ޖަރުމަނު ބުންޑެސްލީގާގައި ތާވަލުގެ އެއްވަނައިގައި އޮތް ބަޔާން މިޔުނިކުން އެފްސީ ސެއިންޓް ޕައުލީ ބަލިކޮށް، ލީޑު ފުޅާކޮށްފިއެވެ.
ޕައުލީގެ ދަނޑުގައި ކުޅުނު މި މެޗު ބަޔާނުން ކާމިޔާބުކޮށްފައިވަނީ 1-0 އިންނެވެ.
މެޗުގައި ބަޔާނުން ކާމިޔާބުކުރި ހަމައެކަނި ލަނޑު އެ ޓީމަށް ކާމިޔާބުކޮށްދިނީ މެޗުގެ 22 ވަނަ މިނެޓުގައި ޖަމާލް މުސިއެލާއެވެ. ޕެނަލްޓީ އޭރިއާ ބޭރުން އޭނާއަށް ލިބިގެން ދިޔަ ބޯޅަ ކޮންޓްރޯލް ކޮށްލުމަށް ފަހު ގޯލަށް ފޮނުވާލި ހަމަލާ ވަދެފައިވަނީ ހުރަސް ދަނޑީގައި ޖެހިފައެވެ.
މި ކާމިޔާބީއާ އެކު ބަޔާނުން ވަނީ މިހާތަނަށް ކުޅުނު 10 މެޗުން ލިބިފައިވާ 26 ޕޮއިންޓާ އެކު ތާވަލުގެ އެއްވަނައިގައި އެ ޓީމަށް ލިބިފައިވާ ލީޑު ފަސް ޕޮއިންޓަށް ފުޅާކޮށްފައެވެ. މެޗުން ބަލިވުމުން ޕައުލީ އޮތީ އަށް ޕޮއިންޓާ އެކު ތާވަލުގެ 15 ވަނައިގައެވެ.
ދެވަނައިގައި އޮތް އާރްބީ ލެއިޕްޒިގާއި މޮންޗެންގްލަޑްބެކް ބައްދަލުކުރި މެޗު ލަނޑެއް ނުޖެހި ނިމުނީ އެއްވަރުވެގެންނެވެ. ލެއިޕްޒިގްގެ ދަނޑުގައި ކުޅުނު މެޗުން ލިބުނު ޕޮއިންޓާ އެކު އެ ޓީމަށް މިހާރު ލިބިފައިވަނީ 21 ޕޮއިންޓެވެ.
އެންމެ ފަހުގެ ޗެމްޕިއަން ބަޔޭ ލެވަކޫސެންއާއި ވީއެފްއެލް ބޯކަމް ބައްދަލުކުރި މެޗު 1-1 އިން ވީ އެއްވަރެވެ. މެޗުގެ ލީޑު މެޗުގެ 18 ވަނަ މިނެޓުގައި ޕެޓްރިކް ޝިކް ޖަހާދިން ލަނޑުން ލެވަކޫސެންއިން ނެގިއިރު ބޯކަމްއަށް މެޗުގެ ނަތީޖާ އެއްވަރުކޮށްދިނީ މެޗު ނިމެން އެއް މިނެޓަށް ވެފައިވަނިކޮށް ކޯޖީ މިޔޯޝީއެވެ.
މެޗު އެއްވަރުވުމުން ލެވަކޫސެން މިހާރު އޮތީ 17 ޕޮއިންޓާ އެކު ތާވަލުގެ ހަތަރުވަނައިގައެވެ.