅުން ދައްކުވައި ދިނުމަށް ވިލެޖެއްގެ ގޮތަށް ތައްޔާރުކޮށްފައިވާ ތަނެވެ. މިތަނަށް ޒިޔާރަތްކުރާ މީހުންނަށް ޗައިނާގެ ރަށްފުށު ދިރިއުޅުން ފެނިގެން ދެއެވެ. ހަނި، މަގުތަކާއި ރީތިކޮށް ބަލަހައްޓާފައިވާ މިންގް އަދި ޗިންގް ދައުރުގެ އިމާރާތްތައް ހުންނަ މި ރަށަށް ވަނުމުން އެހެން ޒަމާނަކަށް ދެވޭކަމުގެ އިހުސާސް ކުރެވެއެވެ.
މިތަނުގެ ކޮންމެ އިމާރާތެއްގައި ވެސް ލަކުޑިން ކަނޑާފައިވާ ދޮރުތަކާއި، ހިލަ އަޅާފައިވާ ގޯތިތެރެތަކާއި، މަށިން ހަދާފައިވާ ފުރާޅުތަކުން ޗައިނާގެ އާދަކާދައިގެ ތަފުސީލުތައް ދައްކުވައިދެއެވެ. މި ރަށުތެރޭގައި ހިނގާލާއިރު، މަސައްކަތްތެރިން އެކިއެކި މަސައްކަތްކުރާ މަންޒަރު ފެނެއެވެ. އޭގެ ތެރޭގައި މިއުޒިކް ކުޅުމާއި މަށިން ތަފާތު އެއްޗެހި ހެދުން ފަދަ އާދަކާދައިގެ އަތްތެރި މަސައްކަތްތައް ހިމެނެއެވެ.
ފަރުބަދަމަތީ އުސް މި ހިސާބަކީ މަޑުމައިތިރި މާހައުލެކެވެ. މި ރަށް ވަށައިގެންވަނީ ފެހި ފަރުބަދަތަކާއި ދަނޑުތަކެވެ. ހަމަ ހިމޭން ދިރިއުޅުމެއް ތަޖުރިބާ ކުރަން ބޭނުންވާ މީހުންނާއި ފޮޓޯގްރާފަރުންނާއި ތާރީޚަށް ޝައުޤުވެރިވާ މީހުންނަށް، މި ވިލެޖު މިއީ ވަރަށް ޝައުގުވެރިތަނެކެވެ.
މިތަނުގައި ދުވަހު ކުއްޔަށް ދޭ ރޫމުތަކާއި ކެފޭތައް ހުރެއެވެ. އަދި ބާބަކިއު ހެދުންފަދަ އެކިއެކި ކަންކަން ކުރެވޭނެ ފުރުސަތު އޮތީ ފަހިކޮށްދީފައެވެ. މިއީ ސިޓީތަކުގެ ހަލަބޮލި ދިރިއުޅުމުން ދުރަށް ގޮސް، ޗައިނާގެ އަސްލު ރަށްފުޅު ދިރިއުޅުން ތަޖުރިބާކުރަން ބޭނުންވާ މީހުންނަށް ވަރަށް ރަނގަޅު ފުރުސަތެކެވެ. މިއީ ސަގާފަތް މީހުންނަށް ކިޔައިދޭން ވަރަށް މޮޅު ގޮތެކެވެ.
