ޔުއޭފާ ޗެމްޕިއަންސް ލީގުގެ ލީގު ފޭސްގައި ސްޕެނިޝް ލަލީގާގެ އެފްސީ ބާސެލޯނާއިން ޖަރުމަނު ބުންޑެސްލީގާގެ ބޮރޫޝިއާ ޑޯޓްމުންޑް ބަލިކޮށްފިއެވެ.
ޑޯޓްމުންޑްގެ ދަނޑުގައި ކުޅުނު މި މެޗު ބާސާއިން ކާމިޔާބުކޮށްފައިވަނީ 3-2 އިންނެވެ.
ފަސް ލަނޑު ފެނުނު މި މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބުކުރެވޭގޮތެއް ނުވިއެވެ. ނަމަވެސް، ދެވަނަ ހާފުގެ ކުޅުން ފެށުނުތާ ހަތްވަނަ މިނެޓުގައި ބާސާގެ ކެޕްޓަން ރަފީނިއާ ކާމިޔާބުކޮށްދިން ލަނޑާ އެކު މެޗުގެ ލީޑު އެ ޓީމުން ނެގިއެވެ.
މި ލީޑު އެ ޓީމަށް ދެމެހެއްޓޭވަރުވީ އަށް މިނެޓް ވަންދެނެވެ. މެޗުގެ 60 ވަނަ މިނެޓުގައި ޑޯޓްމުންޑަށް ލިބުނު ޕެނަލްޓީއަކުން ވަނީ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ސާހޫ ގުރާސީއެވެ. މެޗުގައި ބާސާއިން ދެވަނަ ފަހަރަށް ލީޑު ނެގީ މެޗުގެ 75 ވަނަ މިނެޓުގައި ފެރާން ޓޯރޭޒް ކާމިޔާބުކޮށްދިން ލަނޑުންނެވެ.
ނަމަވެސް، މި ލަނޑު ޖެހިތާ ތިން މިނެޓް ފަހުން ގުރާސީވަނީ ދެވަނަ ފަރަހަށް ޑޯޓްމުންޑަށް މެޗުގެ ނަތީޖާ ހަމަހަމަކޮށްދީފައެވެ. މެޗުން ބާސާ މޮޅުވި ލަނޑު ޓޯރޭޒް ކާމިޔާބުކޮށްދީފައިވަނީ މެޗު ނިމެން ފަސް މިނެޓަށް ވެފައިވަނިކޮށެވެ.
މި ކާމިޔާބީއާ އެކު ބާސާ މިހާރު ވަނީ 15 ޕޮއިންޓާ އެކު ދެވަނައަށް ކުރިއަށް ޖެހިލާފައެވެ. ޑޯޓްމުންޑް އޮތީ 12 ޕޮއިންޓާ އެކު ނުވަވަނައިގައެވެ.
މި މުބާރާތުގައި އިނގިރޭސި ޕްރިމިއާ ލީގުގެ އާސެނަލާއި ފްރެންޗް ލީގު އާންގެ އޭއެސް މޮނާކޯ ބައްދަލުކުރި މެޗު 3-0 އިން ކާމިޔާބުކޮށް އާސެނަލް މިހާރު ވަނީ ތިންވަނައަށް ކުރިއަށް ޖެހިލާފައެވެ. މެޗުގައި އާސެނަލްގެ ތިން ލަނޑުގެ ތެރެއިން ދެ ލަނޑު ކާމިޔާބުކޮށްދީފައިވަނީ ބުކާޔޯ ސާކާއެވެ. ފަހު ލަނޑު ކާމިޔާބުކޮށްދިނީ ކައި ހަވާޓްޒެވެ.
މި ކާމިޔާބީއާ އެކު އާސެނަލަށް މިހާރުވަނީ 13 ޕޮއިންޓް ލިބިފައެވެ. މޮނާކޯ އޮތީ 10 ޕޮއިންޓާ އެކު 16 ވަނައިގައެވެ.
މީގެ އިތުރުން، ސްޕެނިޝް ލަލިގާގެ އެޓްލެޓިކޯ މެޓްރިޑާއި ސްލޮވާކް ސުޕާ ލީގާގެ ސްލޮވާން ބްރަޓިސްލާވާ ބައްދަލުކުރި މެޗު 3-1 އިން ކާމިޔާބުކޮށްފައިވަނީ އެޓްލެޓިކޯއެވެ. މެޗުގައި އެޓްލެޓިކޯގެ ތިން ލަނޑުގެ ތެރެއިން ދެ ލަނޑު އެންޓޮއިން ގްރީޒްމަން ކާމިޔާބުކޮށްދިންއިރު ތިންވަނަ ލަނޑު ކާމިޔާބުކޮށްދީފައިވަނީ ހޫލިއަން އަލްވަރޭޒެވެ. ބްރަޓިސްލާވާގެ ހަމައެކަނި ލަނޑު ކާމިޔާބުކޮށްދިނީ ޑޭވިޑް ސްޓްރެލެކެވެ.
މި ކާމިޔާބީއާ އެކު އެޓްލެޓިކޯ 12 ޕޮއިންޓާ އެކު 11 ވަނައިގައި އޮތްއިރު ބްރަޓިސްލާވާ އޮތީ ޕޮއިންޓެއް ނުލިބި 35 ވަނައިގައެެވެ.