ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެއް ދުވަހެއްގައި ބާއްވަން މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ތާއީދުކުރާކަން، އެ ޕާޓީން މިރޭ ހާމަކޮށްފިއެވެ.
ދެ އިންތިޚާބު އެއް ދުވަހެއްގައި ބާއްވަން މަޖިލީހުން ވަނީ ފާސްކޮށްފައެވެ. އެ ގޮތުން، އަންނަ މަހުގެ ހަތަރުވަނަ ދުވަހު ބާއްވާ ލޯކަލް ކައުންސިލްތަކުގެ އިންތިޚާބާ އެކު، ދެ އިންތިޚާބު އެއް ދުވަހެއްގައި ބާއްވަން ރައްޔިތުންގެ ފެންނަ ނުފެންނަ ވޯޓެއް ނަގަން ވެސް ވަނީ ނިންމާފައެވެ.
އެމްޑީއޭއިން މިރޭ ނެރުނު ބަޔާނެއްގައި ބުނީ، ދެ އިންތިޚާބު އެއް ދުވަހެއްގައި ބޭއްވުމަކީ އެ ޕާޓީން ފުރިހަމައަށް ތާއީދުކުރާ ކަމެއް ކަމަށެވެ.
"މިއީ ރާއްޖޭގެ އިގުތިސާދީ ހާލަތާއި، ގައުމުގެ ސުލްހަމަސަލަސްކަމަށް ރިއާޔަތްކުރާއިރު، ދިވެހި ދައުލަތަށާއި، ރައްޔިތުންނަށް އެންމެ ފައިދާހުރި ގޮތް ކަމުގައި މި ޕާޓީން ދެކެމެވެ،" އެމްޑީއޭއިން ނެރުނު ބަޔާނުގައިވެއެވެ.
އެ ޕާޓީން ބުނީ، އެމްޑީއޭގެ ރައީސް އަހުމަދު ސިޔާމް މުހައްމަދަކީ ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި، އިގުތިސާދީ ގޮންޖެހުންތަކުން އަރައިގަންނަން ބޭނުންވާ ޒިންމާދާރު ސިޔާސަތުތައް އެކަށައަޅަން ވަކާލާތުކުރައްވާ ބޭފުޅެއް ކަމަށެވެ. މަޖިލީސް މެންބަރެއްގެ ހައިސިއްޔަތުންނާއި ވިޔަފާރިވެރިއެއްގެ ހައިސިއްޔަތުން ސިޔާމް އަބަދު ވެސް އިސްކަން ދެއްވަނީ އިގުތިސާދީ ހަމަޖެހުމާއި އިޖުތިމާއީ ބަދަހިކަމަށް ކަމުގައި ބަޔާނުގައިވެއެވެ.
"އިންތިޚާބުތައް އެއްކޮށްލުމަކީ ދައުލަތުގެ ޚަރަދުތައް ކުޑަކުރުމަށާއި ދަރަނި މެނޭޖްކުރަން ލިބޭނެ ވަރަށް ބޮޑު ލުޔެއް ކަމަށް ސަރުކާރުން ބުނާ ބުނުމަށް މި ޕާޓީން އިއުތިރާފުވަމެވެ،" ބަޔާނުގައިވެއެވެ.
އެމްޑީއޭއިން ބުނީ، ދެ އިންތިޚާބު އެއްކޮށްލުމަކީ ގައުމުގެ ކުރިއެރުމަށް އަޅާ ރަނގަޅު ފިޔަވަޅެއް ކަމަށެވެ.
އެހެންވެ، ރައްޔިތުންގެ މަޖިލީސް އިންތިޚާބާއި ރިޔާސީ އިންތިޚާބު އެއްކޮށް ބާއްވަން ސަރުކާރުން ނިންމި ނިންމުމަށް އެމްޑީއޭއިން ވަނީ މަރުހަބާ ކިޔާފައެވެ. އަދި، ޚަރަދު ކުޑަކޮށް، އިގުތިސާދު ވަރުގަދަކުރަން ދައުލަތުގެ ހުރިހާ މުއައްސަސާތަކުން ގުޅިގެން މަސައްކަތްކުރަން އެ ޕާޓީން ވަނީ ގޮވާލާފައެވެ.
"މި ޕާޓީ އަބަދު ވެސް ދެމިއޮންނާނީ ދިވެހި ރައްޔިތުންގެ އެންމެ މަތީ މަސްލަހަތު ހިމާޔަތްކުރުމުގައެވެ،" އެމްޑީއޭއިން ބުންޏެވެ.
އެ ޕާޓީން ވަނީ ގައުމުގެ ކުރިމަގަށާއި އިގުތިސާދީ ހަމަޖެހުމަށް ކުރާ ހުރިހާ މަސައްކަތްތަކުގައި ފުރިހަމައަށް އެއްބާރުލުން ދޭނެކަމުގެ ޔަގީންކަން ދީފައެވެ.
ދެ އިންތިޚާބު އެއްކޮށް ބާއްވަން މަޖިލީހުން ވަނީ ފާސްކޮށްފައެވެ. އެކަމަކު، ގާނޫނުއަސާސީގައި ވާގޮތުން އެ ބަދަލު ގެނައުމުގެ ކުރިން ރައްޔިތުންގެ ޚިޔާލު ހޯދަން ޖެހެއެވެ. އެހެންވެ، ސަރުކާރުން ނިންމީ ކައުންސިލް އިންތިޚާބާ އެކު އެ ވޯޓު ނަގާށެވެ.
އެމްޑީއޭއަކީ ރާއްޖޭގެ ހަތަރުވަނައަށް އެންމެ ބޮޑު ޕާޓީއެވެ. އެ ޕާޓީގައި، 9،000 އަށްވުރެ ގިނަ މެންބަރުން އެބަތިއްބެވެ. އަދި، އެ ޕާޓީގެ ޓިކެޓުގައި ދެ މެންބަރަކު މަޖިލީހަށް ވެސް އިންތިޚާބުވެވަޑައިގެންފައިވެއެވެ. އެއީ، އެ ޕާޓީގެ ރައީސް ސިޔާމްގެ އިތުރުން ވެލިދޫ ދާއިރާގެ މެންބަރު މުހައްމަދު އައްބާސްއެވެ.