އިނގިރޭސި ޕްރިމިއާ ލީގުގެ ޗެމްޕިއަން މެންޗެސްޓާ ސިޓީގެ ކޯޗު ޕެޕް ގާޑިއޯލާ އެ ޓީމުގައި އިތުރު ދެ އަހަރު މަޑުކުރަން ނިންމާ އެއްބަސްވުމުގައި ސޮއިކޮށްފިއެވެ.
އިނގިރޭސި ނޫސްތަކުން މީގެ ދެތިން ދުވަސް ކުރިން ޕެޕް އެއް އަހަރު މަޑު ކުރަން ނިންމާފައިވާކަން ހާމަކުރި ނަމަވެސް އެންމެ ފަހުން ކްލަބުން އާންމުކުރިއިރު މިވަނީ އެއްބަސްވެފައިވަނީ ދެ އަހަރަށްކަން ކަށަވަރު ކޮށްދީފައެވެ. މިއާ އެއްބަސްވުމުގެ ދަށުން ޕެޕް އެ ކްލަބްގައި 2027 ވަނަ އަހަރުގެ ސީޒަން ނިމެންދެން ހުންނާނެއެވެ.
ސިޓީއާ އެކު ޕެޕް ކުރިން ހަދާފައިވާ އެއްބަސްވުން އޮތީ މި ސީޒަނުގެ ނިޔަލަށް ހަމަވާގޮތަށެވެ.
އެއްބަސްވުން އާ ކުރުމަށްފަހު ސިޓީގެ ވެބްސައިޓަށް ދިން އިންޓަވިއުއެއްގައި ޕެޕް ބުނީ، އޭނާ ކްލަބްގައި މަޑުކުރަން ނިންމުމުގެ އެންމެ ބޮޑު އެއް ސަބަބަކީ ކްލަބަށް ފަހަކަށް އައިސް ދިމާވެފައިވާ ހީނަރުކަން ކަމަށެވެ. ސިޓީ ވަނީ އެ ޓީމު އެންމެ ފަހުން ކުޅުނު ހަތަރު މެޗުން ބަލިވެފައެވެ. މީގެ ތެރޭގައި ޕްރިމިއާ ލީގުގެ ދެ މެޗު ވެސް ހިމެނެއެވެ.
ޕެޕް ބުނީ، މިއީ ކްލަބް ދޫކޮށްދާން އެންމެ ރަނގަޅު ވަގުތު ނޫންކަމުގައި އޭނާއަށް ވިސްނުނު ކަމަށެވެ. ފަހަރެއްގައި ސަބަބަކީ ޖެހިޖެހިގެން ހަތަރު މެޗުން ބަލިވުން ކަމުގައި ވެސް ވެދާނެ ކަމަށެވެ. އޭނާ ބުނީ، ހަތަރު ބައްޔަށްފަހު އަލުން ޓީމު ހަމައަކަށް އެޅުވުމުގެ ފުރުސަތު ލިބެންޖެހޭ ކަމަށެވެ. އަދި، މިކަމުން އަރައިގަތުމަށް ކުރެވެން އޮތް ހުރިހާ ކަމެއް ކުރާނެ ކަމަށް ވެސް ޕެޕް ބުންޏެވެ.
މިއީ ޕެޕްގެ ކޯޗިން ކެރިއަރުގައި މިހާތަނަށް ޖެހިޖެހިގެން ހަތަރު މެޗުން އޭނާ ކޯޗު ކޮށްދިން ޓީމެއް ބަލިވި ފުރަތަމަ ފަހަރެވެ. މިއީ އޭނާ ސިޓީގައި ހޭދަކުރާ ނުވަވަނަ ސީޒަނެވެ. އަދި، އާ އެއްބަސްވުމާ އެކު 10 އަހަރު އެ ކްލަބްގައި ހުންނާނެކަން މިވަނީ ޔަގީންވެފައެވެ.
ޕެޕް މިހާތަނަށް ވަނީ ސިޓީއާ އެކު 18 ތަށި ކާމިޔާބުކޮށްފައެވެ. ސިޓީ ދެން އެންމެ އަވަހަށް ކުޅޭ މެޗުގައި މާދަމާ ނުކުންނާނީ ޕްރިމިއާ ލީގުގައި އަމިއްލަ ދަނޑުގައި ޓޮޓްނަމް ހޮޓްސްޕާއާ ދެކޮޅަށެވެ.