ކުންފުނިތަކުގައި ވެސް މިއުޒިއަމްތަކެއް
މި ދަތުރުގައި ގަދީމީ ތާރީހީ މިފަދަ ތަންތަނުގެ އިތުރުން ބައެއް ފެކްޓްރީތަކަށް ވެސް ދިއުމުގެ ފުރުސަތު ލިބިގެންދިޔައެވެ. އޭގެ ތެރޭގައި ދުނިޔޭގައި އެންމެ ގިނައިން އަދި އެންމެ ފުޅާދާއިރާއެއްގައި އިލެކްޓްރިކް ކާރު އުފައްދާ ބީވައިޑީގެ އިތުރުން ކޮމާޝަން ވެހިކަލް ފުޅާދާއިރާއެއްގައި އުފައްދާ ޔޫޓޮން ކުންފުނި ހިމެނެއެވެ. މި ދެތަނުން ވެސް އެންމެ ފާހަގަވީ ހަމަ އެންމެ ކަމެކެވެ. އެ ކުންފުނިތަކުގެ ތާރީހާއި އެތަންތަނުން ކޮށްފައިވާ މަސައްކަތްތަކާއި ހޯދާފައިވާ ކާމިޔާބީތައް ދައްކުވައި ދޭ ގޮތަށެވެ.
އެ ދެ އޮފީހަށް ވެސް ދިއުމާއެކު ގައިޑަކު ހަވާލުވިއެވެ. އެ މީހުންގެ ފަހަތުން ގޮސް ވަންނަން ޖެހުނީ އެ އޮފީސްތަކުގައި ހަދާފައިވާ މިއުޒިއަމެއްފަދަ ތަނަކަށެވެ. އެތަނުގައި ވީޑިއޯއާއި ފޮޓޯގެ އިތުރުން އެކިއެކި ޕްރޮޑަކްޓްތަކުގެ އަސްލު ބޭނުންކޮށްގެން ދައްކުވައި ދެނީ އެ ކުންފުނިތަކުން ކޮށްފައިވާ މަސައްކަތާއި ހޯދާފައިވާ ކާމިޔާބީތަކެވެ. އަދި އާ އީޖާދުތަކާއި ބޭނުން ކުރަމުން އަންނަ ޓެކްނޮލޮޖީތަކެވެ.
ޗައިނާގެ ތާރީހީ ތަންތަނަށް ދިއުމުން މުޅިންހެން ފެނުނީ އެތަންތަން ބަލަން ތޮއްޖެހިގެން މީހުން އެއްވެ ތިބި ތަނެވެ. އޭގެ ތެރޭގައި ގިނައިން ތިބީ އެ ގައުމުގެ ރައްޔިތުންނެވެ. އަޅުގަނޑުމެންގެ ރާއްޖެއަށް ބަލާއިރު ތާރީހީ ތަކެތި ގިނައިން ފެންނަން ހުރީ ބިއްލޫރި ފޮށިތަކެއްގެ ތެރޭގައި ބަހައްޓާފައި ހުއްޓައެވެ. ދެން ކޮންމެވެސް މީހަކު ކައިރީގައި ހުރެގެން އެއީ ކޯއްޗެއްކަން ބުނެދޭނީއެވެ.
އެކަމަކު ޗައިނާގައި ވަރަށް ތަފާތެވެ. ތާރީހާއި ސަގާފަތް ދައްކުވައި ދެނީ ހަމައެކަނި ބިއްލޫރި ފޮށިތަކެއްގެ އެހީގައެއް ނޫނެވެ. ޑްރާމާ ތަމްސީލުތަކާއި ޒަމާނީ އެކިއެކި ހުށަހެޅުންތަކުގެ އެހީގައި މީހުންގެ ޝައުގު ތާރީހަށް ހޯދައި މައުލޫމާތު ފޯރުކޮށްދެނީއެވެ. އަދި ސަގާފަތް ދައްކުވައިދޭ ތަންތަނުގައި މުނިފޫހިފިލުވުމުގެ ޒަމާނީ އެކިއެކި ގޮތްގޮތް ތައާރަފުކޮށް އެތަންތަން ހުންނަނީ އެކި އުމުރުގެ މީހުން އައިސް ހިތް އުފާ ކުރެވޭނެ ގޮތަށެވެ. ފޫހިކަމެއް ނެތި އުޅެވޭނެ ގޮތަށެވެ. މި ގޮތް ޝައުގުވެރިވެފައި، މާ ފުރިހަމައެވެ.