ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅުގެ ދަށުން، ރާއްޖޭގައި ގާއިމުކުރާ އާބަން ސެންޓަރުގެ މަސައްކަތް ކުރާނީ ރައްޔިތުންނާއި ކައުންސިލަރުން އަދި ކަމާ ބެހޭ މީހުންގެ އެހީތެރިކަމާ އެކުގައި ކަމަށް އެމަނިކުފާނު މިއަދު ވިދާޅުވެއްޖެއެވެ.
އާބަން ސެނަޓަރުތަކާ ގުޅިގެން ރައީސް އެކްސްގައި ކުރެއްވި ޕޯސްޓެއްގައި ވަނީ، އާބަން ސެންޓަރު ގާއިމްކުރާނެ ގޮތް އެމަނިކުފާނުގެ މެނިފެސްޓޯގެ ޗެޕްޓަރު ހަތަރެއްގެ 12، 13 އަދި 14 ގައި ވަރަށް ސާފުކޮށް ބަޔާންކޮށްފައި ވާނެ ކަމަށެވެ. އަދި މެނިފެސްޓޯ އިފުތިތާހުކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެވާހަކަ ބަޔާންކޮށްފައި ވާނެކަމަށް ރައީސްގެ ޕޯސްޓުގައި ވެއެވެ.
އެމަނިކުފާނު ވިދާޅުވީ، އެމަނިކުފާނުގެ ސިޔާސަތަކީ މާލޭގެ އާބަން ރީޖަން ގެ އިތުރުން ރާއްޖޭގެ އެންމެ އުތުރުން ތިން އަތޮޅު ހިމެނޭހެން ނޯދަން އިންޓަގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސާދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުން ކަމަށެވެ.
އޭގެ އިތުރަށް ހަތް އާބަން ސެންޓަރު ރަށްރަށުގައި ތަރައްގީކުރައްވާނެ ކަމަށް ވެސް އެމަނިކުފާނުގެ ޕޯސްޓުގައި ވެއެވެ. އެއީ މާލޭގެ އުތުރުން ތިން އާބަން ސެންޓަރާއި މާލޭގެ ދެކުނުން ހަތަރު އާބަން ސެންޓަރެވެ.
"މިކަންކަމަކީ ކުރިޔަށްއޮތް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓަޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން،" އެ ޕޯސްޓުގައި ވެއެވެ.
ރައީސް ވަނީ ކަންކަމުގެ ހަގީގަތް ނުބަލާ، ނުވަތަ ހަގީގަތް އެނގިތިބެ، ސިޔާސީ ފައިދާ ހޯދުމުގެ ނިޔަތުގައި ބައެއް މީހުން ދޮގު ޚަބަރު ފަތުރާތީ ނުރުހުން ފާޅުކުރައްވާފައެވެ.
ރައީސް މިފަދައިން ޕޯސްޓު ކުރައްވައިފައި ވާއިރު، އާބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށްބުނެ އެމްޑީޕީގެ ރައީސް އަބްދުﷲ ޝާހިދު ވަނީ އެކްސްގައި ޕޯސްޓުކުރައްވާފައެވެ.
މިފަދަ ބޮޑެތި ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައި ދެކޭ ކަމަށާއި އާބަން ސެންޓާގެ ގޮތުގައި ރަށްތަކެއް ކަނޑައެޅުމުގެ މަގުސަދަކީ ލާމަރުކަޒީ ނިޒާމާއި ރަށްރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަންފެށުން ކަމުގައިވެގެން ނުވާނެ ކަމަށް ޝާހިދުގެ ޕޯސްޓުގައި ވެއެވެ.
އާބަން ސެންޓަރުތައް ގާއިމުކުރާ ހަތް ރަށް ހައުސިން މިނިސްޓްރީން އިއުލާނުކުރީ މިއަދެވެ.
އެ ރަށްތަކަކީ:
- ރ. އުނގޫފާރު
- ބ. އޭދަފުށި
- ޅ. ނައިފަރު
- އދ. މަހިބަދޫ
- ފ. ނިލަންދޫ
- ދ. ކުޑަހުވަދޫ
- ލ. ފޮނަދޫ