ރައްޔިތުން ނުރުހޭ ގޮތަށް އަމަލުކޮށްފި ހާލަތެއްގައި ރައްޔިތުންގެ މަޖިލިސް މެންބަރުން އެ މަގާމުން ދުރުކުރެވޭނެ ގޮތް ގާނޫނުގައި އޮންނަން ޖެހޭ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެއެވެ.
ދައުލަތުގެ މީޑިއާއަށް ދެއްވި ބަސްދީގަތުމެއްގައި އަބްދުއްރަޙީމް ވިދާޅުވީ، ރައީސުލްޖުމްހޫރިއްޔާއަކީ ޙައްގު ލިބިފައިވާ ހުރިހާ ރައްޔިތުންގެ ވޯޓުން ހޮވާ ވެރިއަކަށް ވާއިރު، ރައްޔިތުންގެ މަޖިލީހުގެ މެންބަރުންނަކީ އެ ދާއިރާއެއްގެ 5،000 މެންބަރުންގެ ތެރެއިން އިންތިޚާބުވާ ބަޔެއް ކަމަށެވެ.
މިގޮތުން، ރައީސުލްޖުމްހޫރިއްޔާ ކަންކުރައްވާ ގޮތަކުން ވަކި އިޖުރާތެއްގެ ތެރެއިން އެބޭފުޅަކު ވަކި ކުރުމުގެ ފުރުސަތު ގާނޫނު މެދުވެރިކޮށް ރައްޔިތުންގެ މަޖިލީހަށް ފަހިވެފައި އޮތް ނަމަވެސް، ރައްޔިތުންގެ މަޖިލިސް މެންބަރުން މަގާމުން ދުރުކުރެވޭނެ ގޮތެއް ގާނޫނުގައި ބަޔާންކޮށްފައި ނެތް ކަމަށް އޭނާ ވިދާޅުވިއެވެ.
އެއީ އެ ކަން އޮންނަންވީ ހަމަ ކަމަށް ގަބޫލުފުޅުނުކުރެއްވޭ ކަމަށް ވެސް އަބްދުއްރަހީމް ވިދާޅުވިއެވެ.
އަޅުގަނޑަށް ގަބޫލެއް ނުކުރެވޭ އެންމެ މަތީ ވެރިމީހާ ބަދަލުކުރުމުގެ ފުރުސަތު ފަހިވެފައި އޮވެފައި އޭގެ ދަށަށް އިންތިހާބުކުރެވޭ މީހުން ވަކިކުރެވޭ ގޮތް ނެތުމަކީ މި ޒަމާނާ ފައިހަމަވާ ކަމެއް ކަމަށްރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ
އެ މަނިކުފާނު ވިދާޅުވި ގޮތުގައި، އެ މެންބަރަކު ރައްޔިތުން އިންތިޚާބު ކުރި ފިކުރާ ދެކޮޅަށް މަސައްކަތް ކުރަން ފަށައި ނުވަތަ އެ ނޫން ވެސް ސަބަބެއް މެދުވެރިވާ ހާލަތެއްގައި އެ މެންބަރަކު އެ މަގާމަކުން ދުރުކުރެވޭނެ ގޮތެއް ގާނޫނުގެ ތެރެއިން ފަހިވެފައި އޮންނަން ޖެހޭނެއެވެ.
އެއީ އަބަދުވެސް ގަބޫލު ކުރައްވާ ހަމައެއްކަން ފާހަގަކުރައްވައި އޭނާ ވިދާޅުވީ، އެ ގޮތަށް އޮތުމުން ނޫނީ ޒަމާނާ ފައިހަމަވާ ކަަމަށް ގަބޫލުކުރައްވާ ކަމަށެވެ.