ރައީސް ޑރ. މުހައްމަދު މުއިއްޒު އެތައް ޖަލްސާއެއްގައި ވިދާޅުވެ, އަދި އެ މަނިކުފާނުގެ މެނިފެސްޓޯގައި ވަރަށް ސާފުކޮށް ބަޔާން ކުރައްވާފައިވާ ކަންކަން، ވެރިކަމަށް ވަޑައިގަތުމަށް ފަހު ކުރައްވަމުން ގެންދަވަނީ ސީދާ ދިމާ އިދިކޮޅަށް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް މިއަދު ވިދާޅުވެއްޖެއެވެ.
ފައްޔާޒު މިހެން ވިދާޅުވީ، މި ސަރުކާރުން ރާއްޖޭގެ ހަތް ސަރަހައްދެއްގައި އާބަން ސެންޓަރު ބިނާކުރަންވީ ވައުދާ އަޅުވައި، ސިޔާސީ ބޭނުމަށް ދޮގު ޚަބަރު ފަތުރާތީ، އެކްސްގައި އެ ކަމާ ނުރުހުން ފާޅު ކުރައްވާފައިވަނިކޮށެވެ.
އަތޮޅު ތެރޭގައި ހަތް އާބަން ސެންޓަރެއް ބިނާކުރުމަކީ ސަރުކާރުގެ މެނިފެސްޓޯގައި ހިމެނޭ މުހިންމު ވައުދެކެވެ. އެއީ، މާލޭގެ އުތުރުން ތިން އާބަން ސެންޓަރާއި މާލޭގެ ދެކުނުން ހަތަރު އާބަން ސެންޓަރެވެ.
ރައީސްގެ ޕޯސްޓަށް ރައްދުދެއްވައި ފައްޔާޒު އެކްސްގައި ވިދާޅުވެފައިވަނީ ވެރިކަމަށް ވަޑައިގަތުމަށް ފަހު ރައީސް ކަންކުރައްވަމުން ގެންދަވަނީ ސީދާ އެ މަނިކުފާނު ވިދާޅުވިގޮތާ އަދި މެނިފެސްޓޯގައި ލިޔެފައިވާ ގޮތާ ވެސް ޚިލާފަށް ކަމަށެވެ. ރާއްޖޭގެ ހަތް ސަރަހައްދެއް އާބަން ސެންޓަރުތަކުގެ ގޮތުގައި ތަރައްގީކުރަން ސަރުކާރުން ނިންމީ، ރައްޔިތުންގެ ޚިޔާލު ހޯދުމެއް ނެތި ކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވި ގޮތުގައި މި ސަރުކާރުން އެކުލަވައިލާ ގައުމީ ތަރައްގީގެ 20 އަހަރުގެ މާސްޓަ ޕްލޭނާ އެއްގޮތަށް ވެސް ކަންކަން ނުކުރައްވާނެކަން ރައްޔިތުންނަށް މިއަދު ޔަގީންވެއެވެ. އޭނާ ތުހުމަތުކުރެއްވީ ރައީސް މުއިއްޒު ހުއްޓުމެއް ނެތި ހުސް އިތުރުފުޅު ހައްދަވަމުން ގެންދަވާ ކަމަށެވެ.
ރާއްޖޭގެ ހަތް ސަރަހައްދެއް އާބަން ސެންޓަރުގެ ގޮތުގައި ތަރައްގީކުރަން ސަރުކާރުން ނިންމިއިރު، އޭގެ ތެރެއިން ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައިވާތީ، އެމްޑީޕީގެ ރައީސް އަބްދުﷲ ޝާހިދު ވެސް ނުރުހުން ފާޅު ކުރައްވާފައިވެއެވެ.
އެ ކަން ރައްޔިތުންނަށް ސާފުކޮށްދޭން ޖެހޭ ކަމަށް އޭނާވަނީ ވިދާޅުވެފައެވެ.
މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމެއްކަން އޭނާ ފާހަގަކުރައްވާފައިވެއެވެ.
އާބަން ސެންޓަރުގެ ގޮތުގައި އަތޮޅުތެރޭގެ ހަތް ސަރަހައްދެއް ތަރައްގީކުރުމުގެ މަގުސަދަކީ، ލާމަރުކަޒީ ނިޒާމުން ރަށްތައް ހިންގުންކަން ފާހަގަކުރައްވައި އޭނާ ވިދާޅުވެފައިވަނީ، މި ކަމުގެ މަގުސަދަކީ މާލެއިން އެ ރަށްތައް ހިންގަން ފެށުން ކަމުގައި ވެގެން ނުވާނެ ކަމަށެެވެ.