މީހުން ދިރިއުޅޭ 55 ރަށުގައި 500 މީހުން ހަމަނުވާ ކަމަށާއި ދިވެހިރާއްޖޭގެ އާބާދީއާއި ތަރައްގީ އެއްފަސްކޮށްގެން މެނުވީ ހުރިހާ ދިވެހީންނަށް ބޭނުންވާ ޚިދުމަތެއް ނުދެވޭނެ ކަމަށް ހައުސިން މިނިސްޓަރު ޑރ. އަލީ ހައިދަރު ރޭ ވިދާޅުވެއްޖެއެވެ.
ދައުލަތުގެ މީޑިއާގައި ވާހަކަދައްކަވަމުން މިނިސްޓަރު ވިދާޅުވީ، މާލެ ފިޔަވައި ރާއްޖޭގެ މީހުން ދިރިއުޅޭ 186 ރަށް އޮތްއިރު، އޭގެ ތެރެއިން 55 ރަށަކީ އާބާދީގައި 500 މީހުން ވެސް ހަމަނުވާ ރަށްތައް ކަމަށެވެ. އާބާދީ މަދު ރަށްތަކުގައި އަސާސީ ޚިދުމަތްތައް ވެސް އެންމެ އެކަށީގެންވާ ގޮތެއް ފޯރުކޮށްނުދެވޭ ކަމަށް މިނިސްޓަރު ވިދާޅުވިއެވެ.
އާބާދީ މަދު ރަށްތައް ތަރައްގީކުރުމުގެ ބަދަލުގައި ވަކި ރަށްތަކަކަށް އަމާޒުކޮށްގެން ތަރައްގީ ގެނެވިއްޖެނަމަ، ޚިދުމަތް ހޯދުމަށް މާލެއަށް ބަރޯސާވާން ޖެހިފައި އޮތްއޮތުމަށް ހައްލު އަންނާނެ ކަމަށް ހައިދަރު ވިދާޅުވިއެވެ. މިނިސްޓަރު ވިދާޅުވި ގޮތުގައި އާބަން ސެންޓަރުތަކެއް ތަރައްގީކުރުމުގެ އެންމެ ބޮޑު މަގުސަދަކީ އެއީއެވެ.
"... އޭގެ ފައިދާ މުޅި މުޖުތަމައަށް ވާނެ. މާލެއަށް ކޮންމެ ފަހަރަކު ޚިދުމަތެއް ހޯދަން އަންނަން ނުޖެހޭނެ ރައްޔިތުންނަކަށް. އެހެންވީމާ ރައްޔިތުންނާ ގާތުން އެ ހުރިހާ ޚިދުމަތްތަކެއް ލިބޭނެ ގޮތެއް ހަމަޖެހިގެންދާނެ. އެހެންވީމާ އެއީ އެންމެ ބޮޑު ބޭނުމަކީ، މަގުސަދަކީ އާބަން ސެންޓަރުތަކެއް ގާއިމުކޮށް، އެ ރަށްތަކަށް ފޯކަސްކޮށް އިންވެސްޓްމަންޓްތަކެއް ގެނައުން،" މިނިސްޓަރު ވިދާޅުވިއެވެ.
އަތޮޅު ތެރޭގައި ހަތް އާބަން ސެންޓަރެއް ބިނާކުރުމަކީ ސަރުކާރުގެ މެނިފެސްޓޯގައި ހިމެނޭ މުހިންމު ވައުދެކެވެ. އެއީ، މާލޭގެ އުތުރުން ތިން އާބަން ސެންޓަރާއި މާލޭގެ ދެކުނުން ހަތަރު އާބަން ސެންޓަރެވެ.
ހައިދަރު ވިދާޅުވި ގޮތުގައި އާބަން ސެންޓަރުގެ ގޮތުގައި ތަރައްގީކުރާނެ ރަށްތައް ކަނޑައެޅުމުގައި ބަލާފައިވާނީ އެ ރަށަކަށް ކޮށްފައިވާ އިންވެސްޓްމަންޓުތަކަށެވެ. އެ ގޮތުން ސިއްހީ، ތައުލީމީ އަދި އުމްރާނީ އެހެނިހެން ޚިދުމަތްތައް ދެވިފައިހުރި މިންވަރާއި، ރަށް އިތުރަށް ބޮޑުކުރެވޭނެތޯ، މިއީ އެ ރަށްތައް ކަނޑައެޅުމުގައި ބަލާފައިވާ ކަންކަމެވެ.
މިނިސްޓަރު ވިދާޅުވި ގޮތުގައި ހަތް އާބަން ސެންޓަރު ވެސް ތަރައްގީކުރުމަށް ހަމަޖެހިފައި އޮތީ މެދުރާއްޖޭގެ ތެރެއިން ކަނޑައެޅިފައިވާ ރަށްތަކުގައެވެ. އަދި، ރާއްޖޭގެ އުތުރާއި ދެކުނުގައި ވެސް ދެ ސަރަހައްދެއް އާބަން ރީޖަންގެ ގޮތުގައި ތަރައްގީ ކުރުމަށް އޮތީ ނިންމައިފައެވެ. މިނިސްޓަރު ވިދާޅުވި ގޮތުގައި އެ ތަންތަން ތަރައްގީ ކުރާނީ 100،000 މީހުންނަށް ދިރިއުޅެވޭ ގޮތަށެވެ. އެ ތަންތަނުގެ އާބާދީ 100،000އަށް ގެނެސްގެން ނޫނީ މަތީ ފެންވަރުގެ ޚިދުމަތްތައް ދޭން އުނދަގޫވާނެ ކަމަށް މިނިސްޓަރު ވިދާޅުވިއެވެ.
"ފަސް އަހަރު ދުވަހުގެ ތެރޭ އެ މަސައްކަތް ފަށައިގަނެގެން އަދި ދުވަސްކޮޅެއް ނަގާނެ އަޅުގަނޑު ހިތުން 100،000އާ ހިސާބަށް ފޯރަން. އެއީ މިހާރު ދެކުނުގެ ރީޖަންގައި އުޅެނީ 50،000 މީހުން. އުތުރުގައި ވެސް ހަމަ 55،000 ވަރު ގާތްގަނޑަކަށް މި އުޅެނީ އިނގޭތޯ. އެހެންވީމާ 100،000 ގެނެސްގެން ނޫނިއްޔާ ތަންކޮޅެއް މަތީ ފެންވަރުގެ ޚިދުމަތްތައް ދޭން އުނދަގޫވާނެ،" މިނިސްޓަރު ވިދާޅުވިއެވެ.
ސަރުކާރުގެ އަމާޒަކީ ޚިދުމަތްތައް ހޯދުމަށްޓަކައި މާލެއަށް ބަރޯސާވާން ޖެހިފައި އޮތްއޮތުން ނިމުމަކަށް ގެނައުމެވެ. އެ ގޮތުން ރާއްޖޭގެ އުތުރާއި ދެކުނުގައި ތަރައްގީކުރާ އާބަން ރީޖަންތަކުގައި މާލެއާ އެއްފެންވަރެއްގެ ޚިދުމަތްތައް ލިބިގެންދާނެ ކަމަށް ސަރުކާރުން ބުނެއެވެ.