އިނގިރޭސި ޕްރިމިއާ ލީގުގައި ތާވަލުގެ އެއްވަނައިގައި އޮތް ލިވަޕޫލުން އެސްޓަން ވިލާ ބަލިކޮށް، ލީޑު ފުޅާކޮށްފިއެވެ.
ލިވަޕޫލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-0 އިންނެވެ.
މެޗުގެ ފުރަތަމަ ލަނޑު މެޗުގެ 20 ވަނަ މިނެޓުގައި އުފެއްދި ކައުންޓާ އެޓޭކެއްގައި ކާމިޔާބުކޮށްދިނީ ޑާވިން ނޫނޭޒެވެ. މި ލަނޑު ޖެހިތާ މާ ގިނައިރުތަކެއްނުވެ، ނޫނޭޒަށްވަނީ އެ ޓީމުގެ ލީޑު ފުޅާކޮށްދޭނެ ރަނގަޅު ފުރުސަތެއް ލިބިފައެވެ. ނަމަވެސް، އެ ފުރުސަތުގެ ބޭނުން ހިފޭގޮތެއް ނުވިއެވެ.
ފުރަތަމަ ހާފުގައި ވިލާގެ އަމަޑޫ އޮނާނާއާއި ޑިއެގޯ ކާލޯސްއަށް ލަނޑު ޖަހާނެ ރަނގަޅު ދެ ފުރުސަތު ލިބިގެންދިޔައެވެ. ނަމަވެސް، ހާފު ނިމިގެންދިޔައީ އެއް ލަނޑު ސުން ލަނޑުން ލިވަޕޫލް ކުރީގައި އޮވެގެންނެވެ.
ދެވަނަ ހާފު ވިލާއިން ފެށީ ވަރަށް ފޯރީގައެވެ. މިގޮތުން މޯގަން ރޮޖާސްއަށް ލަނޑު ޖަހާނެ ރަނގަޅު ފުރުސަތެއް ލިބި ބޭކާރުވެގެންދިޔައެވެ. ހާފުގެ ކުޅުން ކުރިއަށް ދިޔަ ވަރަކަށް ދެ ޓީމުން ވެސް ދިފާއަށް ވިސްނާ ލިބޭ ފުރުސަތުތަކުގައި ކުރިއަށް އެރުމަށް ވިސްނައިގެން ކުޅުމުގެ ނަތީޖާއަށް ވެގެންދިޔައީ ދެ ޓީމަށް ވެސް އުފެއްދެމުންދިޔަ ހަމަލާ ތަންކޮޅެއް މަދުވެގެންދިއުމެވެ.
މެޗުގައި ވިލާއަށް ޕެނަލްޓީއެއް ލިބެން ޖެހޭނެކަމަށް އެ ޓީމަށް ގަބޫލުކުރެވުނު ނަމަވެސް ލިވަޕޫލްގެ ޕެނަލްޓީ އޭރިއާ ތެރެއިން ކޯނޯ ބްރެޑްލީ ވިލާގެ ޕައު ޓޯރޭޒްގެ ޖާޒީއަށް ދަމާ ވައްޓާލި ހާދިސާ ވީއޭއާރުން ބެލުމަށް ފަހު ވަނީ އެއީ ޕެނަލްޓީއެއް ނޫން ކަމަށް ނިންމާފައެވެ. ނަމަވެސް، މެޗުގެ ތެރޭގައި ޖާޒީއަށް ދެމުމުގެ ސަބަބުން ޖެހުން ދިނުމުގެ އިތުރުން ރިނދޫ ކާޑު ދައްކާފައިވާކަން ވެސް ފާހަގަވެގެންދިޔައެވެ.
މެޗުގައި ލިވަޕޫލުން ކާމިޔާބުކުރި ދެވަނަ ލަނޑު މެޗުގެ 84 ވަނަ މިނެޓުގައި އަނެއްކާ ވެސް އެ ޓީމުން އުފެއްދި ކައުންޓާ އެޓޭކެއްގައި ކާމިޔާބުކޮށްދީފައިވަނީ މުހައްމަދު ސަލާހެވެ. މިއީ މި މުބާރާތުގައި އޭނާ ކާމިޔާބުކުރި އަށްވަނަ ލަނޑެވެ.
މި ކާމިޔާބީއާ އެކު ލިވަޕޫލް މިހާރު އޮތީ ކުޅުނު 11 މެޗުން ލިބިފައިވާ 28 ޕޮއިންޓާ އެކު ތާވަލުގެ އެއްވަނައިގައި 5 ޕޮއިންޓްގެ ލީޑަކާ އެކުއެވެ. ވިލާ އޮތީ 18 ޕޮއިންޓާ އެކު ތާވަލުގެ އަށްވަނައިގައެވެ.
މުބާރާތުގައި ވުލްވަހެމްޕްޓަން ވޮންޑަރާސްއާއި ސައުތެމްޕްޓަން ބައްދަލުކުރި މެޗު 2-0 އިން ކާމިޔާބުކޮށް، ވުލްވްސްއިން ވަނީ ފުރަތަމަ ފަހަރަށް މި ފަހަރުގެ މުބާރާތުގައި މެޗެއް ކާމިޔާބުކޮށްފައެވެ.
މެޗުގައި ވުލްވްސްގެ ދެ ލަނޑު އެ ޓީމަށް ކާމިޔާބުކޮށްދިނީ ޕަބްލޯ ސަރާބިއާއާއި މެތިއަސް ކޫންޔާއެެވެ. މި ކާމިޔާބީއާ އެކު ވުލްވްސް މިހާރު ވަނީ ހަ ޕޮއިންޓާ އެކު ތާވަލުގެ 18 ވަނައަށް ކުރިއަށް ޖެހިލާފައެވެ. އަދި، ސައުތެމްޕްޓަން އޮތީ ހަތަރު ޕޮއިންޓާ އެކު ތާވަލުގެ އެންމެ ފުލުގައެވެ.